Aslanov R.

 

Sərhədləri ortadan qaldıran festival

 

Azərbaycan Kinematoqrafçılar İttifaqının katibi Abbas Əliyev deyir ki,  insanları  ayıran amillər çoxdur. Lakin incəsənətin qüdrəti bütün bu amillərin üstündən xətt çəkib, milliyyətindən, yaşadığı qitədən, dövlətdən. dilindən və dinindən asılı olmayaraq, insanları  birləşdirməyə qadirdir. Sentyabrın 4-dən başlayaraq bir həftə ərzində keçirilən "Şərq-Qərb" festivalının da ümdə vəzifələrindən biri bu idi. Artıq səkkizinci dəfə keçirilən bu festivalda təyin olunmuş mükafat nominasiyalarına nəzər salmaq kifayətdir ki, tədbirin dözümlülük, anlaşma ruhunu ifadə etdiyini görək. Bu baxımdan, festivalın ayrı-ayrı ölkələr arasında sərhədləri ortadan qaldırdığını, insanları birliyə səslədiyini cəsarətlə söyləyə bilərik.  Festival qalibləri "Bəşəriyyətə ən humanist göndəriş" və "Dünya kinosunun inkişafındakı xidmətlərinə görə" nominasiyaları üzrə təltif olunublar. "Qadınlıq rəmzini tərənnüm edən ən yaxşı obraz" və "Kişilik rəmzini tərənnüm edən ən yaxşı obraz" nominasiyaları  da festivalda nümayiş  etdirilən seçmə filmlərin payına düşüb.

"Şərq-Qərb" festivalı keçirilməyə başlandığı illərdə 5-6 ölkənin nümayəndələrini təmsil edirdisə, artıq 12 ölkədən 82 kino xadimi bu tədbirin işinə qatılıb. Bu nümayəndələr arasında rejissorlar, aktyorlar, prodüserlər vardı. 29 fılmə baxış keçirilib və həmin filmlər arasında Rusiya, İran, Ukrayna, Qazaxıstan, Gürcüstan, eləcə də digər ölkələrin kinematoqrafçılarının ekran işləri olub.

Azərbaycan kinosunu bu festivalda Murad İbrahimbəyovun "Üç qız", Mehriban Ələkbərzadənin "Məhkumlar", Ramiz Həsənoğlunun "Cavid ömrü" filmləri təmsil edib.

Festival günlərində "Milli kino-Böyük ekrana yol" mövzusunda dəyirmi masa ətrafında müzakirələr aparılıb. İctimaiyyətin kinematoqrafçılarla görüşlərinə və uşaq filmlərinin nümayişinə də geniş yer verilib. Ayrıca, gürcü filmlərinin retrospektivi keçirilib. Həmin retrospektiv baxışda rejissor Eldar Şengelayanın, Georgi Xaindravanın "Xəyallar məzarlığı" və Georgi Şengelayanın "Qatar gedirdi" filmləri nümayiş etdirilib.

Mərhum rejissor Rasim Ocaqovun filmlərinin retrospektiv nümayişi də bu festivalın əhəmiyyətli məqamlarından biri kimi yadda qalıb.

"Baltikyanı ölkələrdə və keçmiş SSRİ məkanında yaranmış dövlətlərdə müştərək film istehsalının təşkilatı və hüquqi problemləri" geniş araşdırma mövzusu kimi nəzərdən keçirilib.

 

525-ci qəzet.- 2007.- 11 sentyabr.- S. 7.