Qadın
kinosu erası
IX "Şərq-Qərb"
məhz belə səciyyələnir
"...Müdaxilələrdən
ən çox müdafiə olunan kinematoqrafın büsbütün
kişi peşəsi hesab edilən rejissor sənətində
də qadınlar mühüm mövqelərə
daha mütəşəkkil
tərzdə sahib çıxmaqdadırlar..."
IX "Şərq-Qərb" Bakı Beynəlxalq Kinofestivalının
proqramını əks
etdirən kataloqda festivalın prezidenti Rüstəm İbrahimbəyovun
yerləşdirilmiş müraciətində
bu fikir xüsusilə vurğulanıb.
Paytaxtımızın 1996-cı
ildən, qısa fasilələrlə olsa da, ev sahibliyi
etdiyi növbəti kino bayramına bu gün "Yaşıl teatr" Konsert Kompleksində start verilir. Təntənəli açılış
mərasimindən bir neçə saat öncə isə "Azərbaycan" kinoteatrında
bolqar rejissoru Anri Kulyevin "Oktyabrda sərçələr"
bədii filmi nümayişlənəcək. Qadın rejissorların intensivlik təşkil etməsinə gəlincə
isə IX "Şərq-Qərb"də başda Mehriban Ələkbərzadənin "Məhkumlar" kino işi ilə olmaqla, Rusiyadan Vera Storojeva "Ev heyvanları ilə səyahət",
Ukraynadan Yeva Neyman "Çay kənarında", Larisa
Sadilova "Şəxsi
heç nə" filmləri ilə kinosevərləri sevindirəcəklər.
Hər 3 film sırf insanlar arasında anlaşma, insanpərvərlik problemlərindən
bəhs edir. Festivalın açılışında
təqdim ediləcək
"Məhkumlar" filmimiz
barəsində geniş
məlumat vermişik.
"Ev heyvanları
ilə səyahət",
"Çay kənarında",
"Şəxsi heç
nə" ekran işlərinin birincisində
sevmədiyi insanla 19 illik, belə demək mümkündürsə,
ailə həyatı yaşayan gənc qadının öz "mən"ini və xoşbəxtlik anlayışını tapmaq
şansından istifadə
etmək bacarığından,
ikincisində ana
ilə qızın münasibətlərindən, həyata,
bir-birinin duyğularına
baxışlarından, üçüncüsündə
isə şəxsi detektivlə müşahidə
obyekti arasındakı
əlaqədən söhbət
gedir.
IX "Şərq-Qərb"in proqramı rəngarəng
və günümüzün
ruhuna köklənməklə
yanaşı, müəllif
kinosu ənənələrinə
sadiqlik cəhəti ilə seçilir. Təəssüf doğuran
yeganə məqam proqramda sənədli filmlərin olmamasıdır.
Kinofestival çərçivəsində
haqqında danışdığımız
filmlərdən savayı,
Azərbaycan rejissorları
Murad İbrahimbəyovun
"Üç qız",
Ramiz Həsənoğlunun
"Cavid ömrü",
Bruno Dümonun (Fransa) "Flandriya", Aleko Tsabadzenin (Gürcüstan) "Rus üçbucağı", Məcid
Məcidinin (İran)
"Məcnun söyüd",
Janabey Jetiurovun (Qazaxıstan) "Yol gözətçisinin qeydləri", Aleksey Popoqrebskinin (Rusiya) "Sadə şeylər", Yüksəl
Aksunun (Türkiyə)
"Dondurmam-qaymaq" ekran
əsərləri, habelə
"Gürcü filmləri
retrospektivi"ndə
Eldar Şengelayanın
"Qeyri-adi sərgi",
Georgi Şengelayanın
"Və qatar gedirdi", Georgi Xaindravanın "Xəyallar
məzarlığı" filmləri, "Xüsusi nümayiş" bölümündə
Xocaqulu Narliyevin (Türkmənistan) "Manqurt"
ekran əsərləri
təqdim ediləcək.
Bunlardan savayı, IX
"Şərq-Qərb"
çərçivəsində Uşaq Filmləri Festivalı da keçiriləcək. Festival
proqramına daxil edilmiş filmlər "Azərbaycan" kinoteatrında
və "İbRus"
teatrının kinozalında
nümayişlənəcək. Festival ərzində kino mütəxəssislərinin
iştirakı ilə
"Milli kinematoqraf - böyük ekrana yol" mövzusunda "dəyirmi masa" təşkil ediləcək.
Hər dəfə olduğu kimi, festivalın təşkilatçıları 4 nominasiyanın - "Qadınlıq
rəmzini tərənnüm
edən ən yaxşı obraz",
"Kişilik rəmzini
tərənnüm edən
ən yaxşı obraz", "Bəşəriyyətə
ən humanist göndəriş", "Dünya
kinosunun inkişafındakı
xidmətlərinə görə" - qaliblərini
də müəyyənləşdirəcəklər.
Festival iştirakçılarına
həmçinin "Bakıda
gəzinti" fototarixçəsi
də təqdim ediləcək.
Ənənəyə uyğun olaraq "Şərq-Qərb" festivalının proqramına
mükafatçı da
olmasa, uğurlu ekran taleyinə malik filmlər daxil edilir. Festival
sentyabrın 10-da M.İbrahimbəyovun
"Üç qız"
filmi ilə "Azərbaycan" kinoteatrında
yekunlaşacaq.
Festivalın işini
yerli KİV-lərdən
savayı, ORT, "MİR", "Moskovskiye novosti" kimi Rusiya informasiya
vasitələri də
işıqlandıracaq.
P.S. Teleməkanımızın barmaqla sayılacaq
qədər az sayda peşəkarlarından
biri olan, tamaşaçılarını baxımlı televiziya tamaşaları ilə illərdən bəri sevindirən, "Azdrama"nın səhnəsində
böyük müstəqil
işi ilə uğurlu debütə imza atan, indi
isə meydana ilk böyük və müstəqil ekran əsərini çıxaran rejissor Ramiz Həsənoğlunun
teletamaşalarını bədii
telefilm kimi təqdim etmək suallar doğurur. Məsələn, məgər
R.Həsənoğlu kimi
peşəkar belə
"təqdimatlar"sız
nəsə itirə bilər?
Həftə içi.-2007.-5 sentyabr.-S.8.