Mükərrəmoğlu M.

Sabah Azərbaycanda IX Şərq-Qərb beynəlxalq kino festivalı öz işinə başlayır

Nəhayət ki, növbəti Şərq-Qərb kinofestivalının vaxtı yetişdi. Sabah Bakıdakı “Yaşıl teatr”da festivalın açılış mərasimi keçiriləcək. Festivalın açılışı Azərbaycan kinematoqrafçılarının “Məhkumlar” filmi ilə başlayacaq. Kinorejissor Mehriban Ələkbərzadənin yazıçı Çingiz Abdullayevin ssenarisi əsasında quruluş verdiyi bu filmdə çox ağrılı məhəbbət hadisəsi əks olunur. Cüzamlı xəstələrin müalicə olunduğu xəstəxanada işləməyə gələn həkim buradakı bir xəstə qıza vurulur. Onun hisslərini faciəvi sınaq gözləyir. Çünki əslində bu xəstələrlə ailə qurmaq qadağandır...
Rollarda Sevinc Əlişova, Ramin Hacıyev, Mehriban Ələkbərzadə, Mehriban Xanlarova, Nurəddin Quliyev və Tariyel Qasımov çəkilmişlər.
Filmin nümayişindən əvvət tamaşaçıları maraqlı açılış proqramı gözləyir.
Sentyabrın 6-da festival çərçivəsində gürcü filmlərinin retrospektivi keçiriləcək. “İbrus” teatrında keçiriləcək bu retrospektivə Eldar Şengelayanın çəkdiyi “Qeyri-adi sərgi”, Georgi Şengelayanın quruluş verdiyi “...Və qatar gedirdi”, Georgi Xandravanın “Xəyallar məzarlığı” filmləri daxil edilmişdir.
Sonrakı günlər Türkiyənin, Rusiyanın, Fransanın filmlərinə baxmaq mümkün olacaq.
Azərbaycan kinematoqrafçıları festivala daha bir film — “Üç qız”ı təqdim edir. Bu filmin istehsalında Almaniya və Rusiya kinematoqrafçıları da iştirak etmişlər. Kinorejissor Murad İbrahimbəyovun Ravel Finnin iştirakı ilə yazdığı ssenari əsasında quruluş verdiyi bu filmin süjeti II Dünya müharibəsi illərində Afrikada başlanmış və bizim dövrümüzdə Bakıda tamamlanan bir təsviri sənət əsərinin yaranması ilə bağlıdır. Müxtəlif talelərin bağlı olduğu bu əsər əslində müəlliflər üçün istinad mənbəyidir.
“Üç qız” filmində baş rolları Təranə Ocaqverdiyeva, Arzu Qədirbəyova, Aleksandr Fider ifa edirlər.
Azərbaycan kinosunun festivala daha bir filmi də təqdim olunur. “Cavid ömrü” adlı bu kinolent böyük şairimiz, mütəfəkkir Hüseyn Cavid haqqındadır. İkiseriyalı filmin müəllifləri əfsanəvi yazıçının tərcümeyi-halından seçilmiş, gənclik, yaradıcılıq yetkinliyi, dostlar, düşmənlər, sevgi, xəyanət, DTK divarları arasında işgəncələr və nəhayət ölümün əks olunduğu epizodlar XX əsr Azərbaycan mədəniyyətindəki həqiqi miqyası və yüksək yerini müəyyən edən mərhələləri dramaturji düyünə bağlayırlar. Filmə rejissor Ramiz Həsənoğlu quruluş vermişdir. Cavid rolunda xalq artisti Rasim Balayev çəkilmişdir.
Festivala Türkmənistan rejissoru Xocaqulu Narlıyevin xüsusi proqramı da daxil edilmişdir. Bu proqramda rejissorun “Manqurt” filmi nümayiş etdiriləcək. 1990-cı ildə çəkilmiş filmdə baş rolu Maya Aymedova oynayır. Çingiz Aytmatovun “Əsrə bərabər gün” romanından manqurtlar haqqında əfsanə — qədim zamanlardan əsrlərin yaddaşsızlaşdırılaraq manqurtlara çevrilməsindən bəhs edən bu filmin istehsalında Türkiyə və Liviya kinematoqrafçıları da iştirak etmişlər.
Festivalın proqramına “Oktyabrda sərçələr” (Bolqarıstan), “Flandriya” (Fransa), “Rus üçbucağı” (Rusiya), “Məcnun söyüd”" (İran), “Ev heyvanları ilə səyahət” (Rusiya) , “Şəxsi heç nə” (Rusiya), “Dondurmam qaymaq” (Türkiyə), “Çay kənarında” (Ukrayna) filmləri də daxil edilmişdir.
Festivalın sonunda xüsusi mükafatların təqdimetmə mərasimi də olacaq.

Xalq qəzeti.-2007.-4 sentyabr.-S.4.