Mükərrəmoğlu M.

Şərq-Qərb beynəlxalq kinofestivalının açılış mərasimi əsl bayrama çevrildi

Sentyabrın 5-i axşam kino həvəskarları “Yaşıl teatra” axışırdı. Burada “Şərq-Qərb” kinofestivalının açılış mərasimi keçiriləcəkdi. Səhnədə IX beynəlxalq kinofestivalın emblemi asılmışdı. Kino həvəskarları çoxdan idi ki, belə şadyanalıq görməmişdi. Azərbaycanın görkəmli sənət xadimləri — aktyorlar, rejissorlar, bəstəkar və rəssamlar bir-birini təbrik edir, ara-sıra jurnalistlərin suallarına cavab verir, dostlar, tanışlar bir-biri ilə görüşürdülər.
Budur, səhnəyə musiqiçilər çıxırlar. Onlar Azərbaycan və dünya musiqisindən nümunələr ifa edirlər. Rəqqasələrin gözəl rəqslərini, Sevda Ələkbərzadənin, “Rast” qrupunun nəğmələrini tamaşaçılar böyük maraqla qarşılayırlar.
Səhnəyə Azərbaycanın mədəniyyət və tarizm naziri Əbülfəs Qarayev dəvət olundu. Nazir qeyd etdi ki, bu festival əvvəlkilərdən bir neçə xüsusiyyətinə görə fərqlənir. Festivalın açılışını yeni-köhnə “Yaşıl teatr”da keçiririk. İlk dəfə olaraq Azərbaycanın üç filmi festivala təqdim olunmuşdur. Xüsusilə qeyd etməliyəm ki, bu festivalın keçirilməsi cənab Prezidentimiz İlham Əliyevin kino sənətinin inkişafı haqqında sərəncamından sonra həyata keçirilən ilk genişmiqyaslı kino tədbiridir. Bilirsiniz ki, bu sərəncamda Azərbaycanda kino sənayesinin inkişafına xüsusi diqqət yetirilir. Növbəti festivalı, yəqin ki, bərpası davam edən Heydər Əliyev adına sarayda keçirəcəyik. Orada beynəlxalq standartlara uyğun kino avadanlıqları quraşdırılacaq. Payızda biz “Nizami” kinoteatrının da təmirinə başlayacağıq. Növbəti festivalın filmləri orada göstəriləcək. Əminəm ki, festival bu dəfə də uğurla keçəcək və o, kinomuzun tarixi yaddaşında yaşayacaqdır.
Sonra Kinematoqrafçılar İttifaqının I katibi, xalq artisti Rasim Balayev çıxış etdi. O, “Şərq-Qərb” festivalının tarixindən danışdı. Qeyd etdi ki, sayca IX olan bu festival əvvəlkilərdən bir çox əlamətlərinə görə fərqlənir. Bu, ilk növbədə iştirakçı ölkələrin coğrafiyasının genişlənməsi, onun məzmunca yeniləşməsində özünü göstərir. Rasim Balayev festivalı açıq elan etdi
Nəhayət “Məhkumlar” (rej. Mehriban Ələkbərzadə) filminin yaradıcı heyəti ilə görüşdən sonra film nümayiş etdirildi. və onun işinə uğurlar arzuladı.
Fasilə vaxtı biz Azərbaycan kinematoqrafçılarının festival barədə fikirlərini öyrəndik.
Rafiq Əzimov, xalq artisti:
— Bu festival, doğrudan da, əsl bayramı xatırladır. Görün nə qədər insan toplaşıb. Mən burada sənət dostlarımla görüşdüm. Biz aktyorlar neçə vaxtdır ki, böyük ümidlə yaşayırdıq. Nəhayət, möhtərəm Prezidentimiz kino sənətinin inkişafı ilə bağlı sərəncam imzaladı. Kinomuz, doğrudan da, böyük çətinliklərlə üzləşmişdi. İndi artıq filmlər çəkilir, festivallar keçirilir. Bunlar çox yaxşıdır. Mən özüm yenicə çəkilişdən gəlirəm. “Cavad xan” filmində Mirzə yolunda oynayıram. İndi pavilyonda işləyirik. Ən ağır səhnəni bu gün oynayırdım. Qəhrəmanımın ölüm səhnəsi çəkilirdi. Bu film də tarixi ekran əsəri olacaq.
Çox arzu edərdim ki, bizim Azərbaycan filmləri festivallarda göstərilsin, mükafatlar alsın. Bu festivalda Azərbaycan kinosu üç filmlə iştirak edir. Bu çox sevindirici haldır . Festivala uğurlar arzulayıram. İnanıram ki, Azərbaycan filmləri bu festivalın ən yaxşı mükafatlarını alacaqdır.
Muxtar Maniyev, xalq artisti:
— “Şərq-Qərb” kinofestivalı bizim kinonun inkişafda olduğunu göstərir. Bu festivalın 1996-cı ildən iştirakçısıyam. Çəkildiyim filmlər də bu festivallarda iştirak edib.
Mən dünyanın məşhur kino xadimlərini bu festivallarda görmüşəm. Məşhur fransız aktyoru Piyer Rişarın Bakıya gəlişi böyük əks-səda doğurmuşdu. Rusiyanın görkəmli aktyor və rejissorları da bu festivalda iştirak etmişlər. Prezidentimizin kinomuzun inkişafı ilə bağlı sərəncamı öz nəticələrini verməkdədir. Kinostudiyamız təmir olunur, kinoteatrlarda əsaslı təmir işlərinə başlanılır. Filmlər də ki çəkilməkdə davam edir. Güman edirəm ki, belə getsə, yaxın gələcəkdə kinomuzun əvvəlki imici özünə qaytarılacaq.
Mən festival iştirakçılarını salamlayır, ona öz işində uğurlar arzulayıram.
Tofiq İsmayılov, kinorejissor, əməkdar incəsənət xadimi, Türkiyənin Memar Sinan Universitetinin professoru:
— Mən hər il bu festivala dəvət alıram. Bu gün də Türkiyədən bir saat əvvəl qayıtmışam. Elə birbaşa “Yaşıl teatr”a gəlmişəm. Azərbaycan kinosunun gələcək inkişafına böyük ümid bəsləyirəm. 14 ildir İstanbuldayam. Orada Azərbaycan kinosunun təbliği ilə bağlı çox işlər gördüm. İstanbulda üç dəfə “Türk dünyası” kinofestivalı keçirtdim. Bu festivalda biz Azərbaycan kinosuna daha üstün yer verdik.
Bu festivalı təşkil edənlərə öz minnətdarlığımı bildirirəm. Keçmiş sovet respublikaları kinematoqrafçılarını bir yerə toplamaq baxımından bu çox əhəmiyyətlidir. Biz bir yerdə təhsil almış sənət adamlarıyıq. Belə görüşlər bizi yenidən yaxınlaşdırır.
“Şərq-Qərb” kinofestivalı uluslararası bir festivala çevrilir.
İnanıram ki, bu festivalın coğrafiyası daha da genişlənəcək və o, əsl beynəlxalq kinofestival statusu qazanacaq.
Nuriyyə Əhmədova, xalq artisti:
— İlk növbədə Kinematoqrafçılar İttifaqına, onun rəhbərliyinə minnətdaram ki, belə bir beynəlxalq tədbiri təşkil edib, ərsəyə gətirə biliblər. Bu festival ilk dəfə fəaliyyətə başladığı vaxtdan bu günə kimi mən onun iştirakçısı olmuşam. Hər dəfə bir yenilik var, irəliləyiş var. Möhtərəm Prezidentimizə minnətdaram ki, Azərbaycan kinosunun inkişafına belə yüksək qayğı göstərir. Biz sənət adamlarına bu gün işləmək, gözəl filmlər yaratmaq qalır.
Hazırda studiyamızda təmir işləri gedir, yeni çəkiliş avadanlıqları alınır. Kinoteatrlarımız təmir olunaur. Dövlət Film Fondu üçün yeni bina inşa edilir. Bunlar hamısı o deməkdir ki, milli kinomuzun gələcəyinə böyük ümidlə baxmaq olar.
Bu festival bizim üçün ikiqat bayramdır. Çünki həm filmlərimiz göstərilir, həm də müxtəlif ölkələrdən gəlmiş sənət dostlarımızla görüşürük. Ümid edirəm ki, bu festival biz kinematoqrafçıları daha da yaxınlaşdıracaq və gələcək yaradıcılıq üçün yeni stimul verəcək.

Xalq qəzeti.-2007.-7 sentyabr.-S.6.