Lalə

Musiqi məktəblərinin problemləri növbəti iclasda müzakirə olundu

Mədəniyyət və Turizm nazirinin müvafiq göstərişlərinə uyğun olaraq, hər il tədris öncəsi rayon rəhbərliyi və musiqi məktəblərinin rəhbər kollektivlərinin iştirakı ilə iclas keçirilir.

Budəfəki iclas sentyabrın 12-də Xırdalan mədəniyyət evində baş tutdu. İclasda Mədəniyyət və Turizm Nazirliyi musiqi təhsili üzrə metodiki kabinetin rəhbəri Səid Hacıyev və Abşeron Rayon İcra Hakimiyyəti başçısının müavini Yalçın Fərəcov iştirak edirdi.

Giriş sözü ilə Xırdalan rayon mədəniyyət və turizm şöbəsinin müdiri İlham Manafov danışaraq yeni tədris ili münasibətilə müəllim heyətini təbrik etdi. Bildirdi ki, hər il olduğu kimi bu il də nazirlik sistemi çərçivəsində keçirilən iclasda musiqi məktəblərinin vəziyyəti və yeni tədris planı müzakirə olunacaq.

İclasda 5 musiqi məktəbinin nümayəndəsi iştirak edirdi.

İlk olaraq Ceyranbatan qəsəbəsi musiqi məktəbinin direktoru Nəcibə Zeynalova danışaraq bildirdi ki, məktəbdə 12 ixtisas tədris olunur. Məktəb hər il tədbirlər planına uyğun olaraq perspektivli tədbirlər həyata keçirir.

Bütün uğurlara baxmayaraq, bir sıra problemlər də mövcuddur ki, onların icrası məktəbin səlahiyyətində deyil.

Nəcibə xanım ən böyük problem kimi, məktəb binasını misal gətirərək dedi ki, obyektin tam şəkildə ayrı-ayrı şəxslər tərəfindən özəlləşdirilmə məsələsi ortaya çıxıb.

Xırdalan musiqi məktəbinin direktoru İkram Manafov da öz məktəblərinin fəaliyyətindən danışarkən qeyd etdi ki, burada 120-dən çox müəllim çalışır. Bu il 100-dən artıq uşaq 10 ixtisas üzrə təhsilini başa vurub. O, məktəbin əsaslı təmirində əməyi keçən rayon rəhbərliyinə təşəkkür etdi. Həmçinin problemlərin də mövcud olduğundan danışıb bildirdi ki, sinif otaqları çatışmır, dərslər evdə keçirilir, kollektiv daxilində də çatışmazlıqlar nəzərə çarpır, gecikmə halları, işə laqeyd münasibətlər var və s.

Mehdiabad musiqi məktəbinin direktoru Təranə Mahmudova da analoji məlumatı diqqətə çatdıraraq məlumat verdi ki, ötən tədris ilində 25 şagird məktəbi bitirib, 4 nəfər musiqi kollecinə daxil olub. Eyni zamanda rayon, respublika səviyyəsində tədbirlər həyata keçirilib.

1990-cı ildən fəaliyyət göstərən Saray incəsənət məktəbinin müdiri Murad Nuriyevin çıxışından məlum oldu ki, 2007-2008-ci ildə şagirdlərin qəbul planı tam olaraq yerinə yetirilib. Məktəbdə 9 ixtisas tədris olunur. Məktəbin şagird kollektivi nazirlik tərəfindən göndərilən əmrə əsasən respublika daxilində və ölkə xaricində keçirilən tədbirlərdə uğurla iştirak edir. Qeyd etdi ki, başqa idarə və müəssisələrdə olduğu kimi, onlarda da bir sıra nöqsanlar var. Kollektiv daxilində bir sıra işçilər müvafiq tapşırıqları yerinə yetirmir, buna görə onlar üçün müəyyən cəzalar tətbiq olunur. O, məktəbin vəziyyətindən də şikayətlənərək bildirdi ki, məktəbin nəinki səhnəsi, hətta kiçik zalı belə yoxdur. Tədbirlər icarə əsasında başqa obyektlərdə keçirilir. Məktəb məscid ilə üzbəüz yerləşdiyindən ara-sıra problemlər də yaşanır. Sonda o, yeni məktəb binasının tikilməsi üçün müraciət etdi.

Qobu incəsənət məktəbinJn rəhbəri Azər Qasımov bir qədər nikbin əhval-ruhiyyə ilə bildirdi ki, 2008-ci ildən Qobu Bələdiyyəsi tərəfindən bina məsələsi həll olunacaq. Ötən ildə məzun olan 11 şagirdin biri İncəsənət Universitetinə daxil olub. Bu ildən rəssamlıq və xoreoqrafiya ixtisası üzrə dərs keçilməsi də nəzərdə tutulub.

Bütün verilən məlumatlara cavab olaraq İlham Manafov diqqətə çatdırdı ki, rayon rəhbərliyi Nazirlər Kabineti qarşısında məsələ qaldırıb. Bir sıra problemlərin həllinə dair artıq cavab gəlib və o, layihə ilə artıq tanışdır.

İclasda iştirak edən Mədəniyyət və Turizm Nazirliyinin musiqi təhsili üzrə-metodiki kabinetin rəhbəri Səid Hacıyev və Abşeron Rayon İcra Hakimiyyəti başçısının müavini Yalçın Fərəcov yeni tədris ili münasibəti ilə hamını təbrik etdilər və müəllimləri ruh yüksəkliyi ilə işləməyə çağırdılar.

Sonra tədris planı geniş şəkildə müzakirə olundu.

Kino+.- 2007.- 14 sentyabr.- S. 3.