Muğam cazı kölgədə qoydu

 

Sentyabrın 27-də Yaşıl Teatr Konsert Kompleksində dünya şöhrətli xanəndə Alim Qasımovla istedadlı gənc cazmen Şahin Növrəslinin "50/30" adlı konsert verdi. Muğamla cazın sintezi üzərində qurulan və anşlaqla keçən bu konserti izləyənlər hər iki sənətçinin Şərqlə Qərb musiqisini necə incə harmonik improvizələrlə sintez etmələrinin şahidi oldular.

Onu da qeyd edək ki, sözügedən konsert hər iki sənətçinin yubileylərinə həsr olunur. Bu il Alim Qasımovun 50, Şahinin isə 30 yaşı tamam oldu.

Səhnəyə ansamblı və qızı Fərqanə ilə çıxan ustad xanəndə "Bayatı-Şiraz" dəstgahı üstündə kompozisiya ilə tədbirə bir istilik gətirdi. Ata ilə qızın fantastik ifasını, musiqiçilərin möhtəşəm müşayiətini tamaşaçılar sürəkli alqışlarla izləyirdilər. Zəngulələrdən süzülən hərarət izləyiciləri yünglilləşdirir, bu dünyanın dərd-sərindən bir anlıq da olsa, Alimin dünyasına çəkirdi. Bunun acısını isə çəkən Şahin oldu. Ustaddan sonra səhnəyə çıxan Şahinin qardaşları Arslan və Nurlan Növrəslilərin müşayiəti ilə muğamlar üstündə caz gəzişmələrilə izləyiciləri sanki "Alimin dünyasında saxlamaq" istəməsi alınmadı... Tamaşaçılar konsert salonunu tərk etməyə başladılar. Bəlkə də Alim Qasımovun ifasına yüklənən dinləyicilər cazı həzm etməyə çətinlik çəkdilər... Lakin gedən tamaşaçılar bilmirdilər ki, konsertin kulminasiyası -Alimlə Şahinin birgə çıxışı var. Sözün düzü, bu sintez məhz konsert zamanı ortalığa çıxan ekskluziv ifa təsiri bağışlasa da, möhtəşəm alındı, xanəndənin muğam improvizələrini Şahinin lirik caz interpretasiyaları ilə izləməsi, Natiqin nağarada bu dueti tamamlaması uğurlu bir çıxış idi.

Konsertin təşkilatçısı "Buta" Mədəniyyət Mərkəzinin konsert öncəsi vəd etdiyi "sürpriz"in isə tamaşaçılar deyil, KİV nümayəndələri üçün hazırlandığı məlum oldu. KİV nümayəndələrini konsert başlayandan bir az keçənə qədər gözlədən "Buta"nın əməkdaşları sonradan telekanalların və bəzi qəzetlərin əməkdaşlarını içəri buraxsalar da, əksər jurnalistlər konserti izləyə bilmədilər. Yeri gəlmişkən, bu hal artıq bir neçə dəfədir ki, təkrarlanır. Yaşıl Teatrda indiyədək keçirilən tədbirlərin hamısında KlV nümayəndələri problemlə qarşılaşıb.

Yaşıl Teatr Bakı Konsert Kompleksinin direktoru Eldar Xəlilov isə APA-ya açıqlamasında media nümayəndələri ilə problemlərinin olmadığını bildirib: "Bu məsələnin Yaşıl Teatra heç bir aidiyyəti yoxdur. KİV nümayəndələrinin konsertə buraxılmaması təşkilatçıların istəyi ilə olub. Mən heç vaxt deməmişəm ki, jurnalistləri içəri buraxmayın".

Konsertin təşkilatçısı olan "Buta" İncəsənət Mərkəzindən isə deyiblər ki, KİV təmsilçilərinin qapı arxasında qalmasına səbəb jurnalistlərin təşkilatçılara hörmətsizlik etməsi olub.

Onların dediyinə görə, iki qəzet əməkdaşı təşkilatçıları təhqir edib: "Bizim mərkəzin jurnalistlərə çox böyük hörməti var. Ancaq jurnalistlərin təhqiramiz sözlər işlətməsi bizə pis təsir etdi və onları konsertə buraxmadıq".

Qeyd edək ki, bu hadisə jurnalistlərin qapı arxasında qalmasından sonra baş verib.

Xalq artisti Alim Qasımov da bu vəziyyətdən narazılığını bildirib: "Mən hər zaman mətbuat nümayəndələrinə hörmətlə yanaşmışam. Çünki bizlərin işini xalqa çatdıran vasitəçi sizlərsiniz. Əgər mən bu halın şahidi olsaydım, qapının ağzına gəlib bütün jurnalistləri içəri buraxardım".

Sonda Eldar Xəlilovun nəzərinə bir məqamı çatdırmaq istərdik ki, ümumiyyətlə, bütün konsertlərdə Yaşıl Teatrın xanım adminstratorları jurnalistlərlə çox aqressiv rəftar edirlər. Onlardan birinin dediyi kimi, "jurnalistlər çöldə qalanda, onlara ləzzət edir..."

 

Ekspress.- 2007.- 29 sentyabr.- S. 20.