Dünyaşöhrətli britaniyalı musiqiçi, ser Elton Con Bakıda Tofiq Bəhramov adına stadionda konsert vermişdir

 

Azərbaycan Prezidenti İlham Əliyev konsertdə olmuşdur

 

Sentyabrın 23-də Bakıda Tofiq Bəhramov adına stadionda Heydər Əliyev Fondunun təşkilatçılığı ilə dünyaşöhrətli britaniyalı musiqiçi, ser Elton Conun ölkəmizdə ilk dəfə konserti olmuşdur.
Konserti 32 min nəfər tamaşaçı izləmişdir.
Stadiona toplaşan tamaşaçılar Prezident İlham Əliyevi xanımı Mehriban Əliyevanı alqışlarla qarşıladılar.
Müğənni bəstəkar, dünyanın ən güclü pianoçularından biri, rok pop əfsanəsi, ən məşhur estrada ulduzlarından biri, sənət adamları arasında nadir titul daşıyıcısı - Böyük Britaniya Krallığında Ser adına layiq görülmüş insan - bunlar hamısı vaxtilə iştirakçı olduğu qrupun üzvlərinin adlarından özünə təxəllüs götürmüş Elton Cona aiddir. Əsl adı Recinald Kennet Duayt olan müğənninin hər çıxışı, əslində, adi anlayışda konsert deyil, gözəl musiqi bənzərsiz işıq effektlərindən ibarət fantastik şoudur.
Azərbaycan tamaşaçısına da bu cür musiqi bayramı bəxş edən ser Elton Conun mahnılarının əksəriyyəti royalda həzin melodiya ilə başlayaraq, musiqili enerji partlayışına çevrilirdi. Müxtəlif janrları əhatə edən, adi pop musiqidən roka hətta hadroka keçən repertuar nümunələrində əsl caz improvizasiyaları da vardır. Eyni zamanda, lirikasını itirməyən mahnılarının çoxu artıq ölməz şlyagerə çevrilibdir.
Yaradıcılığını yaxşı tanıyan Azərbaycan tamaşaçıları da britaniyalı qonağa dəstəyini əsirgəmədilər. Populyar hitlərin ilk notlarından alqış sədaları bürüyən stadionun tribunaları hərdən sayrışan ulduzlarla dolu səmanı xatırladırdı. Yeni mahnılarla yanaşı, artıq müğənninin vizit kartına çevrilən məşhur "Rocket Man", "Daniel", həddindən artıq populyar "Sacrifice", eləcə lirik "Sorry Seems To Be The Hardest Word", çoxlarının ürəyində həmişəlik yer tapan "Candle İn TheWind" sürəkli alqışlarla qarşılandı.
İki saat ərzində canlı olaraq 20 mahnı ifa edən dayanmadan royalda peşəkar pianoçu texnikasını nümayiş etdirən 60 yaşlı Elton Con konsertdə son mahnısı olan "Your song" əsərini
Azərbaycan tamaşaçısına ithaf etdi.
Konsertdən sonra Prezident İlham Əliyev xanımı Mehriban Əliyeva Elton Conla görüşdülər. Müğənni Azərbaycana gəlməsindən dövlətimizin başçısı ilə görüşməsindən məmnun olduğunu bildirdi. Konsertin keçirilməsi üçün yaradılan şəraitə görə minnətdarlıq etdi.

 

Azərbaycan.-2007.-25 sentyabr.-S.2.