Sevinc

Səmərqənd – “Şərq təranələri”

1997-ci ildən keçirilən bu musiqi festivalı artıq 6-cı dəfədir ki, Özbəkistanın paytaxtında baş tutur. Hər il keçirilən festivalda böyük uğur qazanan Azərbaycan musiqiçiləri bu il də iştirak etmək üçün dəvət almışdılar. Xatırladaq ki, birinci festivalda Azərbaycandan (xanəndə Simarə İmanova) Qran-priyə layiq görülmüşdü. Alim Qasımov festivalın birinci, Zabit Nəbizadə isə ikinci mükafatı ilə Vətənə dönmüşdülər. Beşinci festivalın iştirakçısı əməkdar artist Aygün Bəylər də birinci mükafata layiq görülmüşdü. Bu ilki festivalda iştirak etmək üçün Mədəniyyət və Turizm Nazirliyinin təşəbbüsü ilə məhz gənclər seçilmişdi. Respublikamızın nümayəndə heyətinin rəhbəri, Mədəniyyət və Turizm Nazirliynin İncəsənət şöbəsinin musiqi sektorunun müdiri Fərəh Əliyeva Səmərqənd festivalı haqqındakı təəssüratlarını bizimlə bölüşdü:

- Gənclərimizin beynəlxalq miqyaslı festivallarda iştirakını təmin etmək, onların bu sahədə təcrübəsini artırmaq, ümumdünya tədbirlərinə qoşmaq, geniş təcrübə mübadiləsi aparmaq üçün bu dəfə qərara alındı ki, festvala göndəriləcək musiqiçilər yalnız gənclər olsunlar. Musiqisevərlər onları artıq yaxşı tanıyırlar, muğam müsabiqəsinin iştirakçıları - Arzu Əliyeva və Babək Niftəliyev. Qeyd edim ki, Arzu Əliyeva, ümumiyyətlə, festivalın ən gənc ıştirakçısı idi. Müsabiqənin proqramında Arzu Əliyeva "Şahnaz" təsnifini, Babək Niftəliyev isə "Simayi-şəms" müğamını ifa etdilər. Onları əməkdar artistlər Zamiq Əliyev (tar) və Mirnazim Əsədullayev (kamança) müşayiət edirdilər. Festival çox təntənəli şəraitdə keçdi. Həm də bu festival Səmərqəndin 2750 illik yubileyinin qeyd olunması ilə eyni vaxta təsadüf edirdi. YUNESKO-nun təşkilatçılığı ilə dövlət səviyyəsində təşkil olunmuş tədbirə 50-yə yaxın xarici ölkədən 300 nəfər iştirakçı dəvət olunmuşdu. YUNESKO-nun vəzifəli nümayəndələri də Festivalın işinə qatılmışdılar. Festivalın təntənəli açılışı Özbəkistanın prezidenti İslam Kərimov tərəfindən oldu. Konsertlər Registan tarixi-memarlıq kompleksinin möhtəşəm açıq meydanında keçirilirdi. Münsiflər heyətinə tanınmış ifaçılarla yanaşı, bir sıra beynəlxalq festivalların direktorları da dəvət olunmuşdular. Münsiflər heyətinin sədri Pekin Konservatoriyasının rektoru, professor Tin Teiilin idi. Digər üzvlər isə İran, Küveyt, İtaliya, Belçika, Özbəkistan, Böyük Britaniya və Mərakeşdən dəvət olunmuş nümayəndələrdən ibarət idi.

Festival çərçivəsində keçirilən konsertlərdən əlavə, bütün ölkələrdən gələn musiqiçilər Səmərqəndin müxtəlif yerlərində quraşdırılmış açıq səhnələrdə hər gün konsertlər verirdilər. Axşam saat 7-dən başlayan konsertlər gecə 10-11-ə qədər davam edirdi. Azərbaycan musiqiçiləri də Səmərqəndin mərkəzində yerləşən gözəl Yeşilik parkında quraşdırılmış səhnədə çıxış etdilər. Onlarla birlikdə Əfqanıstan, Qazaxıstan, Tükmənistan musiqiçiləri müxtəlif ifalar edirdilər. Bundan başqa onlar Səmərqəndin yaxınlığındakı Canbul rayonunda da rəngarəng konsert proqramı ilə Azərbaycanı tərənnüm etdilər. Gənc ifaçılarımız YUNESKO-nun xüsusi mükafatı - "Xalq musiqisinin ən yaxşı ifasına görə" mükafatı ilə təltif olundular. Qeyd etmək lazımdır ki, münsiflər heyətinin üzvləri də bizim gənclərimizin ifa texnikasını, kamil ifa tərzlərini xüsusi qeyd etdilər. Onu da qeyd edim ki, orada Azərbaycan musiqisini çox sevirlər. Bizim ifaçıların çıxışlarını izləyir, nə vaxt, harda çıxış edəcəklərini əvvəlcədən öyrənirdilər! Bu dəfə Qran-pri Küveyt musiqiçilərinə verildi. Müvafiq olaraq, I, II, III yerlər Koreya, Keniya, Vyetnam, Ukrayna, Misir musiqiçiləri arasında bölüşdürüldü. Baş mükafatları hər dəfə Azərbaycan və Özbəkistanlılar qazandıqlarına görə, bu dəfə qərara alındı ki, mükafatların coğrafiyasını dəyişsinlər. Və keçən festivallarda qalib olmuş ölkələrin nümayəndələri artıq başqa mükafatlarla mükafatlandırıldılar. Qeyd edim ki, konfrans çərçivəsində dəyirmi masa keçirildi. Konfransı Özbəkistanın Mədəniyyət və İdman naziri açdı. Dəyirmi masada fikir mübadiləsi zamanı təklif olundu ki, festivalda təkcə Özbəkistandan deyil, başqa ölkələrdən gəlmiş tanınmış ifaçıların konsertləri də keçirilsin.

Fərəh xanım xüsusi vurğu ilə qeyd etdi ki, konsertlərdən sonra da lap səhərə qədər bütün musiqiçilər açıq havada yığışıb birlikdə çıxışlar edirdilər. Bir də görürdün ki, vahid bir ifa, vahid bir ansambl yarandı.

Mədəniyyət.- 2007.- 7 sentyabr.- S. 2.