Zümrüd

Səfiəddin Urməvi və Əbdülqadir Marağayinin musiqiləri bərpa edilib

İndiyə qədər ən qədim alət istifadəyə verilib

XII, XIII və XIV əsrlərə aid olan qədim mahnıları repertuarına daxil edən Qədim Musiqi Alətləri Ansamblı bu dəfə tariximizin daha sonrakı mərhələlərində ərsəyə gələn musiqilərə ruh verəcək. Mədəniyyətimizin tarixini yaşadan musiqi ansamblı hazırda yeni laylhənin hazırlıqlarına başlayıb. Kollektivin rəhbəri Məcnun Kərimovun məlumatına görə, orta əsrlərdə bəstələnən və bu günümüzə qədər gəlib çata bilməyən musiqilərin əksəriyyəti artıq ansamblın repertuarına daxil edilib. Ansambl rəhbəri əlavə edib ki, həmin musiqilər arasında daha çox musiqişünas Səfiəddin Urməvi və Əbdülqadir Marağayi tərəfindən yaradılan bəstələr üstünlük təşkil edir. Eyni zamanda, Qədim Musiqi Alətləri Ansamblının repertuarını daha sonrakı dövrlərin musiqiləri bəzəyəcək. M.Kərimovun sözlərinə görə, bu işdə onlara Türkiyədə yaşayan həmyerlimiz Sürəyya Ağayeva kömək edəcək: "Azərbaycan bəstəkarlarının o dövrlərə aid əsərləri Türkiyədə qorunub saxlanıldığından həmin musiqilər Sürəyya Ağayevanın köməyi ilə Bakıya gətiriləcək".

Xatırladaq ki, Musiqi Mədəniyyəti Dövlət Muzeyinin nəzdində fəaliyyət göstərən Qədim Musiqi Alətləri Ansamblı qədim alətlərin bərpasını da davam etdirir. Ansamblın bədii rəhbərinin sözlərinə görə, hazırda iki çoxsimli musiqi aləti üzərində iş aparılır: "Çoxdandır bərpasına başlanan Nuşhə adlı alətin nəhayət, bu il hazır olacağı nəzərdə tutulub. Cəng və Qanun alətinin sintezindən icad olunan Nuşhənin təqdimatından sonra laboratoriyada Huçni alətinin bərpasına başlanacaq".

Qeyd edək ki, qədim musiqi alətlərinin bərpası laboratoriyasında bu günə qədər 10 qədim alət bərpa olunaraq, ansamblın istifadəsinə verilib.

Səs.- 2007.- 18 sentyabr.- S. 12.