Üzeyir Hacıbəyovun ev-muzeyinin yeni korpusunun açılışı olmuşdur

Sentyabrın 18-də görkəmli Azərbaycan bəstəkarı Üzeyir Hacıbəyovun ev-muzeyinin yeni korpusunun açılışı olmuşdur.
Açılış mərasimində çıxış edən mədəniyyət və turizm naziri Əbülfəs Qarayev demişdir ki, dahi bəstəkarın ev-muzeyi vaxtilə ümummilli lider Heydər Əliyevin təşəbbüsü ilə açılmışdı. Bu gün isə Azərbaycan Prezidenti İlham Əliyevin sərəncamına müvafiq olaraq muzeyin yeni korpusu açılır. Nazir yeni korpusun tikintisini Üzeyir Hacıbəyovun ad gününə qədər başa çatdırmaq üçün səylə çalışdıqlarına görə "Altıncı mərtəbə" şirkətinin inşaatçılarına təşəkkürünü bildirmişdir.
Ə. Qarayev demişdir: Bu gün Azərbaycan mədəniyyətini Üzeyir Hacıbəyovsuz təsəvvür etmək çətindir. Biz hər gün onun musiqisi ilə yaşayırıq. Lakin onun sənətini xaricdə də təbliğ etmək zəruridir. Bu işlə alimlər, tədqiqatçılar, musiqiçilər məşğul olmalıdır. Bu dahi bəstəkarın bütün dünyada daha yaxşı tanınması üçün lazım olan hər şeyi etməliyik.
Gələn il sanballı elmi-tədqiqat konfransının keçirilməsi planlaşdırıldığını deyən Ə.Qarayev əmin olduğunu bildirmişdir ki, muzeyin yeni korpusunun açılması, burada elmi-tədqiqat mərkəzinin yerləşməsi həmin foruma daha yaxşı hazırlaşmağa imkan verəcəkdir.
Nazir mərasimin bütün iştirakçılarını Milli Musiqi Günü və muzeyin yeni korpusunun açılışı münasibətilə təbrik etmişdir.
Respublika Yazıçılar Birliyinin sədri, xalq yazıçısı Anar çıxışında demişdir ki, Üzeyir Hacıbəyov öz yaradıcılığında Azərbaycan xalqına xas olan bütün keyfiyyətləri əks etdirmişdir. Belə ki, "Leyli və Məcnun" operası bu xalqın sevgi iztirablarını, "Koroğlu" qəhrəmanlığını, "Arşın mal alan" hazırcavablığını və həyatsevərliyini tərənnüm edir. Buna görə də Azərbaycan xalqı yaşadıqca Üzeyir Hacıbəyovun musiqisi də yaşayacaqdır.
Bəstəkarlar İttifaqının sədri Firəngiz Əlizadə, ev-muzeyin direktoru Sərdar Fərəcov Üzeyir Hacıbəyovun yaradıcılığının öyrənilməsi üçün müvafiq şərait yaradılmasına kömək edənlərin hamısına təşəkkürlərini bildirmiş, mərasim iştirakçılarını Milli Musiqi Günü münasibətilə təbrik etmişlər.
Sonra qırmızı lent kəsilmiş və mərasim iştirakçıları dahi Üzeyir Hacıbəyovun musiqisinin sədaları altında yeni korpusa tamaşa etmişlər.

Azərbaycan.-2007.-19 sentyabr.-S.6.