Bahar

Teatrlar is başındadır...

Paytaxt teatrları tamaşacıları hansı tamaşalarla salamlayacaq?

Sentyabrın ilk ongünlüyü geridə qaldı. İki aydan çoxdur ki, aktyor nəfəsi gəlməyən teatrlarda canlanma yaranıb. Bu saat hansı bir teatra telefon edib, hansısa bir aktyoru axtarsan, verilən cavab eyni olacaq: "Məşqdədir, 3 saatdan sonra zəng edin". Görəsən, aktyor və rejissorlarımız hansı əsərin məşq prosesindədir? Teatrlar yeni mövsümdə tamaşaçıları hansı tamaşa ilə salamlayacaq?

Elə bu sualla da üz tutduq şəhərimizin teatrlarına. Araşdırma zamanı məlum oldu ki, paytaxt teatrlarının hər biri istirahətdən qayıdıb. Sənət adamlarının harada və necə dincəlməsindən xəbər tutmasaq da, onların təqdim edəcəkləri rolları və tamaşaları barədə məlumatlandıq.

Azərbaycan Dövlət Filarmoniyası sentyabrın sonuna kimi qonaq-qaralı olacaq. Filarmoniyanın direktor müavini Mövlud Ocaqovun verdiyi məlumata görə, bu mədəniyyət ocağı yeni mövsümünü sentyabrın 1-i açıb. Sentyabrın 26-da dirijor Vladimir Runçak, solist Yozef Erminin iştirakı ilə gözəl bir gecə düzənlənəcək. Sentyabrın 29-da isə Filarmoniyanın səhnəsi yenidən almaniyalı qonaqların ixtiyarına veriləcək. Teymur Göyçayevin iştirakı ilə Emin Məmmədov öz ifası ilə pərəstişkarlarını musiqiyə qonaq edəcək. Filarmoniyanın direktor müavini onu da qeyd etdi ki, bu mövsümdə tanınmış muğam ifaçılarının da solo-konsertləri nəzərdə tutulub. Amma onların konsertinin vaxtları oktyabr ayında bəlli olacaq.

Həmişəki ənənələrinə sadiq qalan Muğam Teatrı da sentyabrın 1-dən iş başındadır. Teatrın direktoru və baş rejissoru Arif Qazıyevin sözlərinə görə, sözügedən mədəniyyət ocağı bu mövsümdə yeni layihələrlə çıxış edəcək: "Rəhbərlik etdiyim teatr yarandığı gündən həmişə işgüzarlığı ilə fərqlənib. Hazırda istirahətdən qayıtmışıq. Teatrın yeni proqramı da demək olar ki, hazırdır. İndi keçirəcəyimiz ilk gecəyə hazırlıq işləri gedir". Qeyd edək ki, Muğam Teatrının ilk gecəsi dünyasını dəyişmiş sənət adamlarından birinə - Mirvari Dilbaziyə həsr olunacaq. Gecədə mərhumun sənət dostları da iştirak edəcəklər. Müğənnilər isə onun sözlərinə yazılan mahnıları səsləndirəcəklər.

Musiqili Komediya Teatrının yaradıcı kollektivi də məşq edir. Marat Haqverdiyev və Ramiz Mirişlinin "Qısqanc ürəklər" tamaşası dünən bütün teatrsevərləri bir araya yığdı. Qeyd edək ki, sözügedən teatr yola saldığı mövsümü də bu tamaşa ilə bağlamışdı. Teatrın aparıcı aktyoru Novruz Qartalın sözlərinə görə, “Qısqanc ürəklər”lə mövsümü açan kollektiv daha məsuliyyətlə çalışacaq. Aktyor onu da bildirdi ki, teatr mövsümü açar-açmaz növbəti tamaşanın təqdimatı üçün hərbi hissələrə yola düşəcək.

Repertuarına görə bütün teatrlardan fərqlənən Bakı Bələdiyyə Teatrında da qızğın məşqlər gedir. Teatrın direktoru Amaliya Pənahovanın sözlərinə görə, rəhbərlik etdiyi yaradıcı heyət bu mövsümdə tamaşaçılarını Abdulla Qurbaninin "Türk sancağı" ilə salamlayacaq. Qeyd edək ki, teatrsevərlər bu tamaşaya dünən baxdılar. Direktor bildirdi ki, bu mövsümdə Bələdiyyə Teatrı repertuarını daha da genişləndirmək fikrindədir. Amaliya xanım dedi ki, Xalid Əlimirzəyevin "Daşa dönmüş ürəklər" adlı əsərinin məşqləri isə artıq yekunlaşmaq üzrədir. Qeyd edək ki, sözügedən tamaşa sentyabrın sonlarında təqdim olunacaq.

Bir ildən yuxarıdır ki, təmirə dayanan Gənc Tamaşaçılar Teatrı da teatrsevərləri sevindirmək fikrindədir. İstirahətdən yenicə qayıdan teatr yeni mövsümünü sentyabrın ikinci ongünlüyü açacaq. Teatr bu dəfə izləyicilərini "Tıq-tıq xanım" tamaşası ilə salamlayacaq. Tamaşanın quruluşçu rejissoru Ağaxan Salmanlıdır.

Abdulla Şaiq adına Kukla Teatrının yaradıcı kollektivi isə xatirə gecəsinə hazırlaşır. Teatr budəfəki mövsüm açılışını mərhum sənətkarımız, balacaların sevimlisi Ələkbər Hüseynova həsr edəcək. Teatrın direktoru Rəhman Quliyevin sözlərinə görə, xatirə gecəsi "Körpəm" teatrında keçiriləcək. "Bremen musiqiçiləri" adlı tamaşa mərhumun sonuncu dəfə quruluş verdiyi əsərdir. Mərhumun yaradıcılığına biganə qalmayan teatr heyəti bu təqdimatdan sonra yeni əsərlərin məşqlərinə başlayacaq.

Bütün mövsümlərdə Opera və Balet Teatrı tamaşaçılarını dahi bəstəkar Üzeyir Hacıbəyovun şah əsəri sayılan “Leyli və Məcnun”la salamlayıb. Amma deyəsən, teatr rəhbərliyi bu dəfə ənənəni pozmaq fikrindədir. Teatrın mətbuat xidmətinin rəhbəri Şükufə Ağamirzəyevanın sözlərinə görə, yeni mövsümdə onlar tamaşaçılarını "Koroğlu" operası ilə salamlayacaq. Qeyd edək ki, tamaşada baş rolda Ülvi Qılınc oynayacaq.

Rusdilli tamaşaçıların həsrətlə gözlədiyi Səməd Vurğun adına Rus Dram Teatrı da istirahətdən qayıdıb. Teatrda aparılan təmir işləri hələ başa çatmadığından yaradıcı heyət tamaşaçıları ilə başqa teatrın səhnəsində görüşəcək. Məhz bu səbəbdən mövsümü hansı tamaşa ilə açacaqlarına qərar verməyiblər. Amma teatrdan bildirdilər ki, rusdilli tamaşaçılar bu il bir neçə əsərin premyerasına baxa biləcəklər.

Rəşid Behbudov adına Mahnı Teatrında isə bəzək işləri ilə ələqədar olaraq təmir aparılır. Məhz bu səbəbdən teatrın repertuarı dəqiqləşməyib. Teatrın yaradıcı kollektivi yeni mövsümünü sentyabrın 10-u açsa da, bu ayın sonuna kimi hansısa tədbirin keçirilməsi gözlənilmir.

Reytinq.- 2007.- 16 sentyabr.- S. 17.