Səlimqızı C.

135-ci mövsum

Teatrlar qapılarını tamaşaçıların üzünə açdı

Yay fəsliylə əlaqədar pərdələrini salan paytaxt teatrları yenidən qapılarını tamaşaçıların üzünə açıb. Bəziləri köhnə, bəzilərisə yeni tamaşalarla sənətsevərlərin pişvazına çıxıb.

Akademik Milli Dram Teatrı 2007-2008-ci teatr mövsümünü sentyabrın 14-də Füzuli meydanında təmtəraqlı bayram festivalıyla qeyd edib. Ölkənin bütün teatr kollektivlərinin qatıldığı bayram şənliyi tanınmış müğənnilərin çıxışları, eləcə də aktyorların səhnəcikləri ilə müşayiət olunub.

Teatr 135-ci mövsümünün ilk - «Hökmdar və qızı» tamaşasını elə sentyabrın 15-i axşam saat 19.00-da təqdim edib. Qeyd edək ki, teatr uzun illərdir ki, yeni mövsümdə pərdələrini məhz həmin tamaşa ilə qaldırır. Dramaturq İlyas Əfəndiyevin eyni adlı əsəri əsasında hazırlanan «Hökmdar və qızı» Mərahim Fərzəlibəyovun rejissor yozumunun məhsuludur. Tamaşanın rəssamı İsmayıl Məmmədovdur. Əsas rollarda xalq artistləri Bəsti Cəfərova, Ramiz Məlik, Rafiq Əzimov, əməkdar artistlər Kazım Abdullayev, Sabir Məmmədov iştirak edirlər. Şıxəli Qurbanov adına Musiqili Komediya Teatrı da yeni teatr mövsümünün açılışını sentyabrın 15-də edib və pərdələrini «Qısqanc ürəklər» tamaşasıyla açıb. Yusif Əkbərovun quruluş verdiyi tamaşada əsas rollar xalq artisti Xanım Qafarovaya, Çingiz Əhmədova və başqalarına məxsusdur. Tamaşa ötən mövsümün sonlarında təhvii verilib.

Paytaxt teatrlarından qabağa düşüb ən tez mövsümü açanlardan biri də Dövlət Gənclər Teatrı olub. Belə ki, teatrın yaradıcı kollektivi sentyabrın 15-i tamaşaçılarını başına toplayaraq onlara «Dünyanın axırı» tamaşasını təqdim edib.

«Yuğ» Teatrı da sentyabrın 15-i tamaşaçılarını Kamal Abdullanın «İstintaq» əsəri əsasında hazırlanan eyni adlı tamaşa ilə salamlayıb. Vaqif İbrahimoğlunun quruluş verdiyi «İstintaq»da teatrın aparıcı aktyorları rol alıblar. Qeyd edək ki, «Yuğ» Estoniyanın «Uqala» Teatrı ilə birgə hazırladığı «Kim dedi ki, simurq quşu var imiş» adlı tamaşanın premyerasına da hazırlaşır. Tamaşa sentyabrın 29-u Estoniyada baş tutacaq.

Akademik Opera və Balet Teatrı 99-cu teatr mövsümünün açılışını bu gün - sentyabrın 18-i dahi Üzeyir Hacıbəyovun doğum günündə gerçəkləşdirəcək. Ölməz bəstəkarın xatirəsinə ehtiram əlaməti olaraq teatr mövsümü milli opera sənətimizin ən dəyərli nümunələrindən biri olan «Koroğlu» operasının tamaşası ilə açacaq. Fəaliyyətində hər zaman yeniliklərə can atan Opera Teatrı bu dəfə də mövsümün açılışını əsl bayrama çevirməyə hazırlaşır. Həm də axı 18 sentyabr - Üzeyir Musiqi Gününə təsadüf edir. Tamaşada ilk dəfə olaraq Koroğlu partiyasını teatrın gənc solisti, əməkdar artist Samir Cəfərov ifa edəcək. Digər əsas partiyalardan biri - Nigar rolu isə gənc vokalçı İlahə Əfəndiyevaya həvalə olunub.

Dövlət Pantomim Teatrı pərəstişkarlarını sentyabrın 22-də sevindirəcək. Həmin gün saat 19.00-da yaradıcı heyət «Maska» tamaşasını təqdim edəcək. Bəxtiyar Xanızadənin quruluş verdiyi tamaşada Nargilə Qəribova, Məmmədrza Pərviz, Elnur İsmayılov çıxış edəcəklər. Qeyd edək ki, hazırda keçmiş «Şəfəq» kinoteatrında məskunlaşan teatr binanın təmirə ehtiyacı olduğundan mövsümün ilk tamaşasını uşaq teatrında göstərməli olacaq.

Mərkəz.- 2007.- 18 sentyabr.- S. 11.