Məhərrəmova T.

İnsanlara əsl sənət göstərmək lazımdır

Vəfa Rzayeva, aktrisa: "Lap gözəl səsim də olsa, mahnı oxumaram"

Əksər sənət adamları - xüsusən müğənnilər, aktyor və aktrisalar çox vaxt müsahibələrində daha çox olub-keçənlərdən danışmağı sevir, gələcək planlarını sirr saxlamağa çalışırlar. Səbəbini isə gözə gəlməkdən daha çox, kiminsə tərəfindən yaranacaq maneələrlə izah edirlər. Akademik Milli Dram Teatrın aktrisası Vəfa Rzayeva (Zeynalova) da adətən dəvət aldığı təklifləri reallaşana qədər sirr saxladığını deyir. Səbəbinin isə çox sadə izahı var: "Məndə elə xüsusiyyət var ki, qabaqcadan heç nə danışmıram, deyəndə alınmaya bilər".

Ona görə də aktrisa bizimlə söhbətinə artıq gerçəkləşməkdə olan planlarından başladı:

- ANS televiziyasının "Bakı" studiyası tərəfindən çəkilən "Qızlar" filmində baş rolda - Yazıçı-yurnalist rolunda oynayıram. Film yaxınlarda başa çatacaq. Vaxtilə Az.TV-də yayımlanan "Səhər görüşləri" verilişi də yenidən bərpa olunub. Mənimlə Ramiz Əzizbəyli həmin verilişin aparıcısı olacaq. Məhərrəm Bədirzadənin quruluşçu reyissoru olduğu bu verilişin hər ayın 23-də ekrana çıxması planlaşdırılır. Eyni zamanda, Məhərrəm Bədirzadənin "Qu rəqsi" telefilmində çəkilmişəm. Bu film də ayın axırında ekranlara çıxacaq.

- İki il bundan qabaq Türkiyədə teleseriala çəkilirdiniz. Bir ara işlərinizin çoxluğundan Bakıya qayıtdığınızı, filmi yarıda qoyduğunuzu deyirdiniz. Nəticəsi necə oldu?

- Türkiyədə "Ağa qızı" adlı teleserialda çəkilmişəm. Həmin film 13 seriyadan ibarət idi. İşlərimin çoxluğundan və ailəm üçün darıxdığımdan filmin tamamlanmasını gözləmədən Bakıya qayıtmalı oldum. Artıq həmin film "Kanal D" vasitəsilə göstərilib. İndi isə Türkiyədə çəkiləcək iki seriyalı və şərti adı "Trio" olan yeni filmə dəvət almışam. Çəkilişlər avqust ayına planlaşdırılmışdı. Ancaq mənimlə tərəf-müqabil olacaq Hollivud aktyoru Mark Bakassinin işlərinin çoxluğundan film yubanır. Çəkilişlər başlayanda onlar məni dəvət edəcəklər.

- Bəs bu dəfə teatrdakı işləriniz və ailə qayğılarınız çəkilişlərə mane olmayacaqmı?

- Filmi çəkəcək "Çətin reklam" şirkəti ilə razılığa əsasən, ancaq öz bölümlərimdə çəkilməyə gedəcəyəm. Seriala başqa ölkələrdən də aktyorlar dəvət alıb. Artıq şirkət görüntülərin təqdimatını keçirib. Teatrda işlərim çox olduğu üçün təqdimatda iştirak edə bilmədim. Çəkilişlərə isə təbii ki, gedəcəyəm. Bu, işin çoxluğuna baxmır.

- Sizi həm İrəvan Teatrının, həm də "Azdrama"nın səhnəsində görmək olur. Gerçəkdə hansı teatrın aktrisasısınız?

- Elə əvvəldən Akademik Milli Dram Teatrının aktrisası olmuşam. İrəvan Teatrına isə məni İftixar Piriyev Hidayət Orucovun əsəri əsasında hazırlanan tamaşanı oynamağa dəvət etmişdi. Mən də gedib oynadım. Tamaşa bir neçə dəfə göstərildi. Çox yaxşı da qarşılandı. Onu da deyim ki, bu tamaşaya məşqlərin başa çatmasına 10 gün qalmış gəlmişəm. Artıq həmin rola dublyor tapıldığı üçün daha mən o teatra getmirəm, obrazı da başqası oynayır.

- İlk dəfə səhnəsinə çıxdığınız Pantomim Teatrına dəvət alırsınızmı?

- Əvvəllər bir az Pantomim Teatrında çalışmışam. İlk rolum "Leyli və Məcnun" pantomim baletində Leyli obrazı olub. Bu tamaşa "Bayatı-Şiraz" üstündə qurulub. Hər dəfə "Bayatı-Şiraz" eşidilən kimi həmin obraz gözlərimin qarşısına gəlir. Üstündən 12 il keçir. Daha həmin rolu oynamıram. Amma o obrazı unuda bilmirəm. Pantomim Teatrı mənimçün ilk məktəb olub. Həmin məktəbə çox borcluyam. Ümumiyyətlə, hər bir aktrisa üçün ilk dəfə çıxdığı səhnə həmişə doğma olur. Ancaq mən artıq "Azdrama"nın aktrisasıyam.

- Pantomim Teatrından söz düşmüşkən, necə bilirsiniz, səhnədə hərəkətlə söz demək asandır, yoxsa fikirlərini yalnız sözlə ifadə eləmək?

- Pantomim Teatrında işləmək çox çətindir. Hansısa ifadəni, məsələn, "get" sözünü deyib, üzünü çevirirsənsə, pantomimdə bu sözü hərəkətlə ifadə etmək üçün bütün sifət cizgilərin işləyir. Pantomim Teatrının adi səhnədən yerlə göy qədər fərqi var. Mənə elə gəlir ki, əvvəlkinə nisbətən pantomimə daha çox maraq oyanıb. Belə deyək, əvvəl qəbul edən az idi. Get-gedə bu çoxalır, o teatrın inkişafı da yüksəlir.

- Sizi səhnədən fərqli olaraq, həyatda sifət cizgilərinizlə başa düşən adamlar çoxdurmu?

- Mənimçün bu suala cavab vermək çox çətindir. Bilirsinizmi, məni başa düşənlər müəyyən qədər var. Mənə elə gəlir ki, bütün insanlarda bu tarazlıq pozulub. Heç kəs bir-birini tam mənada başa düşmür, hardasa anlaşılmazlıq olur.

- Bu gün sizə həvalə edilən obrazlardan razısınızmı? Çox aktrisalar narazılıq edərək daha ağır "yük" qaldırmağa layiq olduqlarını bildirirlər.

- Rollarımdan narazı deyiləm. Ümumiyyətlə, rolun böyük və ya kiçik olmasının mənimçün fərqi yoxdur. Həmişə öz rolumun öhtəsindən gəlirəm. Əsas odur ki, rol ürəyincə olsun. "Hələ sevirəm deməmişlər" tamaşasında xırda bir rolu - Erməni qızını oynayıram. Ancaq həmin rol ürəyimcədir. Rol kiçik də, böyük də olsa, sözünü deməyi bacarmalısan. Ona görə də heç vaxt şikayətlənmirəm.

- Bu səhnəyə gəlişiniz Musiqili Komediya Teatrında oynamaq arzunuzu tamamilə məhv elədimi? Ümumiyyətlə, həmin səhnənin aktrisası olmaq üçün lazım olan keyfiyyətlər sizdə vardırmı?

- "Muskomediya"da səsləri olanlar oxumalıdır. Həmin fakültədə rəfiqəm Sevda Ələkbərzadə oxuduğu üçün ondan ayrılmayım deyə, o fakültəyə getmişdim. Bəlkə də "Muskomediya"ya getmək mənim tərəfimdən ağılsızlıq idi. Musiqini çox sevirəm, amma elə bir səviyyədə səsim yoxdur ki, "Muskomediya" aktyoru olum. Dram-kinoda işləmək o deyil ki, sırf dramla məşğul olacaqsan. "Muskomediya"da işləmək üçünsə ilk növbədə səs olmalıdır ki, hansısa lazım olan tamaşada səsindən istədiyin kimi istifadə edəsən. Mən Həsən Turabovun təklifindən sonra yerimi dəyişdim. "Azdrama"nın səhnəsinə o qədər öyrəşmişəm ki, oranı doğma evim bilirəm. Ümumiyyətlə, iş yeri insanın ikinci evidir. Ailədə olduğu kimi orada da səmimiyyət olmalıdır. Evdən işə gedəndə ürək dolusu sevinclə getdiyin kimi, işdən evə də elə qayıtmalısan.

- İndiki zamanda alababat səsi olan da, olmayan da oxuyur. Siz azca da olsa səsiniz ola-ola niyə yararlanmırsınız?

- Mən elə şeylərə pis baxıram. Səsi olmayan oxuyanda, klip çəkdirəndə, bir tamaşaçı kimi kanalı dəyişirəm. Müəyyən qədər hirslənirəm də. Hərdən məndən soruşurlar ki, bəs sən niyə mahnı oxumursan? Deyirəm ki, lap gözəl səsim də olsa, mahnı oxumaram. Çünki indi mahnı oxumağa "tələbat" yaman çoxalıb. Hamı mahnı oxumağa qaçır. Mən bunu sənət saymıram. Oxumaq səsi olanlar üçün gözəl sənətdir. Hər yerindən duranın oxumağını isə pis qarşılayıram. İnsanlara əsl sənət göstərmək lazımdır. Tamaşaçını aldatmaq olmaz. Hansı sahədə çalışırsansa, ora ilk növbədə sənət kimi yanaşmalısan, sonra qazanc mənbəyi kimi.

- Bir dəfə Cülyettanı oynamaq istədiyinizi demişdiniz. Sizi bu obraza yaxınlaşdıran nədir?

- Bilmirəm... Təkcə onu bilirəm ki, bu rolu çox sevirəm. Bu rolda elə nüanslar var ki, sözünü deyə bilərsən. Amma 2 il keçəndən sonra bu rolu mənə versələr, oynamaram. 40 yaşında 18 yaşlı Cülyetta olmaq istəmərəm. Həmişə buna pis baxmışam.

- Bir müsahibənizdə də ifritə rolları oynamaq istədiyinizi demişdiniz. Bu arzunuza çatdınızmı?

- Düzdür, belə bir söz demişəm. "Hələ sevirəm deməmişlər" tamaşasında Erməni qızı obrazı bu rola yaxındır. Bu qız kəndli qızı idi, ancaq sonradan dəyişir. Həyat yoldaşının ata-anasını saymamağa başlayır, bir növ ifritələşir. İnstitutda oxuyanda da kurs tamaşasında həyasız, ifritə gəlin rolunu oynayırdım. O gəlin qayınanası, baldızları ilə yola getmir, aləmi bir-birinə qatırdı. Həmin roldan çox xoşum gəlirdi.

- Adətən sizinlə görüşüb müsahibə götürmək istəyəndə sorağınızı daha çox çalışdığınız gözəllik salonundan almaq mümkündür. Hansı işinizi daha önəmli sayırsınız?

- Hər ikisi önəmlidir. İnsanın daxili isə daha öndədir. Gözəllik salonunda ancaq qadınlarla məşğul oluruq. Onları zahirən gözəlləşdirməyə çalışırıq. Teatr salonunda isə qocası da, cavanı da, kişisi də, qadını da var. Burada hərə bir şey görür və özünü düzgünlüyə qaytarırsa, bundan gözəl nə ola bilər? Mənə elə gəlir ki, daxili gözəlliklə zahiri gözəllik bir-birini tamamlayanda daha yaxşı olur. İnsanın daxili ziyası zahirini də işıqlandırır. Həmişə demişəm: bu sənəti də sevirəm, o sənəti də. Hələ instituta qəbul olmamışdan orada çalışıram. O sənəti ata bilmirəm. Demirəm ki, vaxtımı sırf ona sərf edirəm. Yox, vaxtım olanda məşğul oluram. Mən bu sənətdən zövq alıram. Həmişə demişəm ki, 1-ci sənətim aktrisalıqdır və o, gözəllik salonunda işləməyimə mane ola bilməz. Aktrisalığı o sənətimə qurban vermərəm, ondan isə lazım gəlsə əl çəkə bilərəm. Hələlik isə gözəllik ustası işləməyim səhnədəki işimə mane olmur.

- Bu gün yeni teatr mövsümü açılır. Yəqin ki, yeni rollar ümidindəsiniz?

- Akademik Milli Dram Teatrı builki mövsümü də ənənəvi olaraq İlyas Əfəndiyevin "Hökmdar və qızı" tamaşası ilə açır. Həmin tamaşada mən hökmdarın kiçik qızını oynayıram. Bundan əlavə, bir sıra tamaşalarda yeni rollara dəvət almışam. Hələlik onlardan söhbət açmaq istəmirəm.

- Başınız həmişə işlə qarışıq olur. Dalbadal reklam, film çəkilişləri, teatrdakı rollarınız... Bəs özünüzü nə vaxt rahat hiss edirsiniz?

- Ancaq premyeradan sonra. Həmin gün elə bil aylarla yığılan yorğunluğun, əziyyətin çıxır. Salonda alqışları eşidəndə, sənə gül-çiçəklər bağışlananda, dərindən nəfəs alırsan. Sanki sənə bir anlığa sevinc göz yaşları gəlir. Onda zəhmətinin, əziyyətinin bəhrəsini hiss edirsən. Bundan gözəl hansı rahatlıq ola bilər?

Kaspi.-2007.-15-17 sentyabr.-S.23.