Cəvahir

«Arşınmalçı»nın Gülçöhrəsi bəyənildi

Tamasacılar arasında əcnəbilər coxluq təşkil edirdi

Sentyabrın 26-da Akademik Opera və Balet Teatrı sənətsevərlərə Üzeyir Hacıbəyovun «Arşın mal alan» operettasını təqdim etdi. Tamaşada tanınmış sənətkarlar Azər Zeynalov (Əsgər), Şahlar Quliyev (Süleyman), Yaşar Nuri (Soltan bəy), Gülyaz Məmmədova (Telli), Fidan Hacıyeva (Asiya) çıxış etdilər. Gənc vokalçı Aygün Zeynallı isə əsas partiya olan «Gülçöhrə» obrazı ilə səhnəyə çıxaraq debüt etdi.

Qeyd edək ki, Aygün Zeynallı Bakı Musiqi Akademiyasının məzunudur. Gənc vokalçı indiyədək filarmoniyada, «Üns» Yaradıcılıq Səhnəsində keçirilən konsertlərdə iştirak edib. Tamaşa ilə bağlı təəssüratlarımızı paylaşmazdan öncə qeyd edim ki, opera teatrının salonu ağzınacan dolu idi. Həmsöhbət olduğumuz tamaşaçılar buna səbəb kimi operettada tanınmış gülüş ustası Yaşar Nurinin çıxışını və ümumiyyətlə, zaman-zaman sevilən «Arşın mal alan» operettasına olan sonsuz marağı önə çəkdilər. Yeri gəlmişkən, onu da deyim ki, tamaşaçılar arasında əcnəbilər, xüsusilə, çoxluq təşkil edirdi. Teatrın mətbuat xidmətinin rəhbəri Şükufə Ağamirzəyeva bildirdi ki, əcnəbi tamaşaçılar opera səhnəsində göstərilən tamaşaların əksəriyyətinə tamaşa edirlər.

Tamaşaya gəlincə, Hafiz Quliyevin quruluşunda ərsəyə gələn «Arşın mal alan» tamaşaçılar tərəfindən yüksək səviyyədə qarşılandı. Bunu onların sürəkli alqışlarından duyduq.

Hər zaman olduğu kimi, Yaşar Nuri bu dəfə də publikanı elə ilk səhnədəcə ələ aldı. İfası daha çox bəyənilən iştirakçılardan biri də Fidan Hacıyeva idi. Asiya rolunu özünəməxsus şirinliklə canlandıran Fidan demək olar ki, səhnədə hər görüntüsü ilə alqışlandı. Solistin «Süleymani» rəqsinə isə bütün salon qoşulmuşdu. Gülçöhrə partiyasına gəlincə, səhnədə debütünü edən Aygün azacıq həyəcanlansa da, çətin və məsuliyyətli işin öhdəsindən gələ bildi. Səhnə arxasında təəssüratlarını paylaşarkən də həyəcanlı olduğunu gizlətmədi. O, Zemfira İsmayılova, Gülnaz İsmayılova və Natəvan İsmayılovadan sonra belə aparıcı partiyanı ona həvalə etdiyinə görə teatrın rəhbəri Akif Məlikova minnətdarlıq etdi: «Şəxsən mənim üçün Gülçöhrə partiyasını oynamaq böyük etimaddır. Çalışacağam etimadı doğruldum. Hər halda, son sözü tamaşaçı deyəcək».

Mərkəz.- 2007.- 28 sentyabr.- S. 11.