Qocayeva A.

"Qısqanc ürəklər"

Bu tamaşa ilə Musiqili Komediya Teatrı 98-ci mövsümünü açdı

Sentyabrın 15-də Azərbaycan Dövlət Musiqili Komediya Teatrının 98-ci mövsümünün təntənəli açılış mərasimi oldu.

Mərasim teatrın geniş və yaraşıqlı foyesində düzənlənmişdi. Teatrın binasına daxil olan qonaqlar ilk növbədə foye boyu təşkil olunmuş, bu teatrın 98 illik səhnə həyatının ayrı-ayrı fraqmentlərini əks etdirən fotosərgi və teatr kollektivi üzvlərinin nəfis şəkildə əl işlərindən ibarət yaradıcılıq sərgisi ilə üzləşdilər. Fotosərgidə teatrın inkişaf tarixində böyük xidmətləri olan aktyor və rejissorların oynadıqları, quruluş verdikləri tamaşalardan səhnələr öz əksini tapmışdı. Mərasim dahi Üzeyir bəyin əzəmətli musiqisi sədaları altında başladı. Tamaşaçılar foyenin ayrı-ayrı hissələrində teatrın xor kapellasının ifasında tamaşalardan musiqi parçalarını dinlədilər, aktyorların ifalarında tamaşalardan parçalara baxdılar, skripkaçıİarın ifalarında musiqilər dinlədilər.

Mərasimin ən maraqlı görüntülərindən biri əvvəldən axıracan aktyorların yaratdıqları personajların paltarlarında tamaşaçılara qarışaraq onlarla səmimi salamlaşıb görüşmələri, sənət haqqında diskusiyalar aparmaları və onlarla şəkillər çəkdirmələri oldu.

Mövsümün açılışında Mədəniyyət və Turizm nazirinin müavini Ədalət Vəliyev, teatrın direktoru Elxan Orucov, bəstəkar Ramiz Mirişli və digər tanınmış qonaqlar iştirak edirdilər.

Teatr öz mövsümünü Ramiz Mirişli və Marat Haqverdiyevin "Qısqanc ürəklər" tamaşasının nümayişi ilə açdı. Tamaşanın quruluşçu rejissoru Yusif Əkbərov, quruluşçu dirijoru Nazim Hacıəlibəyov, quruluşçu baletmeysterləri əməkdar rəssam Zakir Ağayev və Yelena Ağayeva, dirijoru Ziya Bağırov, xormeysteri əməkdar artist Vaqif Məstanov, rejissor asissenti Rəfiqə Bağırovadır. Tamaşanın baş dirijoru Nazim Hacıəlibəyovdur. Uğurla nümayiş olunan tamaşa alqışlarla qarşılandı. Tamaşa zalının dolu olması bir daha onu göstərdi ki, tamaşaçılar Musiqili Komediya Teatrının tamaşaları üçün darıxıblar və bu teatr onların ən çox sevdikləri bir məbəd olaraq qalır. Biz də teatrın direktoru Elxan Ocaqov başda olmaqla bütün kollektivi 98-ci mövsümün açılışı münasibətilə təbrik edir, onlara bu sənətdə daha böyük yaradıcılıq uğurları diləyirik.

İki sahil.- 2007.- 18 sentyabr.- S. 6.