Ruslana Mehriban Əliyeva ilə görüşüb

“Biz siyasətdən danışmadıq...”

Ukraynanın deputat-müğənnisi Ruslananın Bakıda sayca ikinci konserti baş tutdu. Konsert öncəsi media mənsubları ilə görüşən Ruslana “Azərbaycanlı tamaşaçılar qarşısında bir daha çıxış edəcəyim üçün çox xoşbəxtəm”- deyə söylədi.
“Natiq” ritm qrupu ilə eyni səhnəni paylaşacağından məmnunluq hissi keçirən Ruslana, deyəsən, onları yaman bəyənib: “Bu qrupun enerji dolu ifası məni olduqca valeh etdi”.

Mədəniyyət və turizm naziri Əbülfəs Qarayevlə görüşən Ruslana bu görüşün gələcəkdə hər iki ölkə arasında mədəniyyət sahəsində körpü rolunu oynayacağını bildirdi: “Mən Azərbaycanın birinci xanımı Mehriban Əliyeva ilə də görüşdüm. Biz söhbətimizdə siyasi məsələlərdən yox, iki ölkə arasındakı mədəni əlaqələrdən söz açdıq”.

Nəhayət, gözlənilən an gəlib çatdı. Qeyd edək ki, iş adamı Səlahəddin Atalayın təşkilatçılığı ilə düzənlənən konsert proqramı olduqca yüksək səviyyədə hazırlanmışdı. Səhnəyə çıxan Ruslana bir-birinin ardınca ən yeni mahnılarını ifa etməklə yanaşı həm də rəqs edirdi. “Natiq” ritm qrupunun müşayiəti ilə təşkil olunan konserti uğurlu saymaq olar.

Yeni Müsavat.-2007.- 4 sentyabr.-S.13.