AzərTAc
xəbər verir ki, Azərbaycan Respublikasının
"Kitab" Cəmiyyəti oktyabrın 9-dan 11-dək Moskvada
Rusiya Federasiyasının birinci xanımı Lyudmila
Putinanın təşəbbüsü ilə
keçiriləcək "Biblioobraz-2007" Beynəlxalq kitab
və qiraət festivalında nümayiş etdirilmək
üçün nəzərdə tutulmuş "Rusiya
Federasiyasının Prezidenti Vladimir Putinin Azərbaycana
rəsmi səfəri" miniatür kitabını rus
dilində nəşr etdirmişdir.
Cəmiyyətin sədri Zərifə
Salahova demişdir ki, tədbirdə ölkəmiz Heydər Əliyev Fondunun prezidenti, YUNESKO və İSESKO-nun xoşməramlı
səfiri, Milli Məclisin deputatı Mehriban xanım Əliyevanın başçılıq
etdiyi nümayəndə
heyəti ilə təmsil olunacaqdır. Festivala daha bir nəşr - Rusiya Federasiyası Prezidentinin 2006-cı ilin fevralında ölkəmizə işgüzar
səfərinə dair
miniatür kitab göndəriləcəkdir. Kitabın
çapı başa çatmaq üzrədir.
Birinci kitaba Rusiya Federasiyasının Prezidenti Vladimir Putinin 2001-ci il yanvarın 9-10-da Azərbaycana
rəsmi səfərindən
bəhs edən materiallar daxildir. Burada oxuculara yüksək qonağın xalqımızın
ümummilli lideri Heydər Əliyev tərəfindən aeroportda
təntənəli şəkildə
qarşılanması, Azərbaycan-Rusiya danışıqları,
Rusiya Prezidentinin şərəfinə "Gülüstan"
sarayında rəsmi qəbul, ona Bakı Slavyan Universitetinin fəxri doktoru diplomunun təqdim edilməsi, Azərbaycan və Rusiya prezidentlərinin
təkbətək görüşü
barədə rəsmi
materiallar təqdim olunmuşdur.
Nəfis şəkildə,
38x53 millimetr ölçüdə
"İndiqo" nəşriyyatında
çap edilmiş 400
səhifəlik bu miniatür kitabda 25 rəngli fotoşəkil verilmişdir. Supercildli kitabın forzasında Azərbaycan Respublikasının
xəritəsi diqqəti
cəlb edir.
Azərbaycan.- 2007.- 28 sentyabr.- S. 6.