Cavadov S.

Latın qrafikası ilə çap olunan kitablar məktəb və kitabxanalara çatdırılır

"Kitab bilik mənbəyidir", "Kitab insanın ən yaxın dostudur". Kitab haqqında bu kimi çoxlu sayda qiymətli sözlərə rast gəlmişik. Bir neçə il bundan əvvəl, xüsusilə gənc nəsil latın qrafikasına keçidlə bağlı kitab oxumaq, mütaliə etmək üçün müəyyən çətinliklər qarşısında qaldı. O zaman kifayət qədər dərsliklər belə yox idi.
Digər tərəfdən istər Azərbaycan, istərsə də dünya klassiklərinin əsərlərinin kirillə olması orta məktəb şagirdlərini və ali təhsil ocaqlarının tələbələrini problem qarşısında qoymuşdu. Yaranmış çətinliyin aradan qaldırılması ilə əlaqədar Respublika Prezidenti İlham Əliyev 12 noyabr 2004-cü il tarixdə "Azərbaycan dilində latın qrafikası ilə kütləvi nəşrlərin həyata keçirilməsi haqqında" sərəncam imzaladı.
Ölkə başçısının xeyirxah addımından sonra respublikamızın təhsil ocaqlarına latın qrafikası ilə çap olunan dərsliklər, bədii ədəbiyyat nümunələri göndərildi. Bütün kitabxanalar da həmin kitabları aldılar. Bu iş ardıcılıqla davam etdirilir.
Hacıqabul Rayon Təhsil Şöbəsi 2007-2008-ci dərs ili ilə əlaqədar 1-11-ci siniflər üzrə 35 min 302 nüsxə pulsuz dərsliklə təmin edilmişdir. Məktəb direktorlarının müşavirəsində dərsliklərin nömrələnməsi, hər bir şagirdə çatdırılması qərara alınmış və bu iş müvəffəqiyyətlə həyata keçirilmişdir. Dərsliklər kitabxana fonduna daxil edildikdən sonra siniflər arasında bölüşdürülmüşdür. Şagirdlərin hamısı bütün dərsliklərlə təmin olunmuşdur. Rayon təhsil şöbəsi latın qrafikası ilə bu il nəşr olunmuş 6 min 340 nüsxə bədii ədəbiyyat nümunəsi almış və məktəb kitabxanalarına çatdırmışdır. Rayon məktəblərində dərsliklərin və bədii kitabların qorunub saxlanılması daim diqqət mərkəzindədir. Bununla bağlı vaxtaşırı olaraq seminar-müşavirələr keçirilir.
Rayon mədəniyyət və turizm şöbəsinin xətti ilə də bu sahədə müəyyən işlər görülmüşdür. Hazırda Hacıqabulda 32 dövlət kütləvi kitabxanası fəaliyyət göstərir. Onlardan 1-i rayon mərkəzi, 1-i uşaq, 6-sı şəhər-qəsəbə və 24-ü kənd kitabxanalarıdır. Prezidentin İcra Aparatının xətti ilə rayona 2005-ci ildə 16 min 705, 2006-cı ildə 1332, 2007-ci ilin 9 ayında 6 min 500 ədəd latın qrafikası ilə çap edilmiş kitab verilmişdir. Bundan əlavə, respublika Mədəniyyət və Turizm Nazirliyi, habelə ayrı-ayrı yazıçı və şairlər tərəfindən rayona xeyli sayda kitablar göndərilmişdir.
Daxil olan ədəbiyyat nümunələri arasında dünya klassiklərindən V.Şekspir, V.Hüqo, T.Drayzer, E.Heminquey, L.Tolstoy, A.Puşkin, N.Hikmət, Azərbaycanın şair və yazıçılarından N.Gəncəvi, M.Füzuli, Ə.Xaqani, İ.Nəsimi, S.Ə.Şirvani, M.F.Axundov, C.Cabbarlı, S.Vurğun, H.Cavid, M.Müşfiq, S.Hüseyn, çağdaş ədəbiyyatımızın görkəmli nümayəndələri B. Vahabzadə, H.Arif, M.Araz, Ə.Cəfərzadə, Anar, Elçin, S.Rüstəmxanlı, H.Abbaszadə və başqalarının seçilmiş əsərləri vardır.

Azərbaycan.-2007.- 26 sentyabr.-S.7.