Mükərrəmoğlu M.

Azərbaycan kitablarının sorağı Çindən gəlir

Bu yaxınlarda Çin Xalq Respublikasında keçirilən XIV Beynəlxalq Kitab Sərgisində Azərbaycan kitabları da nümayiş olunurdu. Mədəniyyət və Turizm Nazirliyinin nəşriyyat sektorunun müdiri, şair Çingiz Əlioğlu da həmin sərgidə iştirak etmişdir. Onun sərgi ilə bağlı təəssüratlarını oxuculara çatdırırıq.
– Məlumat üçün bildirim ki, Pekin Beynəlxalq Kitab Sərgisi 1986-cı ildən keçirilir. Adı çəkilən sərgi bəzi ictimai-siyaaasi hadisələrlə əlaqədar müəyyən dövrlərdə keçirilməyib. Bu, 1986-cı ildən başlayaraq indiyə kimi keçirilən 14-cü sərgi idi. Pekin şəhərinin mərkəzində çox böyük ərazisi olan sərgi zalı dünyanın ən müxtəlif ölkələrinin – Böyük Britaniya, Amerika, Kanada, Almaniya, Fransa, İspaniya, İtaliya, İsveçrə, Yaponiya, Koreya, Səudiyyə Ərəbistanı, Yunanıstan, Polşa, Hindistan, İran İslam Respublikası, Özbəkistan, Tacikistan təmsilçilərinin ixtiyarına verilmişdi. Ümumilikdə bu ölkələrdən 500 adda nəşriyyat və nəşriyyat–poliqrafiya müəssisələrinin çap nümunələri nümayiş etdirilirdi. Sərginin daimi işləyən konfrans zalı var idi. Zalda bu ölkələrdən gələn ən məşhur yazıçılarla, bu gün bu və digər hadisələrin məziyyətlərinə görə dünya oxucu auditoriyasının diqqətini cəlb etmiş, oxucu marağına səbəb olmuş kitabların müəllifləri ilə görüşlər keçirilir, oxucular onları maraqlandıran ən müxtəlif suallarla müəlliflərə müraciət edib, cavablar ala bilirdilər. Eyni zamanda böyük ölkələrin ekspozisiyalarında ardıcıl olaraq oxucu konfransları keçirilirdi. Bu konfranslarda oxucular həmin ölkələrdə bu gün fəaliyyət göstərən tanınmış, dünya kitab çapında öndə gedən nəşr və çap müəssisələrinin əməkdaşları ilə görüşür, istehsal etdikləri çap məhsulları ilə tanış olur, gələcək perspektiv planları ilə maraqlanırdılar.
Pekin Beynəlxalq Kitab Sərgisi dünyanın, o cümlədən Şərqin böyük kitab forumudur. Azərbaycan sərgidə ilk dəfə idi ki, iştirak edirdi. Nəhəng bir ölkənin — yəni 1 milyard 300 milyon əhalisi olan Çinin, təsəvvür edin, nə qədər oxucusu var. Biz özümüzlə xüsusi olaraq Azərbaycanın xəritəsini, milli geyimli qızların şəkillərini və bayraqları, kəlağayıları aparmışdıq. Ən başlıcası isə Azərbaycan Respublikası Mədəniyyət və Turizm Nazirliyinin ekspozisiyası son illər Azərbaycan Respublikasının müxtəlif nəşriyyatlarında çap edilmiş ictimai-siyasi, mədəni həyatımızın çoxsaylı sahələrindən bəhs edən müxtəlif nəşrlərlə bəzədilmişdi. Biz ora 188 adda 250-dən çox kitab, müxtəlif dillərdə saysız-hesabsız reklam xarakterli materiallar da aparmışdıq. Həmin materiallar Azərbaycanın turizmi, tarixi abidələri, xalq sənəti nümunələrinin istehsalı və bölgələrimizin çağdaş mənzərəsi ilə bağlı idi. Bunlar nazirliyin önəm verdiyi və kütləvi nəşr etdirdiyi reklam xarakterli materiallardı. Biz onları sərgiyə gələnlərə hədiyyə edirdik.
Ən yaxşı nəşriyyatlarımızın fəaliyyəti ilə maraqlanan müxtəlif ölkələrin naşirləri də çox idi. Biz onlara bu gün ölkəmizdə fəaliyyət göstərən, öz yaxşı işi ilə fərqlənən dünya kitab nəşri işinin fövqündə dayanmağı bacaran ən yaxşı nəşriyyatlarımızın elektron ünvanlarını təqdim etdik ki, gələcəkdə onlarla əlaqə qura bilsinlər.
Çin Xalq Respublikasında keçirilən XIV kitab yarmarkasında bizim iştirakımız əslində Azərbaycan kitabının son dərəcə nəhəng bir oxucu arealına təqdim edilməsi idi. Azərbaycan kitabının dünya kitab hərəkatında qazandığı mövqe, heç şübhəsiz ki, Mədəniyyət və Turizm Nazirliyinin kitaba göstərdiyi diqqətin nəticəsi kimi qiymətləndirilir. Son dövrlər Azərbaycan kitabı bir sıra böyük kitab müsabiqələrində iştirak edir və ardıcıl olaraq qələbə çalır. Danılmaz faktdır ki, Azərbaycan kitabı bu gün özünün böyük inkişaf mərhələsindədir. Sərginin keçirilməsində, ekspozisiyamızın təşkilində Çin Xalq Respublikasındakı səfirliyimizin əməkdaşları bizə yaxından kömək etdilər, daim diqqət göstərdilər.

Xalq qəzeti.- 2007.- 22 sentyabr.- S. 6.