Bakının rusdilli mədəniyyətinin fenomeni

Paytaxtın Azadlıq prospektində yerləşən Rus Mədəniyyəti Mərkəzi yaranmasının 13 illiyini qeyd etmişdir. Bu illər ərzində mərkəz rus dili və mədəniyyətinin, adət və ənənələrinin qorunması və təbliği, habelə millətlərarası əlaqələrin, rus və Azərbaycan mədəniyyətlərinin qarşılıqlı təsirinin və qarşılıqlı zənginləşməsinin möhkəmləndirilməsi sahəsində çox böyük iş görmüşdür.
Burada görkəmli mədəniyyət və incəsənət xadimlərinin yaradıcılığına həsr olunmuş ədəbi-musiqili gecələr, Milad, Pasxa, Maslenitsa və s. kimi dini bayramlar münasibətilə ənənəvi konsertlər təşkil edilir. Böyük rus şairinin şərəfinə keçirilmiş “Puşkiniana” da bayram şənliklərinə çevrilmişdir.
Rus xalq və klassik musiqisinin, mahnı və rəqslərinin ən yaxşı ifası üçün “Könül təranələri” respublika müsabiqə-festivalı da Azərbaycanın musiqili həyatında hadisəyə çevrilmişdir. Həmin festivalda peşəkarlarla yanaşı, özfəaliyyət kollektivləri və ifaçıları da çıxış edirlər. Festivallar rus xalq və klassik yaradıcılığına ictimaiyyətin diqqətini cəlb etmiş, yeni adları və gənc istedadları tanıtmaqla mahir ifaçıları üzə çıxarmışdır. Festivallarda təkcə Bakıdan deyil, habelə Gəncə, Lənkəran, Şamaxı və İsmayıllıdan olan kollektivlər və ifaçılar da iştirak edirlər.
Artıq onuncu ildir ki, Rus Mədəniyyəti Mərkəzinin təşkil etdiyi yolka şənlikləri Bakıda keçirilən ən yaxşı Yeni il və Milad yolkası şənlikləri hesab olunur. Uşaq bayramlarının ssenarisi də rus xalq nağıllarının motivləri əsasında yazılır, tamaşalarda isə özfəaliyyət kollektivlərinin ən yaxşı üzvləri və Bakı teatrlarının artistləri iştirak edirlər. Mərkəzdə, sözün əsl mənasında, peşəkarlardan ibarət yaradıcılıq kollektivləri çalışır. Məsələn, “Rusiya çölləri” vokal-instrumental ansamblı (bədii rəhbər Q.Çernoqorov), “Oxuyan ürəklər” qadın vokal ansamblı (bədii rəhbər İ.Kazımova), “Zəriflik” rəqs ansamblı (bədii rəhbər Q.Semyonova), “Çal, qarmon!” rus xalq mahnıları ansamblı (bədii rəhbər V.Limberq), uşaq xoru (bədii rəhbər A.Sazonova), şairlər klubu kimi kollektivlər vardır. Onların hamısı bir çox respublika müsabiqə və festivallarının laureatı və mükafatçısıdır. Mərkəzə yarandığı gündən indiyədək Bakı Musiqi Akademiyasının dosenti Svetlana Barinova başçılıq edir. Onun fədakar əməyi sayəsində Rus Mədəniyyəti Mərkəzi ölkənin elmi və yaradıcı ziyalılarının ən yaxşı nümayəndələrini, habelə istedadlı gəncləri öz ətrafında birləşdirmişdir.

Xalq qəzeti.-2007.-9 sentyabr.-S.2.