Gəncədə görkəmli ədib və tədqiqatçı alim

Mir Cəlal Paşayevin xatirə muzeyi açılmışdır

Gəncədə görkəmli ədəbiyyatşünas-alim və yazıçı Mir Cəlal Paşayevin xatirə muzeyi açılmışdır.

Ədibin mənalı ömrünün çox hissəsi Gəncə ilə bağlıdır. İlk təhsilini Gəncədə alan və sonralar burada əmək fəaliyyətinə başlayan yazıçı, öz xatirələrində həmin illəri ömrünün ən gözəl və unudulmaz illəri kimi yada salmış, bir yazıçı və alim kimi yetişməsində Gəncə ədəbi mühitinin rolunu xüsusi qeyd etmişdir.

Muzeyin açılışında bu barədə daha ətraflı söhbət getmişdir. Vaxtilə Mir Cəlal Paşayevin yaşadığı mənzilin qarşısında ucaldılmış gözəl və yaraşıqlı muzeydə ədibin əsərləri, təhsil aldığı illərə aid fotoşəkilləri və şəxsi əşyaları toplanmışdır. Muzeydə görkəmli şəxsiyyətlərin Mir Cəlal Paşayev haqqında dedikləri fikirlər də yer almışdır.

Açılış mərasimində Gəncə Şəhər icra Hakimiyyətinin başçısı Eldar Əzizov, əməkdar incəsənət xadimi, şair Məmməd Alim, şəhər təhsil idarəsinin rəisi Mahal Əliyev çıxış etmişlər. Natiqlər ölkədə, o cümlədən Gəncədə aparılan quruculuq işlərinə, habelə qazanılan iqtisadi uğurlara görə dövlət başçısı İlham Əliyevə, Mir Cəlal Paşayev nəslinin layiqli nümayəndəsi Mehriban xanım Əliyevaya minnətdarlıqlarını bildirmişlər.

Mərasimdə Bakı Dövlət Universitetinin alimləri, Mir Cəlal Paşayevin yetirmələri - professorlar Vasim Məmmədəliyev, Təhsin Mütəllimov, Xalid Əlimirzəyev və başqaları görkəmli ədiblə bağlı xatirələrini danışmış və Mir Cəlal Paşayevin ədəbi-ictimai fəaliyyəti ilə yanaşı onun insani keyfiyyətlərini də yada salmışlar.

Mədəniyyət və Turizm naziri Əbülfəs Qarayev Mir Cəlal Paşayev ədəbi məktəbinin gələcək nəsillərə çatdırılmasında böyük rol oynayacaq muzeyin əhəmiyyətindən danışmış və muzeyin Gəncə sakinlərinin tez-tez müraciət edəcəkləri ünvan olacağına əminliyini bildirmişdir.

Açılış mərasimində görkəmli alim və yazıçının oğlanlar - akademik Arif Paşayev və professor Hafiz Paşayev ailələri adından bu işin təşkilatçılarına təşəkkür etmişlər. Mir Cəlal Paşayevin Gəncədə doğulduğunu bildirən pasport muzeyə bağışlanmışdır.

Rəmzi qırmızı lent kəsildikdən sonra aktyorların ifasında ədibin "Bir gəncin manifesti" əsərinin motivləri əsasında hazırlanmış səhnə nümayiş etdirilmişdir.

Sonra mərasim iştirakçıları muzeydə Mir Cəlal Paşayevin həyat və yaradıcılığını əks etdirən eksponatlarla tanış olmuşlar.

Respublika.- 2007.- 30 sentyabr.- S. 4.