Səbinə

"Norveçli muzey işçilərinə işğal altında olan muzeylər barədə məlumat veriləcək"

Azərbaycan və Norveç muzeyləri arasında saziş imzalanıb

Ötən gün Mədəniyyət və Turizm naziri Əbülfəs Qarayev Norveçin Stavanger şəhərinin Arxeologiya Muzeyinin direktoru Harald Yakobsen və muzeyin meneceri Anna Kari Skaarı qəbul edib. Norveçin Stavanger şəhərinin Arxeologiya Muzeyinin nümayəndə heyətinin sentyabrın 23-dən Azərbaycana səfəri başlayıb. "Azərbaycan və Norveç muzeyləri arasında əlaqələr" adlı səfərin əsas məqsədi qarşılıqlı əməkdaşlığa dair müqavilənin imzalanmasıdır.

Azərbaycanla Norveç arasında sıx mədəni əlaqələrin mövcud olduğunu bildirən Mədəniyyət və Turizm naziri Ə.Qarayev məhz Norveçin köməyi ilə İçərişəhər və Qobustan tarixi abidələrinin YUNESKO-nun Mədəni İrs siyahısına salınmasını yada salıb: "Bu əməkdaşlıq müqaviləsi Azərbaycan və Norveç muzey işçiləri arasında əlaqə yaratmaq məqsədi daşıyır. "Bu gün Qarabağda işğal altında qalan və dağıdılmış muzeylərin vəziyyəti barədə də məlumat veriləcək. İşğal altında qalan Cəbrayılın Tarix-Diyarşünaslıq Muzeyinin bütün əşyaları çıxarılıb və onlar hazırda Muzey Mərkəzində qorunur".

Stavanger şəhərinin Arxeologiya Muzeyinin Azərbaycan nümunələrinin təbliğ olunmasında böyük rolu olduğunu qeyd edən Ə.Qarayev 6 ay müddətində bu sərgiyə 10 min tamaşaçının maraq göstərdiyini vurğulayıb: "Belə böyük maraq sözsüz ki, mədəniyyətimizin zənginliyindən xəbər verir. Nəzərdə tutulan seminarlar belə təqdimatların keçirilməsindəki stil və təcrübə mübadiləsi aparmağa, artıq yeniləşən Azərbaycan muzeylərində də belə sərgilər təşkil etməyə imkan verəcək". Azərbaycanla Norveç arasında eyni zamanda elmi əlaqələrin yaradılması, bizim mədəni irsimizin qorunması ilə bağlı müəyyən layihələrin həyata keçirilməsi planlaşdırılır.

Harald Yakobsen çıxış edərək, keçirilən sərgilərin və görüşlərin əməkdaşlığa dair ilkin addım olduğunu və qarşılıqlı əlaqələrin daha da genişləndirilməsinə çalışdıqlarını bildirib. "Mən müharibənin olmasına baxmayaraq, muzey materiallarını tapıb gətirənlərlə maraqlanacağam. Azərbaycanda hazırda belə adamlar var. Onlarla müəyyən, müzakirələr aparacağam". Görüşdən sonra "Azərbaycan və Norveç muzeyləri arasında əlaqələr" adlı saziş imzalanıb. Sazişə əsasən, ilkin olaraq bu ilin payızında Bakıda hər iki ölkənin muzey işçilərinin iştirakı ilə I seminar keçiriləcək. 2008-ci ildə isə müvafiq olaraq II seminarın Osloda keçirilməsi nəzərdə tutulub.

Paritet.- 2007.- 25-26 sentyabr.- S. 10.