Xatun

İnzibati binanın bünövrəsi tapılıb

İlyas Babayev tapıntının 2500 ilə yaxın yaşı olduğunu söyləyir

"Şəmkirin Qaracəmilli kəndi yaxınlığında apardığımız arxeoloji qazıntılar zamanı gözlədiyimizdən də qiymətli tapıntılar aşkarlamışıq". Bu açıqlamanı Azərbaycan Milli Elmlər Akademiyasının arxeologiya və etnoqrafiya İnstitutunun şöbə müdiri, AMEA-nın müxbir üzvü, professor İlyas Babayev verib. Onun sözlərinə görə, adıçəkilən ərazidə aparılan arxeoloji qazıntılar nəticəsində yaşı 2500 ilə yaxın olan inzibati binanın bünövrəsi və orta sütun altlıqları aşkarlanıb.

Xatırladaq ki, Qaracəmilli kəndi yaxınlığında arxeoloji qazıntı işlərini Almaniya-Azərbaycan-Gürcüstan birgə arxeoloji ekspedisiyası aparır. Qazıntı işlərində alman arxeoloq Florian Klaus, gürcü arxeoloq Yulon Qaqaşidze və professor İlyas Babayev iştirak edirlər. İlyas Babayev ekspedisiyanın keçən ildən fəaliyyət göstərdiyini və bütün maliyyə xərclərinin Almaniya hökuməti tərəfindən ödənildiyini deyib:

"Bu ərazidə bizim öyrəndiyimiz abidə Əhəmənilər dövründə inşa edilib və eramızdan əvvəl birinci minilliyin ortalarına aiddir. Burada tapılan inzibati bina, çox güman ki, Əhəmənilər dövlətinin Cənubi Qafqazda yerləşən böyük iqamətgahıdır. Bu cür abidələr Azərbaycanda ilk dəfə Qazax rayonunda 1958-1959-cu illərdə tapılıb. Balaca binanın bir hissəsi və onun içərisində də iki sütun altlığı olan bu tapıntı isə hal-hazırda Bakıda tarix muzeyində nümayiş etdirilir".

Ayna.- 2007.- 5 sentyabr.- S. 8.