Quliyev R.

Sənətkarların yaradıcılığına baxış

Azərbaycan Respublikası Mədəniyyət və Turizm Nazirliyinin mədəniyyətşünaslıq üzrə elmi-metodiki mərkəzinin təşəbbüsü ilə ölkəmizin şəhər və rayonlarında yaşayan xalq istedadlarını aşkarlamaq üçün onların yaradıcılığına baxış-sərginin keçirilməsi qərara alınıb. Öncə qeyd etmək lazımdır ki, istedadların üzə çıxarılmasına xidmət edən belə baxışların uğurlu nəticələrinə əvvəllər də şahidlik etmişik. Hələ sovet dönəmindən başlayaraq mərkəzin təşkil etdiyi bu kütləvi tədbirin davamlı şəkil alması sayəsində ixtisas təhsili olmayan, ancaq bədii yaradıcılığa meyili olan istedadlı şəxs üzə çıxarılmış, belə yaradıcılara metodiki tövsiyələr verilmiş, axtarışları və fəaliyyətləri düzgün qiymətləndirilmişdir. Bu mənada çağdaş Azərbaycan dekorativ tətbiqi sənətinin zənginləşməsində mərkəzin üzə çıxartdığı xalq istedadlarından Sitarə Rəhimova, Elmira Abbaslı, Qasım Qasımov, Əldicavad, Qərib Sultanov, Tofiq Rəsulov və s. sənətkarların adlarını qeyd etmək olar. Bu ənənənin müstəqillik dövründə də gərəkliyini nəzərə alan mərkəzin təsviri sənət və sərgilər bölməsi şəhər və rayon mədəniyyət və turizm şöbələri ilə birlikdə bu gün həyatını həm də yaradıcılıqsız təsəvvür edə bilməyən, sənətə bağlı insanları ictimaiyyətə tanıtmaq üçün yeni baxışa start verib. Hazırda tədbirin ilkin mərhələsində metodiki-təşkilati işlər görülür. Artıq mərkəzin təsviri sənət və sərgilər bölməsinin əməkdaşları öz istedadını nümayiş etdirmək istəyində olan onlarla həvəskar sənətkarı qeydə alıblar. Gələn il yekunlaşacaq yeni baxış ili olaraq zonalar üzrə keçiriləcək. İşlərin seçilməsindən sonra Gəncə, Şamaxı, Lənkəran, Zaqatala və Qubada yekun zona sərgiləri təşkil olunacaq. Sərgiyə hazırlıq prosesində yerli icra hakimiyyətləri də xüsusi fəallıq göstərirlər. Çünki məqsəd yerlərdə yaşayan ən istedadlıların üzə çıxarılmasına nail olmaqdır. Yaxşıların yaxşısını isə Azərbaycan Respublikasının Mədəniyyət və Turizm Nazirliyi və Azərbaycan rəssamlar İttifaqının nümayəndələrindən ibarət münsiflər heyəti müəyyən edəcək. Baxış Bakıda təşkil olunacaq yekun sərgi ilə tamamlanacaq. Zirvə sərgisində göstərilən ən yaxşı nümunələr mərkəzin fonduna daxil edilməklə, onların yaxın gələcəkdə müxtəlif miqyaslı yerli və Avropa ölkələrində təşkil olunacaq sərgilərdə nümayişi nəzərdə tutulub.

İnanırıq ki, yekun sərgini həm də satış xarakterli olması ona olan sənətkar və tamaşaçı marağını daha da artıracaqdır. Bütünlükdə isə, xalq sənətkarlarının və həvəskar rəssamların yaradıcılığının milli mədəniyətimizin zənginləşməsində və inkişafına xidmətdə yönəlməsi birmənalıdır. Odur ki, bütün istedadlı şəxsləri bu sənət yarışmasına qoşulmağa səsləyirik. Yeri gəlmişkən, qeyd etməyi lazım bildim ki, yerlərdəki qurumlarla əlaqə yarada bilməyən xalq istedadları öz əl işlərini birbaşa Bakıda yerləşən Mədəniyyətşünaslıq üzrə elmi-metodiki mərkəzə təqdim edə bilərlər (Bakı, Bəşir Səfəroğlu küçəsi, 144).

Mədəniyyət.- 2007.- 28 sentyabr.- S. 2.