Əliyev Ə.

Parisdə Azərbaycan incəsənət ustalarının konserti böyük maraqla qarşılanmışdır

Aprelin 2-də Parisin möhtəşəm "Champs Elyses" teatrının binasında Azərbaycan mədəniyyət və incəsənətinin Avropada, xüsusilə Fransada təbliği sahəsində əvəzsiz xidmətlər göstərən Heydər Əliyev Fondunun prezidenti, YUNESKO və İSESKO-nun xoşməramlı səfiri, Azərbaycan Respublikasının birinci xanımı Mehriban Əliyevanın himayədarlığı altında ölkəmizin Fransadakı səfirliyinin təşkilatçılığı ilə incəsənət ustalarımızın qala konserti olmuşdur. Konsert keçən əsrin əvvəllərində Şərqdə ilk müstəqil və demokratik dövlət olan Azərbaycan Demokratik Respublikasının yaranmasının 90 illik yubileyi münasibətilə təşkil edilmişdir.

Konsertin əvvəlində Fransa Milli Qvardiyasının nəfəs alətləri orkestrinin ifasında Azərbaycan və Fransanın dövlət himnləri səslənmişdir.

Mühüm hadisə ilə bağlı Azərbaycanın Fransadakı səfiri Tarik Əliyevin iştirakçılara xoş arzuları bildirilmişdir.

Tədbirdə fransız musiqisevərlərinə yaxşı tanış olan Alim Qasımov və qızı Fərqanənin ifasında muğam və təsniflər səslənmiş, Azərbaycan bəstəkarlarının əsərlərindən parçalar, romans və ariyalar, milli rəqslər və caz musiqisi ifa edilmişdir.

Konsertin sonunda incəsənət ustaları birlikdə bəstəkar Rauf Hacıyevin məşhur "Azərbaycan" mahnısını ifa etmişlər.

Konsertə Azərbaycan Respublikasının baş nazirinin müavini Elçin Əfəndiyev, Fransa dövlətinin rəsmiləri, senatorlar, Milli Assambleyanın deputatları, müxtəlif ölkələrin səfirləri, akkreditə olunmuş diplomatik korpusun nümayəndələri, Fransa ictimaiyyətinin və Azərbaycan icmasının nümayəndələrindən ibarət təqribən 2000 nəfərə yaxın qonaq tamaşa etmişdir.

Konsertdən sonra verilmiş ziyafətdə iştirakçılar Azərbaycan milli mətbəxinin zəngin nemətlərindən dadmışlar.

Respublika.- 2008.- 5 aprel.- S. 6.