Tahirə

Aygünə heç olmasa hərə bir SMS göndərsin

Azərbaycanlı balasına dəstək lazımdır

Bu gün dünyanın bir çox ölkələrində müxtəlif səpkili musiqi müsabiqələri keçirilir. Türkdilli dövlətlər arasında isə bu gün "Alaturka" müsabiqəsi maraq və həyəcanla izlənilir. Bu il keçirilən bu müsabiqəyə isə Azərbaycan tamaşaçısı xüsusi maraq göstərir.

Çünki "Alaturka"nın builki iştirakçıları arasında azərbaycanlı qızımız da iştirak edir. Təbii ki, Aygün Şükürovanın belə genişmiqyaslı müsabiqədə iştirakı həm önəmli, həm də həyəcanlıdır. Türkiyə kimi bir ölkədə, belə möhtəşəm bir müsabiqədə iştirak edib, eyni zamanda özünə böyük publika qazanmaq heç də asan deyil. Nəzərə alsaq ki, Türkiyə şou-biznesində, o mühitdə seçilmək, tamaşaçı marağı qazanmaq o qədər də asan başa gəlmir, onda qızımızın üzərinə düşən məsuliyyətin və yükün ağırlığını anlamaq heç də çətin deyil. "Alaturka" müsabiqəsində final mərhələsinə qədər gəlib çıxmaq və məhz elə ciddi münsifləri - Türkiyənin tanınmış sənətçilərini, televiziya bilicilərini, prodüserlərini təəccübləndirmək və maraqlandırmaq üçün iştirakçıdan gözəl səslə yanaşı, özünə inam və cəsarət də vacibdir. Bütün bunlarla bahəm, eyni zamanda müsabiqə iştirakçısının intellektual səviyyəsi, nitq qabiliyyəti, səhnə mədəniyyəti də əsas amillərdən sayılır ki, bu da hər iştirakçıda yetərli qədər deyil. Onu da nəzərə almaq lazımdır ki, bu müsabiqədə iştirakçılardan böyük potensial tələb olunur. Bir də onu nəzərə alsaq ki, iştirakçılara münsif qismində Türkiyənin ən tanınmış və "kapriz"li müğənnisi Bülent Ersoy, televiziya sahəsində əvəzolunmaz imici olan Arman Çağlayan kimi kritik qiymətləndirir, onda orada seçilmək üçün iştirakçıların nə qədər psixoloji gərginlik içərisində olmasını anlamaq çətin deyil. Əgər iştirakçı həm də Azərbaycandan gəlibsə və Türkiyə şou-biznesi barədə tam məlumatlı deyilsə, eyni zamanda türk sənət musiqisinə ilk dəfədir ki, müraciət edirsə və ondan mükəmməl ifa tələb olunursa, onda Aygün Şükürovanın nə qədər psixoloji çətinlik keçirdiyini söyləmək də çətin deyil. "Alaturka"nın son çıxışında Aygünün istər ifası, istər fikir çatdırmaq bacarığı bizlər qədər elə türkləri, xüsusilə də münsifləri, Bülent Ersoyu şoka saldı. Xatırladaq ki, Aygün həmin gün Azərbaycanın gənc ifaçılarından Eltonla duet də oxudu, həm də bu dueti elə oxudular ki, alqışlar sürəkli oldu. Ancaq həmişəki kimi Bülent Ersoyu Aygünün bu ifası qane etmədi. Səbəb isə o idi ki, Azərbaycandan müsabiqəyə qatılan Aygün Şükürova məhz Azərbaycan mahnısına müraciət edib. Bizlər üçün əslində Bülent Ersoyun bu jesti, yanaşması təəccüblü deyildi. Çünki dəfələrlə bu sənətçi Azərbaycan musiqisi barədə danışanda xoşagəlməz jestlər nümayiş etdirib. Xoş məqam isə o idi ki, Aygün Bülent Ersoyun fikirlərini qarşılıqsız qoymadı. Çox məntiqli, savadlı və cəsarətli şəkildə Bülent Ersoyun diqqətinə çatdırdı ki, onun Azərbaycan musiqisinə müraciət etməsində heç bir qəbahət yoxdur. Cəsarətli şəkildə, qorxmadan Bülent Ersoya cavab verdi. Onun diqqətinə onu da çatdırdı ki, indiyə qədər Azərbaycan musiqisinə müraciət etdiyi kimi, bundan sonra da bu musiqilərə müraciət edəcək, çünki o, Azərbaycandan gəlib və Azərbaycanı təmsil edir. Təbii ki, türk sənət musiqiləri ilə yanaşı, Azərbaycan musiqilərinə müraciət etməsi təbii qarşılanmalıdır. Əvvəlcə Bülent Ersoy təpkisində haqlı olduğunu Aygünə çatdırmaq istəsə də, son məqamda Aygün onu mədəni şəkildə susdurdu. Əsas məqamlardan biri də o idi ki, münsiflərdən Ebru Gündeş və Türkiyə musiqisində xüsusi çəkisi olan Orxan Gəncəbay da Aygünə dəstək durdular. Azərbaycan musiqisinə müraciət etməyində heç bir qəbahət olmadığını söylədilər. Bülent Ersoy bu iradı yenidən əsaslandırmaq istədi ki, guya, Aygün Azərbaycan musiqilərinə müraciət etməklə öz işini asanlaşdırır. Onun sözlərindən elə çıxırdı ki, guya bizim musiqiləri ifa etmək çox asandı. Aygün isə onun diqqətinə çatdırdı ki, Azərbaycan musiqilərini ifa etmək heç də asan deyil. Təbii ki, bunlar üçün də xüsusi boğazlar lazımdır. Digər tərəfdən, o heç də işi asan olsun deyə, Azərbaycan musiqisinə müraciət etmir. O, ilk əvvəl elə azərbaycanlı olduğu üçün bu musiqilərə də ara-sıra yer verir. Daha sonra Aygün Bülentin diqqətinə çatdırdı ki, azərilər də türksoylu millətdir və Türkiyə və ya Azərbaycan musiqisini ayırmaq heç də düzgün deyil. Təbii ki, bu fikirlər də alqışla qarşılandı. Bizim isə bunları sizə çatdırmaqda məqsədimiz odur ki, "Alaturka" kimi böyük müsabiqədə azərbaycanlı qızımıza dəstək olaq. Hər bir azəri türkü heç olmasa, bircə dənə SMS Aygünə göndərsə, onda qızımız oradan alnıaçıq geri dönə bilər. Ən azı onu da nəzərə almalıyıq ki, Aygün orada Azərbaycanı təmsil edir və gənc olmasına baxmayaraq bu günə qədər ifası, səsi, səhnə performansı ilə Türkiyədə diqqət mərkəzindədir. Sadəcə, ona son məqamlarda daha çox dəstək durmaq lazımdır ki, SMS-dən kasadlıq çəkməsin. Bu həm də Azərbaycanın uğuru olar.

Şərq.- 2008.- 2 aprel.- S. 14.