Kitabxana sahəsində əməkdaşlıq haqqında memorandum imzalanmışdır

Aprelin 9-da Azərbaycan Mədəniyyət və Turizm Nazirliyi ilə ABŞ-ın ölkəmizdəki səfirliyi arasında əməkdaşlıq haqqında memorandum imzalanmışdır. Nazir Əbülfəs Qarayev və səfir Ann Dersin imzaladıqları sənəd birgə layihənin ikinci hissəsinin həyata keçirilməsini, başqa sözlə, Bakıda və ölkənin müxtəlif bölgələrində kitabxana işinin təkmilləşdirilməsini, kitabxanalarda Amerika guşələrinin yaradılmasını nəzərdə tutur.

Ə.Qarayevin sözlərinə görə, ABŞ səfirliyinin iki il ərzində həyata keçirdiyi Azərbaycan kitabxanalarının inkişaf proqramı çərçivəsində kitabxanalarda Amerika mərkəzləri yaradılmışdır. Layihə Azərbaycanın bir sıra mərkəzi kitabxanalarının müasir texnologiyalarla təmin edilməsinə imkan vermişdir.

İkinci mərhələnin proqramı da xeyli zəngindir. İndi bu cür mərkəzlərin Gəncədə, Lənkəranda, Salyanda, Kürdəmirdə və digər bölgələrdə açılması, yerlərdə məşğələ-kursların keçirilməsi və sair planlaşdırılır. Nazir vurğulamışdır ki, Azərbaycan dünya birliyinə inteqrasiya edən müstəqil dövlətdir və ABŞ ilə yaxından tanış olmağa imkan yaradan bu cür informasiya mərkəzləri gənclər üçün maraq kəsb edir.

Ann Ders bildirmişdir ki, belə mərkəzlər dünyanın 100 ölkəsində fəaliyyət göstərir və iki dövlət arasında bir növ humanitar körpü yaradır. Sazişə əsasən, Mədəniyyət və Turizm Nazirliyi ABŞ mərkəzlərinin yaradılması üçün yerlər ayıracaq, onların internetə çıxışla və digər proqramlarla təchiz olunmasını təmin edəcəkdir. Amerika tərəfi mərkəzləri kompüterlərlə və Birləşmiş Ştatlar haqqında tədris materialları ilə təchiz edəcəkdir.

Azərbaycan.- 2008.- 10 aprel.- S. 6.