Mahmudova S.

Gözəl və səmimi

 

Onun tərcümeyi-halında diqqət çəkən cəhətlər çoxdur. Bir il əvvəl martın 12-də 70 yaşı tamam olub. Bu il də onun üçün əlamətdar hadisələrlə zəngindir. İyun ayının 30-da Milli Kitabxanada çalışmağa başlamasının 30 ili tamam olacaq. Bütövlükdə isə Səkinə xanımın kitabxanaçılıq sahəsində 50 ilə yaxın təcrübəsi var.

Gəlin tələsməyək, bu mədəniyyət fədaisinin ömür kitabını birgə vərəqləyək.

Məmmədova Səkinəxanım Kamil qızı 1937-ci il martın 12-də Pirşağı qəsəbəsində anadan olub. N.Krupskaya adına Kitabxanaçılıq Texnikumunu bitirib. M.Qorki adına, A.S.Puşkin adına kitabxanalarda və Y.Qaqarin adına sarayda çalışıb. 1978-ci ildən Milli Kitabxananın dövrü mətbuat zalında işləyir.

Bu illər ərzində nə qədər elm, təhsil, mədəniyyət xadimlərinə, yazıçı və şairlərə, müəllim və tələbələrə mədəni xidmət göstərib.

Son dərəcə mədəni, mehriban, sadə və zəhmətkeşdir. Vəzifəsinə məsuliyyət və vicdanla yanaşır.

Danışdırdığımız oxucuların hamısı Səkinəxanımın haqqında məmnuniyyətlə xoş sözlər söylədi. Dövrü mətbuat şöbəsinin müdiri Fəridə xanım Hacıyevanın fikirləri isə daha maraqlı oldu:

- Belə insanlarla çalışmaq adamda həmişə xoş ovqat yaradır. Təcrübəsi var, işini sevir, oxuculara lazımi köməyi edə bilir... Daha nə lazımdır?!

Biz də öz növbəmizdə Səkinə xanımı yubileyi münasibətilə ürəkdən təbrik edir, ona nəcib işində uğurlar, möhkəm can sağlığı arzulayırıq.

P.S. Hörmətli oxucularımızın diqqətinə 2 şəkil də təqdim edirik. Bunlardan biri Səkinə xanım kitabxanada yenicə çalışmağa başlayarkən, digəri isə anadan olmasının 70 illiyi ərəfəsində lentə köçürülüb. İllər öz sözünü desə də gözlərindəki insanlara qayğı, vətəninə məhəbbət işığına təsir edə bilməyib. Səkinə xanım 50 il əvvəl olduğu kimi yenə də gözəl, səmimi və ünsiyyətcildir...

 

Yeni Mədəni-maarif jurnalı.- 2008.- 3.- S. 80.