Mütəllimova S.

Mikayıl Müşfiqə həsr olunmuş gecə

Aprelin 15-də C.Cabbarlı adına Respublika Gənclər Kitabxanasında nakam şair Mikayıl Müşfiqin anadan olmasının 100 illik yubileyi münasibətilə ədəbi-bədii gecə keçirilib. Tədbir kitabxananın İctimai Hüquqi İnformasiya Mərkəzində baş tutub. Əvvəlcə iştirakçılar şairin xatirəsinə ehtiram əlaməti olaraq, M.Müşfiqin abidəsi öniinə gül-çiçək dəstələri qoymuşlar.

Tədbiri giriş sözü ilə kitabxananın direktoru Tahir Sadıqov açıb. O, qeyd edib ki, bizim borcumuz həyat və yaradıcılıqlarını xalqına sərf etmiş şair və yazıçıların əsərlərini qoruyub saxlamaq və onu gələcək nəslə verməkdən ibarətdir. Belə şairlərdən biri də Azərbaycan poeziyasında özünəməxsus yer tutan, qartal qanadlı poeziyası ilə seçilən, cəmi 29 il yaşamış şair Mikayıl Müşfiqdir.

Sonra söz Mədəniyyət və Turizm Nazirliyi Kitabxana işi sektorunun müdiri Lətifə xanım Məmmədovaya verilib. L.Məmmədova şairin aramızdan vaxtsız aparılmasına baxmayaraq, bu gün də onun yaşadığını, əsərlərinin sevilə-sevilə oxunduğunu söyləyib. Dahilərin ucalığı illər keçdikcə zirvələrdən daha aydın görünür, - deyən L.Məmmədova hər gün, hər il Mikayıl Müşfiqin anıldığını, onun ruhunun şad olduğunu vurğulayıb.

Tədbirdə S.Mümtaz adına Dövlət Ədəbiyyat və İncəsənət Arxivinin direktoru M.Teymurov, müşfiqşünas tədqiqatçı-şair Gülhüseyn Hüseynoğlu, yazıçı-publisist İntiqam Mehdizadə, şairə Gülarə Munis çıxış edərək Mikayıl Müşfiqin qısa ömür yolunun necə şərəfli, yaratdığı şeir və poemaların isə bu gün də dillər əzbəri olduğundan bəhs ediblər. İ.Əbilov adına Mədəniyyət Mərkəzinin "Şəlalə" xalq çalğı alətləri ansamblının və "Vurğun" poeziya teatrı üzvlərinin ifasında səslənən - Mikayıl Müşfiqin şeirlərinə bəstələnmiş mahnılar tədbiri daha da rövnəqləndirib.

Mədəniyyət.- 2008.- 17 aprel.- S. 8.