İnformasiya texnologiyalarının inkişafında birinciyik

Azərbaycan MDB-də lider ölkə olub

Azərbaycon Ümumdünya İqtisadi Forumu tərəfindən hazırlanan 2007-2008-ci illər üzrə "İnformasiya texnologiyalarının qlobal inkişafı haqqında Hesabat"ın cədvəlində 127 qabaqcıl , ölkə arasında 67-ci yeri tutub.

Rabitə və İnformasiya Texnologiyaları Nazirliyinin mətbuat xidmətindən verilən məlumata görə, Ümumdünya İqtisadi Forumun 2006-2007-ci illər üçün hazırladığı analoji reytinqində Azərbaycan 122 ölkə sırasında 71-ci yerdə olub. İl ərzində hesabatda ölkələrin sayının 5 vahid artmasına baxmayaraq, yeni hazırlanan "Şəbəkə hazırlığı" cədvəli üzrə Azərbaycan 4 pillə irəliləyib. Azərbaycan bu cədvəldə bir çox nüfuzlu ölkələri, o cümlədən Bolqarıstan, Ukrayna, Qazaxıstan, Rusiya, Vyetnam, Argentina, Filippin, Pakistan, Moldova kimi ölkələri, həmçinin Ermənistan (106-cı yer) və Gürcüstanı (91-ci yer) arxada qoyaraq MDB ölkələri arasında lider olub.

Hesabatda dövlətlər ölkənin texniki yeniliklərə dair meyli, yüksək texnologiyaların biznes və dövlət sektorunda tətbiqi səviyyəsi, şəbəkə infrastrukturunun inkişafı, eləcə də fiziki və hüquqi istifadəçilərə təqdim olunan İKT xidmətlərinin sayı və keyfiyyəti kimi amilləri əsasında qiymətləndirilib. Birinci onluğa Danimarka, İsveç, İsveçrə, ABŞ, Sinqapur, Finlandiya, Hollandiya, İslandiya, Koreya Respublikası və Norveç daxil olublar. Hesabatın hazırlanmasında məqsəd internet şəbəkəsinin inkişafına təsir edən amilləri müəyyan etmək, informasiya texnologiyalarının inkişafında biznes infrastrukturu və nizamlanma amillərini təhlil etməkdir. Hesabat həmçinin ölkələrin ümumi inkişaf tempini və rəqabət qabiliyyətlilik potensialını əks etdirir.

Şərq.- 2008.- 12 aprel.- S. 13.