Mükərrəmoğlu M.

Azərbaycan regionun informasiya mərkəzinə çevrilmək potensialına malikdir

Bu sözlər ABŞ-ın “Cisco” şirkətinin Rusiya və MDB ölkələri üzrə vitse-prezidenti Skot Blaklinə məxsusdur. O, bu yaxınlarda verdiyi müsahibələrin birində demişdir.
– Azərbaycanın rabitə və informasiya texnologiyaları naziri Əli Abbasovla yüksək texnologiyalar parkının yaradılmasında iştirakımız barədə müzakirələr aparırıq. Bundan əvvəl Azərbaycanda gördüyümüz işlərin xronologiyasına baxsanız, birmənalı olaraq yeni layihədə iştirak etmək istədiyimizi görə bilərsiniz. İnformasiya texnologiyaları sahəsində Azərbaycanda şirkətimizin 14 belə akademiyası fəaliyyət göstərir. Sonuncu təlim mərkəzimizi Naxçıvanda açdıq. Bu akademiyalarda informasiya şəbəkələri üzrə dizayn və idarəetmə bacarığı olan gənc mütəxəssisləri öyrədirik. Biz gənc mütəxəssislərin hazırlığı və bütün ölkəni onlarla təmin etməyin əhəmiyyətini aydın başa düşürük. İndi bütün bunlar göstərir ki, Azərbaycanın regionların informasiya mərkəzinə çevrilmək şansı vardır. Bu perspektivə Prezident İlham Əliyev də dəfələrlə işarə edib. Ölkənin son inkişaf göstəriciləri də hadisələrin məhz bu məcrada inkişaf edəcəyinə dəlalət edir. Biz görürük ki, Azərbaycan Prezidenti Yaxın Şərq, Fars körfəzi və digər regionların ölkələri ilə aktiv işləyir. Bu, dünyəvi müsəlman ölkəsi üçün çox böyük nailiyyətdir. Prezident İlham Əliyev Avropa İttifaqı ölkələri, Türkiyə, İordaniya ilə də yaxşı münasibətlər qurub və ölkənin artan imkanları bunu gözəl büruzə verir. “Cisco” qeyd olunan prosesdə iştirakından qürur duyur. Bizim planlarımız ölkə hökumətinin dəstəyindən asılı olacaq. Dövlət başçısı ilə söhbətdən bilirik ki, hökumətin birinci məqsədi Azərbaycan cəmiyyəti, hökuməti, biznesi, təhsilini, səhiyyəsini, təhlükəsizliyini və s. sahələri birləşdirən şəbəkə yaratmaqdır. Hələ ki, texnoparkın konkret detalları ilə bağlı hökumətlə danışıqlar aparmamışıq. Biz Azərbaycanın öz milli şəbəkəsini hansı istiqamətdə inkişaf etdirəcəyini bilmək istəyirik. ”Cisco” bütün layihələrə dəstək verməyə hazırdır. Lakin öz fəaliyyətimizi hökumətin inkişaf planlarına uyğun qurmaq istəyirik.
Demək istəmirəm ki, qonşu dövlətlərdə inkişaf azdır, amma regionun digər ölkələri ilə müqayisədə Azərbaycanın bir çox üstünlükləri var. Azərbaycanda sovet dövründən miras qalmış yüksək təhsilli insan resursları və beynəlxalq aləmlə yaxşı əlaqələr qurmuş rəhbərliyiniz var. Müqayisə etsəniz görərsiniz ki, 3 il bundan əvvəl Qərb və ABŞ-la münasibətlər indiki səviyyədə olmayıb. Liderlərinizin Yaxın Şərq, Türkiyə, Aralıq dənizi ölkələrinə uğurlu səfərləri olub. Lakin yenə də XXI əsrin bilik iqtisadiyyatı üçün treninq keçməlisiniz. “Cisco”nun isə bu işdə rolu odur ki, Azərbaycan iqtisadiyyatı üçün müasir dövrün tələblərinə cavab verən bilikli mütəxəssislər hazırlasın. Görülməli işlər çoxdur və Azərbaycan hökuməti müasir şəbəkələrin gətirəcəyi üstünlüklərlə bağlı qərar verməlidir. Prezident İlham Əliyev öz dostları Şeyx Məhəmməd, Kral Abdulla və s. həmkarlarının gördüyü işlər barədə xəbərdardır. O, bilir ki, eyni addımları atmaq üçün onda tam potensial var. Bəli, ölkənizdə risklər var və mən onları kiçiltmək istəmirəm. Azərbaycanı əhatə edən inkişaf parametrlərinə baxdıqda hər bir insan ruhlanır.

Xalq qəzeti.- 2008.- 3 aprel.- S. 6.