Heydər Əliyev parkını ziyarət

Azərbaycan Prezidenti İlham Əliyev Biləsuvar rayonuna gəlmişdir

Xəbər verdiyimiz kimi, Azərbaycan Prezidenti İlham Əliyev aprelin 18-də Beyləqandan Biləsuvar rayonuna gəlmişdir.
Dövlətimizin başçısı əvvəlcə Cəbrayıl rayonundan olan məcburi köçkünlər üçün salınmış qəsəbəyə gələrək, buradakı Heydər Əliyev parkını ziyarət etdi, ulu öndərin büstü önünə gül dəstəsi qoydu.
Prezident İlham Əliyevə məlumat verildi ki, 2004-cü ildə salınmış parkın sahəsi 2 hektardır. Bu il parkda əsaslı təmir işləri aparılmış, əhalinin istirahəti üçün hər cür şərait yaradılmış, fəvvarə quraşdırılmışdır. Burada 3 minə yaxın ağac və bəzək kolları əkilmişdir.
Sonra dövlətimizin başçısı burada sakinlərlə görüşüb söhbət etdi.
Qəsəbə sakini (qadın): Xoş gəlmisən, gələn qədəmlərinə qurban olum. Atana da, Sənə də qurban olum.
Qəsəbə sakini (kişi): Cənab Prezident, xoş gəlmisiniz. Sizi bu müqəddəs məkanda salamlayırıq. Növbəti illərdə də Sizi Prezident görmək istəyirik. Azərbaycanda gedən böyük quruculuq işləri hamımıza məlumdur. Qarşıdakı illərdə bu işlərin davamı olacaqdır. Amma bu il Azərbaycanda növbəti prezident seçkiləri keçiriləcəkdir. Çox güman ki, prezidentlik həvəsinə düşənlər tapılacaqdır. Amma mən əminəm ki, əgər onların hamısı birlikdə ümumi seçicilərin 1 faiz səsini toplasa, adları ya “Qırmızı kitab”a, yaxud da Ginnesin rekordlar kitabına düşəcəkdir. Bir daha xoş gəlmisiniz. Biz cəbrayıllıların səsi Sizə halaldır.
Qəsəbə sakini (qadın): Cənab Prezident, Sənə atanın yolunu həmişə davam etdirməyi arzulayıram. Allah-taaladan arzum budur ki, həmişə başın uca olsun, qəlbin açıq olsun. Biz cəbrayıllılar bu gün Səni görməyimizə çox sevinirik. Allah atana rəhmət eləsin, onun yolunu davam etdirirsən. Qızın Leyla Moskvadadır, o, televizorda görünəndə az qalıram duram, onun üzündən öpəm. Birdən qaçıb öpürəm də, balamın torpağı haqqı. Prezident seçkilərində bütün Cəbrayıl camaatı Sənə səs verəcək, daimi Prezidentimiz olacaqsan. Əmin ola bilərsən. Cəbrayıl camaatını Sənə, Səni də Allaha tapşırıram. Sağ ol, başına dönüm.
Gedək bircə stəkan çayımızı iç. Səngərdə əsgərlərin yanında çay içmisən ha, onda da səni öpmüşəm. Gedək, bircə stəkan çayımızı iç.
Çay süfrəsi arxasında davam etdirilən söhbət zamanı Prezident İlham Əliyev dedi: Təxminən beş il əvvəl buraya gəlmişdim. İlk qaçqın qəsəbəsi məhz burada açılmışdı. Xatirimdədir, prezident seçkiləri ərəfəsində idi, onda Baş nazir idim.
Qəsəbə sakini (qadın): Hə, onda mənim balamın adını daşıyan məktəbə birinci girmisən. Ayaqlarına mən anan qurban.
İlham Əliyev: İndi bura gözəl bir məkan olubdur. Birinci qaçqın şəhərciyi indi abadlaşıb, şəkillərini göstərmişdilər, gördüm ki, ağaclar əkilib.
Qəsəbə sakini (kişi): Cənab Prezident, Siz Cəlilabad rayonuna getmişdiniz. Dediniz ki, dünyanın heç bir yerində bu gözəllik yoxdur. O gözəlliyi yaratmaq üçün gözəl insanlar lazımdır. O da Sizsiniz. Çox sağ olun ki, quruculuq-abadlıq işləri görürsünüz.
Qəsəbə sakini (qadın): Bir stəkan çay iç. Mən heç yerdə məclisdə çay içməmişəm. Sənin eşqinə burada çay içirəm. Hə, ürəyim sevindiyinə görə içirəm.
İlham ƏLiyev: Təzə qəsəbələr salındı, böyük işlər görülübdü. Artıq buralarda 20 min nəfər Cəbrayıl köçkünü məskunlaşmışdır. Mən çalışıram ki, hər şey yaxşı olsun.
Qəsəbə sakini (qadın): Bakıda gözəl körpülər salırsan. Gedirsiniz uşaq evlərinə. Xanımına da mənim, hamımızın, bütün köçkünlərin salamını çatdırarsan. O sadəliyinizlə ki, körpələri qucağınıza alırsınız, and olsun Allaha, dağa dönürəm, qaçıram televizorda Sizi öpürəm, bir də qayıdıram. Bizim belə Prezidentimiz var. Həmişə Allah Sənin kürəyində dursun, biz də Sənin sayəndə dolanaq.
İlham Əliyev: Elə də olmalıdır. Biz hamımız çalışmalıyıq ki, ölkəmizdə işlər daha da yaxşı getsin və insanların sosial problemləri həll olunsun. Ehtiyac içində yaşayanlara, kimsəsiz uşaqlara, məcburi köçkünlərə – yəni əziyyət çəkən insanlara, ilk növbədə qayğı göstərilməlidir. Bu illər ərzində biz bütün çadır şəhərciklərini ləğv etdik, biri də qalmayıbdır. Birinci qəsəbə burada salınmışdı, sonuncu da burada salındı. 12 çadır şəhərciyi indi yoxdur. Biz bunu 4 il ərzində etmişik. İndi Dövlət Proqramına əlavələr edilibdir. Bu əlavələr nəticəsində növbəti illərdə təxminən 500 milyon manat vəsait xərclənəcək ki, hərbi hissələrin ərazisində, fin evlərində, yararsız halda olan yataqxanalarda yaşayanları da belə evlərə köçürək. Ev, məktəb, xəstəxana, tibb məntəqəsi, uşaq bağçası, yollar, elektrik enerjisi var. İndi mənə müraciət edirlər ki, qaz xətti də çəkilsin. Onu da edərik. Qazlaşdırmanı aparırıq. Onu da edəcəyik və rayon icra hakimiyyəti də burada yerləşəcəkdir. Bu da məqsədəmüvafiq olacaq, çünki Cəbrayıl rayonu əhalisinin üçdəbir hissəsi buradadır.
İndi Azərbaycan həqiqətləri, yəni ictimai-siyasi vəziyyət belədir ki, insanlar hər şeyi görürlər. O insanlar ki, işləyirlər, öz əməli işləri ilə adamlara qayğı göstərirlər, xeyir gətirirlər, onlar siyasi səhnədə olacaqlar. O insanlar ki, ancaq necə deyərlər, boşboğazlıqla məşğuldurlar, heç bir sahədə heç bir müsbət addım atmayıblar, onlara nə siyasi səhnədə, nə də ictimai həyatda yer yoxdur. Bu, indi reallıqdır. Bəzən deyirlər ki, Azərbaycanda nə üçün müxalifət yoxdur, nə üçün zəifdir. Axı biz öz işimizlə vəziyyəti belə bir səviyyəyə gətirdik ki, indi insanlar özləri bilirlər ki, kim nəyə qadirdir. Bilirsiniz ki, Azərbaycanda demokratiyadır, demokratik cəmiyyətdir, bütün hüquqlar var, siyasi fəaliyyət sərbəstdir, söz azadlığı var, sərbəst toplaşmaq azadlığı var, yəni demokratik ölkəyə xas olan bütün şərait var. Sadəcə olaraq, insanlar artıq çoxdandır yaxşını pisdən ayıra bilirlər və real işləri dəstəkləyirlər. Əgər mən bu dəstəyi hiss etməsəydim, bəlkə də, bütün bu işləri görmək mümkün olmazdı. İndi ölkəmiz də güclənir, beynəlxalq imkanlarımız artır, iqtisadi baxımdan güclənmişik. Bütün bu şəhərcikləri biz nəyin hesabına saldıq? 56 qəsəbə tikilibdir. 56 qəsəbə - bu, zarafat deyil! Bütün qəsəbələrdə 17 min ev var, yollar, infrastruktur var.
Əli Həsənov (Dövlətqaçqınkomun sədri): 850 kilometr elektrik xətti, 560 kilometr yol, 480 kilometr su xətti – bunlar böyük bir şəhərin infrastrukturudur.
İlham Əliyev: Bütün bunları biz Azərbaycanın iqtisadi imkanları hesabına etmişik.
Qəsəbə sakini (kişi): Onun da memarı Sizsiniz.
Əli Həsənov: Yeni qəsəbələrdə 70 min məcburi köçkün yaşayır.
İlham Əliyev: 70 min və növbəti illərdə də 200 mindən çox olacaqdır. Gərək hər kəs öz vəzifə borcunu yerinə yetirsin. Xalq mənə inanır, etimad göstərir. Mən də xalqa xidmət edirəm. Sizi də görməyimə çox şadam. Çox şadam ki, bu bölgə də abadlaşıbdır. Ancaq biz sizinlə Cəbrayılda görüşəcəyik.
Qəsəbə sakinləri: Allahın köməkliyi ilə, balaca Heydər də böyük Heydər olacaqdır.
İlham Əliyev: O vaxt da gələcək və biz öz siyasətimizlə, öz imkanlarımızla və güclənən ordu potensialımızla bu günü yaxınlaşdırırıq. Bu ədalətsizliyə dözmək mümkün deyil. İndi daha da güclənməliyik ki, istədiyimizə nail ola bilək. Çox sağ olun.
Qəsəbə sakini (qadın): Yenidən Prezident seçiləndən sonra xanımınla Səni buraya gəzməyə dəvət edirəm. Allahın köməkliyi ilə, başına dönüm.
Çox sağ ol.

Azərbaycan.- 2008.- 20 aprel.- S. 7.