Məhəbbətoğlu Q.

 

Cəfər Cabbarlının ev-muzeyi təhlükə qarşısındadır

Ədibin öz zəhməti ilə tikdirdiyi ev yenidən qurulmasa, yaxın illərdə həmin bina daha ağır fəsadlarla üzləşə bilər.
Ev-muzeyinə daxil olarkən binadakı eksponatlarla yanaşı, divarlardakı çatlar da diqqəti cəlb edir. Bu çatların əmələ gəlməsində ev-muzeyinin beş-on metrliyində inşa olunmuş, eləcə tikilməkdə olan çoxmərtəbəli binalar da müəyyən rol oynayıb. Yeri gəlmişkən, onu qa qeyd edək ki, çoxmərtəbəli binaların mühasirəsinə düşmüş 80 yaşlı ev artıq xarici görkəmini itirməkdədir. Binanın ətrafındakı mənzərələr ürəkaçan deyil. Bu mənada muzeyin yenidən qurulması, daha doğrusu, ətrafındakı ansambla uyğunlaşdırılması günün tələbidir desək, yanılmarıq. Əks halda, muzey ərazidə aparılan yenidənqurmanın qurbanına çevrilə bilər. Muzeyin baş elmi işçisi, C. Cabbarlının nəvəsi Qəmər Seyfəddinqızı bizimlə söhbətində ev-muzeyinin müasir durumu barədə Mədəniyyət Turizm Nazirliyini məlumatlandırdıqlarını söylədi. Bildirdi ki, hətta məsələ ilə bağlı nazirliyin nümayəndələri burada olublar. O, bu problemin tezliklə öz həllini tapacağını, daha doğrusu, binanın təməlindən tutmuş, damına qədər yenidən qurulacağını əminliklə dilə gətirdiBəs bu, baş tutmasa, muzeyin əməkdaşları hansı addımlar atmaq niyyətindədir? sualına isə o belə cavab verdi: Gələn il Cəfər Cabbarlının 110 illik yubileyidir. Hər halda, ümid edirəm ki, bu əlamətdar yubileyə qədər müvafiq dövlət qurumları Cəfər Cabbarlının ev-muzeyini  onun adına layiq səviyyəyə gətirəcəklər.
 Daha sonra 1982-ci ildə Cəfər Cabbarlının ev-muzeyinin Heydər Əliyevin təşəbbüsü ilə açıldığını xatırladan Qəmər xanım bu binanın sonuncu dəfə 1999-cu ildə təmir olunduğunu söylədi. O elə həmin ildə Heydər Əliyevin Cəfər Cabbarlının 100 illik yubileyinin dövlət səviyyəsində keçirilməsi ilə əlaqədar sərəncam imzaladığını da qeyd etdi.
Belə bir vəziyyətin (divarlardakı dərin çatlar, qopmuş suvaqlar, tavanın damması, istilik sisteminin normal işləməməsi) ədibin qiymətli əşyalarını xarab olmaq təhlükəsi qarşısında qoyduğunu dilə gətirən Qəmər xanımın sözlərinə görə, muzeydə hazırda 8500 eksponat qorunur. Eksponatların əksəriyyəti muzeyin fondunda saxlanılır: Muzey yenidən qurulsa, genişləndirilsə, fonddakı eksponatların da bir qismini ekspozisiyaya daxil etmək olar. Qəmər xanımın sözlərinə görə, muzeyə yeni eksponatlar daxil edilməkdədir. Belə ki, bu yaxınlarda kinoşünas Aydın Kazımzadə Cəfər Cabbarlı ilə bağlı bir foto təqdim edib: Həmin foto Cəfər Cabbarlının Rza Təhmasibin rejissorluğu ilə çəkilmiş Balıqçılar filmində bir balıqçı rolunda çəkildiyini təsdiq edir. Təəssüf ki, o filmin harada saxlandığı barədə heç bir məlumat yoxdur. O həmçinin muzeydə problemlərin yaşanmasına rəğmən, bura gələnlərin sayının azalmadığını dilə gətirdi: Lakin gizlədim, bəzən tavandan uçan suvaq parçaları ziyarətçilərimizin üstlərinə düşməklə onların ovqatlarını pozur. Həmsöhbətimiz bu kimi çətinliklərə baxmayaraq, Cəfər Cabbarlı digər mədəniyyət, incəsənət xadimləri ilə bağlı tədbirlərin mütəmadi keçirildiyini dedi. Cəfər Cabbarlının həyat yoldaşı Sona xanıma yazdığı Olmasın şeirinə Emin Sabitoğlu musiqi bəstələmişdi. İndiyədək heç yerdə səslənməyən həmin mahnı aprel ayının 18-, daha doğrusu, Emin Sabitoğlunun 70 illik yubileyi çərçivəsində elə bu ev-muzeyində xalq artisti Azər Zeynalovun ifasında təqdim olunacaq.

Zaman.- 2008.- 17-18 aprel.- S. 9.