İsmayıl Ömərov türk mədəniyyətinə xidmətə görə mükafatı aldı

Məlum olduğu kimi, Türkiyənin “Kanal 7" televiziyası və dünyanın 20-dən çox ölkəsində yayılan ”Först Biznes" (“First business”) beynəlxalq analitik jurnalının birgə təsis etdiyi “Zirvədəkilər-2007" mükafatı qaliblərə təqdim olunub. İctimai Televiziya və Radio Yayımları Şirkətinin Baş direktoru İsmayıl Ömərov da qaliblər sırasındadır. Baş direktor uğurlu fəaliyyətinə görə ”Türk dünyasına və türk mədəniyyətinə xidmət" mükafatına layiq görülüb. Mükafatı İ.Ömərova Türkiyənin ədliyyə naziri Mehmet Əli Şahin təqdim edib.
Laureatlar arasında Türkiyə prezidenti Abdulla Gül, Türkiyənin ədliyyə naziri Mehmet Əli Şahin, Türkiyə Radio Televiziya Üst Qurumunun rəhbəri Zahid Akman, Azərbaycanın Rumıniyadakı səfiri Eldar Həsənov da var.
Aprelin 19-da İstanbulda “Ceylan İntercontinental” da keçirilən təntənəli mərasimdə “Först Biznes” jurnalının baş redaktoru Seyfulla Türksoy deyib ki, çox dəqiq dəyərləndirmədən sonra “Zirvədəkilər 2007"in laureatları seçilib. Sorğu Türkiyədə televiziya tamaşaçıları, QHT nümayəndələri, siyasətçilər və sahibkarlar arasında keçirilib.
“Zirvədəkilər 2007" mükafatının təqdimetmə mərasiminə Rusiya, Qazağıstan, Azərbaycan, Almaniya, Hollandiya, Qırğızıstan, Rumıniya, Moldova, Türkmənistan, Gürcüstan, Ukrayna kimi ölkələrdən 500-ə yaxın dövlət adamı, iş adamı, millət vəkili, diplomat və sənətçilər qatılıb.
Qeyd edək ki, “Zirvədəkilər” mükafatı bundan əvvəl Azərbaycan prezidenti İlham Əliyev, Türkiyənin baş nazir Rəcəb Tayyib Ərdoğan, Türkiyənin keçmiş xarici işlər naziri İsmayıl Cem, Azərbaycanın fövqəladə hallar naziri Kəmaləddin Heydərova da verilib.
Bakı Dövlət Universitetinin jurnalistika fakültəsinin müəllimi, televiziya mütəxəssisi Zeynal Məmmədli İTV-nin fəaliyyətinə yaxından bələd olmadığını, nadir hallarda telekanalın proqramlarını izlədiyini dedi. Amma müsahibimiz mükafatı verən “Kanal 7"nin heç də diqqəti cəlb edənlər sırasında olmadığını söylədi: ”Bu kanal Türkiyənin reklam bazarından da çox az qazanır. Mən bununla heç də həmin kanalla bağlı mənfi münasibət aşılamaq istəmirəm. Sadəcə, onun nüfuz dairəsi ilə bağlı sizi məlumatlandırmaq istəyirəm".
Z.Məmmədli Türkiyədəki bir çox televiziyaların bu “mükafatdağıtma” mərasimlərinə çox ciddi yanaşmadığını söylədi. Onun sözlərinə görə, mükafatın hökumət nümayəndəsi tərəfindən verilməsi də onun nüfuzuna kölgə salır: “Özünə müstəqil deyən bir qrup mükafatını öz hökumətindəki nazirin təqdim etməsini istəyirsə, deməli, bu qurum hökumətdən asılı olmağı lazım bilir və asılı olmaqla da iqtisadi problemlərini həll edir. Belə bir qurum müstəqil qavrana bilməz. Halbuki jurnalistika hökumətdən bəlli məsafədə dayanmalıdır. Bir televiziya üçün üst saydığı varlıq adi seyrçiləridir. Əgər kanal mükafatçılar cərgəsini hökumət adamlarından və onlara birbaşa yaxın adamlardan müəyyənləşdirirsə, bu, onların çəkisi olmadığını göstərir”.
Müsahibimiz onu da qeyd etdi ki, mükafatçılar arasında Türkiyənin Radio Televizyon Üst Kurumu(bizdəki Milli Teleradio Şurası kimi) rəhbərinə verilməsi də kanalın bu yolla öz problemlərini həll etmək istədiyini göstərir: “Belə bir təəssürat yaranır ki, onlar bu mükafatı verməklə ”RTÜK məni cəzalandırmasın" arzusunu ifadə edir. O sədrin, eləcə də o kanalın hansı hörməti olacaqdı?"
Z.Məmmədlinin sözlərinə görə, həmin kanalın İ.Ömərova mükafat verməsi də parodiyalara yol açacaq. Müsahibimiz bildirdi ki, hökumətlə bu cür münasibət quruan “Kanal 7" kimi telekanallar asılı və satılmağa hazır olan ünvanı qazanıblar.

Müsavat.- 2008.- 22 aprel.- S. 3.