Abdullayev A.

 

Keşikçidağ mağaraları

 

Ölkə Prezidentinin 19 dekabr 2007-ci il tarixli sərəncamı ilə Azərbaycan Respublikasının Quba rayonunun Xınalıq kəndinin tarixi ərazisinin "Xınalıq" Dövlət tarix-memarlıq və etnoqrafiya qoruğu, eləcə də Ağstafa rayonunun ərazisindəki Keşikçidağ silsiləsinin bir hissəsini əhatə edən mağaralar kompleksinin "Keşikçidağ" Dövlət tarix-mədəniyyət qoruğu elan edilməsi keçmişimizi öyrənmək və müasirlik baxımından böyiik əhəmiyyətə malikdir.

Gürcüstanla sərhəddə yerləşən Keşikçidağ silsiləsinin qəribə relyefi var, çoxsaylı arxeoloji abidələrlə zəngindir... Bu mədəni-tarixi ərazi ulu əcdadlarımızın sitayiş və sığınacaq yeri olub. Burada irili-xırdalı 100-ə qədər mağara var. Mütəxəssislərin fikrincə, ərazidəki mağaralar 2.500 illik tarixə malikdir. Qədim mağaralara baxdıqca əcdadlarımızın dağ silsiləsinin tərkində nələryaratdığına, nələrə qadir olduğuna heyran olursan. Elə mağaralar var ki, ikimərtəbəlidir. Mərtəbələrə qalxan yollar sənətkarlıq baxımından diqqəti çəkir. Ulu əcdadlarımız dağın zirvəsindən yağış və qar sularının hesabına novlarla mağaralara su gətiriblər. Hər birinin təxminən 8-10 ton tutumu olan quyular indi əvvəlki görkəmindədir. Mağaranın özünəməxsus gözətçi məntəqəsi var. Buradan baxanda Keşikçidağ silsiləsi, Ceyrançöl Qarayazı düzü aydın görsənir.

Ölkə Prezidentinin sərəncamına əsasən burada qədim tarixi-mədəniyyət abidəsinin qorunub saxlanması, mühafizəsi, eləcə də turizmin inkişafı üçün müvafiq tədbirlər həyata keçirilir. Rayon mərkəzində "Keşikçidağ" Dövlət tarix-mədəniyyət qoruğunun inzibati bina ilə təmin olunması üçün yer ayrılıb. Yaxın vaxtlarda ərazidə yaşıllıq, tikinti, abadlıq və quruculuq işlərinə başlanılacaq, Keşikçidağ silsiləsinə gedən 60 kilometrlik yol yenidən qurulacaq.

 

Azərbaycan.- 2008.- 5 aprel.- S. 6.