Dünən
İçərişəhərdəki "Abşeron"
rəsm qalereyasında həvəskar rəssam Günel
Quliyevanın fərdi sərgisinin açılış
mərasimi keçirildi. Sərgidə gənc rəssamın
40-dan yuxarı rəngarəng
və qrafika əsərləri nümayiş
etdirilir.Xatırladım
ki, Günel Quliyeva 1987-ci ildə Cəbrayıl rayonunda anadan olmuş, Qarabağın acı taleyi onu Qaradağ
rayonunun Sahil qəsəbəsinə gətirib
çıxartmışdır. 2005-ci ildən etibarən Günel Quliyeva Azərbaycan Dövlət Pedaqoji Universitetinin tarix fakültəsində
təhsil alır. Rəssamlığa xüsusi
həvəsi var və bu həvəs
onu 600-dən yuxarı qrafik kompozisiya yaratmağa sövq etmişdir. Günel son dövrlərdə daha çox yağlı boya ilə işləməyə
meyil etsə də, moda eskizlərini
xüsusi həvəslə
çəkir. Günel Quliyeva
müsabiqə və sərgilərdə 2003-cü ildən
etibarən iştirak edir. İlk müsabiqəsi 2003-cü ilin
10 may Sülh bayramında baş tutmuş və Günel elə ilk müsabiqədən diploma layiq görülmüşdür.
2006-cı ildə universitetlər arasında
keçirilən sərgidə
iştirak etmişdi.
"Abşeron" Qalereyasındakı sərgidə
nümayiş etdirilən
əsərlərin çoxu
rəngkarlıq nümunələridir.
Burada həm mənzərə, həm natrimort, həm də "nü" janrında çəkilən
əsərlərə rast
gəlinmək olar. Lakin ekspozisiyadan Günelin daha artıq çoxfiqurlu kompozisiyalara meyil göstərdiyini görürük.
Mövzu baxımından
da nümayiş etdirilən əsərlər
rəngarəngdir. Rəngkarlıq
nümunələri sırasında
"Bəyaz güllər",
"Mələk", "O ellərə uç!",
"Ruhlar", "Ədəbiyyətə
doğru" kompozisiyaları
tamaşaçını özünə
daha çox cəlb edir. Qarabağ ağrısını
biz "Qanlı illər", "O ellərə
uç!" tablolarında
görürük. Günelin
yaradacılığında - istər tablolarında, istərsə də qrafik əsərlərdə
romantizmə güclü
meyil duyulur. Bunu biz "Ruhlar", "Kölgə",
"Mələk", tablolarından
duyuruq. Bəzən xəyal gənc rəssamı uzaq ölkələrə aparıb
çıxarır. ("Uzaq
sahillərdə", "Delfinlər","Tənha yelkən ağarır").
Müəllifin maraqlı qrafik əsərləri də az deyil: "Qadın sevincləri",
"Göyərçinlər", "Od gəlini", "Balerina", "Qış"
- tamaşaçıların diqqətini çəkir.
"Sevgililər" kompozisiyası
isə daha çox Şərq miniatürü üslubunu
xatırladır. Ən
nəhayət, Günelin
moda eskizlərinə olan marağı ekspozisiyada özünü
"Moda nümayiş
etdirən qız"
kompozisiyasında göstərir.
Qeyd edim
ki, Günel Quliyevanın fərdi sərgisi "Abşeron"
rəsm qalereyasında
aprelin 6-dək davam edəcəkdir.
Səs.- 2008.- 4 aprel.- S. 12.