Vəliyev C., Allahverdiyev R.

“Anı saxlamaq üçün foto vasitədir”

Məqsəd Quliyevdə fotoqraflığa həvəs 8-ci sinifdən yaranıb.

Sinif yoldaşının şəklini çəkməsi əvvəlcə onun 3 ay işləyib fotoaparat almasına, daha sonra isə bütün həyatını bu işə həsr etməsinə gətirib çıxarıb: “3 ay yay tətilində işləyib, o vaxtın pulu ilə üç min manat topladım. Gürcüstana gedib, özümə fotoaparat aldım. Elə o vaxtdan da fotoaparat mənim həmdəmimə çevrildi”. Bir müddət Sumqayıtdakı “Sintez kauçuk” zavodunda işləyən Məqsəd 1967-ci ildə elə bu müəssisənin “Kauçuk” qəzetində fotomüxbir kimi fəaliyyətə başlayıb. 1974-cü ildən isə o, “Sumqayıt” qəzetinin tamştatlı fotomüxbiri kimi işə qəbul olunub. 1991-ci ildən müstəqil fotoqraf kimi fəaliyyətini davam etdirib: “Qəzetdən çıxsam da, yaradıcılıqdan, ictimai işlərdən əl çəkə bilmirəm, indi də bütün tədbirlərdə iştirak edirəm”.
Ömrünü, gününü foto aləminə həsr edən Məqsəd Quliyevin çox dəyərli arxivi var. 1963-cü ildən bu günədək çəkdiyi bütün fotolar onun arxivində yer alıb. Bu mənada Məqsəd Quliyevin arxivindəki şəkillərə baxanda heyrətlənməmək mümkün deyil. Təkcə bunu qeyd edək ki, onun Sumqayıtla bağlı fotolarına baxandə bu şəhərin necə inkişaf etdiyinin canlı şahidini çevrilirsən. Qırx ilin fotoqrafından Sumqayıtın necə, hansı istiqamətdə dəyişdiyini soruşanda isə o belə dedi: “Sumqayıt hər il ötən illə müqayisədə daha da gözəlləşir. Bu mənada yaddaşa həkk olunmalı görüntüləri də çoxalır. Bir də görürsən ki, günəş, ay, ağaclar - təbiət insan əməyi ilə abadlaşan şəhərdə elə gözəl mənzərələr yaradır ki, o anı saxlamaq istəyirsən, bax onda foto çox kömək edir. Bir sözlə, anı saxlamaq üçün foto vasitədir”. Məqsəd bəydən o vaxtlar Sumqayıta kimlərin qonaq gəldiyini soruşanda: “Sən soruş kimlər gəlməyib, onda cavab daha qısa olar”, - dedi.
Fotoqrafın fikrincə, son vaxtlar yazıçıların, şairlərin, sənətçilərin gəlişinin azalmasına səbəb dövrün gənclərinin poeziyaya, nəsrə marağının azalması, musiqi zövqlərinin dəyişməsidir.
Söhbətimizin sonunda Məqsəd Quliyev gələcək planlarından da söz açdı: “Heydər Əliyevin Sumqayıt səfərlərinin hamısında bir fotoqraf kimi çoxlu fotolar çəkmişəm. Bu il onun 85 illik yubileyidir və mən həmin fotoları albom şəklində çap etdirmək niyyətindəyəm”.

Zaman.- 2008.- 3-4 aprel.- S. 13.