Görkəmli ədib alim və pedaqoq Mir Cəlal Paşayevin barelyefinin açılışı olmuşdur

Aprelin 26-da Bakı Dövlət Universitetində Azərbaycan ədəbiyyatının və elminin inkişafında böyük xidmətləri olan görkəmli yazıçı, alim və pedaqoq, professor Mir Cəlal Paşayevin vaxtilə rəhbərlik etdiyi Azərbaycan ədəbiyyatı tarixi kafedrasının önündə barelyefinin açılışı olmuşdur.
Mərasimdə BDU-nun rektoru, Milli Məclisin deputatı, akademik Abel Məhərrəmov Mir Cəlal Paşayevin geniş elmi və pedaqoji fəaliyyətindən, zəngin ədəbi irsinin əhəmiyyətindən, şəxsiyyətinin böyüklüyündən danışmışdır. O, 40 ildən çox Bakı Dövlət Universitetində çalışmış, 1961 – 1978-ci illərdə bu ali məktəbin Azərbaycan ədəbiyyatı tarixi kafedrasına rəhbərlik etmiş professor Mir Cəlal Paşayevin Azərbaycan ədəbiyyatına və elminə, təhsilinə dəyərli töhfələr verdiyini, alimin şərəfli ömür yolunun nəsillərə layiqli örnək olduğunu vurğulamışdır.
Sonra iştirakçılar kafedranın iş otaqları ilə tanış olmuşlar.
Tədbirdə M.C.Paşayevin oğulları – akademik Arif Paşayev və professor Hafiz Paşayev, nəvəsi, BDU-nun beynəlxalq əlaqələr üzrə prorektoru, professor Nərgiz Paşayeva iştirak etmişlər.

Xalq qəzeti.- 2008.- 27 aprel.- S. 2.