"Best model of the world-2008"

Azərbaycan bu dəfə yarışa ciddi hazırlaşır


Ötən gün "Hyatt Recens" otelində "Best model of Azerbaidjan-2008" yarışması ilə bağlı mətbuat konfransı keçirildi. Məlumdur ki, bu il "Best model of Azerbaidjan-2008" rəhbərliyi müğənni Ruhiyə tapşırılıb. Mətbuat konfransında Ruhi Əliyeva yarışma ilə bağlı açıqlamalar verdi. Ruhi çıxışı zamanı bunları söylədi: "Best model of the world-2008" yarışmasının Azərbaycan üzrə rəhbəri kimi mən seçilmişəm bu işin öhdəsindən gələcəyimə inanıram. Eyni zamanda gələnilki yarışmanı da öz öhdəmə götürməyi düşünürəm. Yaxın vaxtlarda isə Azərbaycanda modellər arasında seçim turuna başlanılacaq noyabrın əvvəllərində ölkəmizin təmsilçilərinin adları məlum olacaq". Ruhi bildirib ki, yerli seçim turlarında modellərin nümayiş etdirəcəyi geyimlər müğənninin rəhbərliyi altında yeni fəaliyyətə başlayan "
Fashion City"nin modelyerləri tərəfindən hazırlanacaq: "Mənə ötən ildə bu yarışmaya rəhbərlik etmək təklif olunmuşdu. Ancaq bu təklifi qəbul etmədim. Düşündüm ki, bu düzgün qəbul olunmayacaq. Hamı elə biləcək ki, bu addımı öz reklamım üçün atmışam". Ruhinin sözlərinə görə, yerli seçim turlarında müsabiqənin münsiflər heyətində "Best model of the world" yarışmasının prezidenti Erkan Özərman onun özü təmsil olunacaq. Digər münsiflər heyətinin adlarının müsabiqə öncəsi açıqlanacağını deyən Ruhi jüridə tanınmış simaların təmsil olunacağını vurğulayıb. Tədbirdə iştirak etmək üçün Azərbaycana səfər edən "Best model of the world" yarışmasının prezidenti Erkan Özərman builki müsabiqəyə qatılmaq üçün dünyanın 90 ölkəsindən müraciət olunduğunu qeyd edib: "Ancaq biz bu qədər ölkənin yarışmada iştirakını dəstəkləmirik. Çünki 150 modelin birdən səhnəyə çıxması düzgün deyil. Bu il modellərin yaşı 17-19 arasında olmalıdır. Mən istəyirəm ki, müsabiqədə iştirak edən modellərin bu sahədə çalışmaq üçün yaşı çatsın. Mən ötən il Azərbaycanı bu yarışmaya öz istəyimlə saldım. Əslində ötən il Azərbaycanda bu yarışma keçirilməmişdi. Çünki 2006-cı ildə yarışma ilə bağlı bir sıra problemlər yaşandı. Mən bu qərarı yalnız Azərbaycan üçün qəbul etdim". Builki yarışmada problemlərin olmayacağına ümid edən E.Özərman Türkiyənin müğənnisi Bülənt Ərsoyun Azərbaycan haqqında heç bir yanlış söz danışmadığını iddia edib: "Mən onun çıxışına baxdım o, Azərbaycan haqqında o cür fikirlər səsləndirməyib. Onun adından istifadə edərək yanlış fikirlərin yayılması düzgün deyil. Əgər siz onun belə bir çıxış etdiyini deyirsinizsə, gətirib mənə göstərin. O, Azərbaycanı çox sevir. Türkiyənin heç bir vətəndaşı Azərbaycan haqqında pis söz söyləyə bilməz, ermənilər haqqında isə ola bilər". Müsabiqənin 20 ildir ki, keçirildiyini deyən E.Özərman, 2000-ci ildən etibarən Azərbaycanın da bu müsabiqəyə qatıldığını qeyd edib. Layihə rəhbəri "Best model of the world" yarışmasının final gecəsinin İstanbulda dekabrın 29-da baş tutacağını vurğulayıb.

 

Şərq.- 2008.- 30 aprel.- S. 14.