Berlində Azərbaycan
mədəniyyətilə bağlı silsilə
tədbirlər keçirilib
Almaniyada Azərbaycan İli proqramı çərçivəsində
təşkil olunan tədbirlər bir-birini əvəz edir. Martın 28-də Berlinin mərkəzində
yerləşən fransız
kilsəsində dahi Azərbaycan bəstəkar
Üzeyir Hacıbəyovun
"Arşın mal alan" operettası nümayiş olunub. Tərlan Qorçunun bədii rəhbəri olduğu Bakı Bələdiyyə
Marionet Teatrının
kollektivi tərəfindən
səhnələşdirilmiş musiqili tamaşanı nəinki azyaşlı almanlar və burada yaşayan həmyerlilərimiz, ümumiyyətlə
zaldakı hər kəs maraqla qarşılayıb.
Tamaşa bitdikdən
sonra, sənətçilərimiz
onlara ünvanlanan sualları cavablandırıb,
Azərbaycanda marionet teatr sənəti haqda ətraflı məlumat veriblər. Qeyd edək ki, "Arşın mal alan" operettasının marionet teatrı üçün
variantı ilk dəfə 1990-cı ildə nümayiş olunub. İndiyədək tamaşa Fransa, ABŞ, Rusiya, Türkiyə və Polşada göstərilib.
Martın 29-da isə Berlin-Bakı Qalereyasında
"9+1 - Bakının incəsənəti"
vernisajı öz qapılarını incəsənət
həvəskarlarının üzünə açıb.
Müasir Azərbaycan
incəsənətini təmsil
edən doqquz rəssam və bir heykəltəraşın
əsərlərinin nümayiş
olunduğu vernisajın
açılışında nazir Əbülfəs Qarayev, "Almaniya-Azərbaycan Forumu"nun rəhbəri Otto Hauzer, Almaniyadakı səfirimiz Pərviz Şahbazov, bu ölkədə yaşayan
tanınmış rəssam
İbrahim Əhrari və başqaları çıxış edərək,
Avropa və Asiya arasında körpü olan Azərbaycan incəsənətinin
rəngarəngliyindən danışıblar.
Qalereyada keçirilən növbəti tədbir isə Azərbaycan Dövlət Rəssamlıq
Akademiyasının əsasını
qoymuş ümummilli lider Heydər Əliyevin 85 illik yubileyi münasibətilə
akademiyanın professor
və müəllim heyətinin əsərlərindən
ibarət sərgi olacaq.
Azərbaycan İli
mədəniyyət proqramı
çərçivəsində martın 29-da Berlində
"Xalqın ruhu"
adlı muğam axşamı da təşkil edilib. Axşamda alman musiqisevərləri məşhur
xanəndə, xalq artisti Alim Qasımov
və qızı Fərqanə Qasımova, eyni zamanda gənc
sənətkarlar Aidə
Əliyeva və Pərvaz İbrahimlinin ifasında Azərbaycan muğamlarını dinləyiblər.
Gənc muğam
ustalarını tarda Sahib Paşazadə və kamançada Toğrul Əsədullayevin
müşayiətilə "Dilkəş" və
"Segah" təsniflərini,
"Qarabağ şikəstəsi"ni ifa ediblər.
Alim Qasımov və Fərqanə Qasımova "Çahargah"
muğamını və
xalq mahnılarımızı
oxuyublar. Muğamlar səsləndikcə səhnənin
kənarında qurulmuş
ekranda qəzəllərin
alman və ingilis dilində tərcüməsi nümayiş
etdirilib.
Mədəniyyət proqramının açılışı çərçivəsində
martın 30-da Berlində
sonuncu tədbirlər
həyata keçirilib.
Əvvəlcə "Konzerthaus
Berlin" mədəniyyət
evində Azərbaycan
Dövlət Kamera orkestrinin müşayiətilə
"Gənc mahir sənətkarlar" adlı
konsert olub.
Həmin gün
"Caz klub b-flat" musiqi evində Azərbaycanın
tanınmış caz
sənətkarı Salman
Qəmbərov və onun rəhbərlik etdiyi "Bakustik Jazz" ansamblı konsert verib.
525-ci qəzet.- 2008.- 2 aprel.- S. 7.