Nazirlər Kabineti “Filmlərin yayımı və nümayişi Qaydaları”na əlavə və dəyişikliklər edib

"Daşınar əmlakın rəsmi reyestrləri, onların tərtib edilməsi və aparılmast Qaydaları"nın təsdiq edilməsi barədə" Azərbaycan prezidentinin 2007-ci il 11 aprel tarixli fərmanına uyğun olaraq, Nazirlər Kabinetinin qərarı ilə "Filmlərin yayımı və nümayişi Qaydaları"na əlavə və dəyişikliklər edilib.

Nazirlər Kabinetindən verilən məlumata görə, bu Qaydalar mülkiyyət formasından, buraxılış vaxtından və yerindən, texnikasından və istehsal üsullarından asılı olmayaraq, milli, xarici və ya müştərək bədii, xronikal, sənədli, elmi-kütləvi, təhsil, cizgi və başqa janrlarda çəkilmiş filmlərin qanunsuz nümayişi, pornoqrafiya və zorakılıq təbliğ edən filmlərin yayımının qarşısının alınması, tamaşaçı auditoriyasının yaş kateqoriyalarının müəyyənləşdirilməsi məqsədi ilə Azərbaycan ərazisində bütün filmlərin yayımı və nümayiş etdirilməsi qaydalarını müəyyən edir və bu bənddə yer alan "kinozal, videozal, videoyayım məntəqələri vasitəsilə" sözləri çıxarılır.

Yeni Qaydalara əsasən, filmi dövlət reyestrinə daxil etdirmək üçün mülkiyyətçi və ya filmdən istifadə hüququnu həyata keçirən şəxsin təqdim etdiyi sənədlərin arasında filmin texniki tələblərə cavab verən surəti ilə yanaşı, onun milli, irqi və ya dini düşmənçiliyin yaradılmasına yönəlmədiyi, həmçinin pornoqrafiya və zorakılığı təbliğ etmədiyi barədə də məlumat olmalıdır. Qeyd edək ki, dövlət reyestrinin aparılması və qeydə alınmış filmlərin surətlərinin saxlanılması qaydaları Mədəniyyət və Turizm Nazirliyi tərəfindən müəyyən edilir.

Ekran efir.- 2008.- 4 aprel.- S. 2.