Ağaoğlu T.

Ekran əsərlərində yaşayanlar

Milli kino sənətimiz 110 ildir yol gəlir. Bu müddət ərzində yaranan ekran əsərləri müxtəlif dövrlərin, talelərin əyani təsvirləri kimi baxılır, tarixi olayları, hadisələri göz öniində canlandırır. Həmin bədii, tammetrajlı, sənədli filmləri lentə alanlardan biri də gərgin əməyi ilə tanınan, istedadlı kinooperator, Əməkdar incəsənət xadimi, respublika Dövlət mükafatı laureatı Teyyub Axundov olmuşdur. O, artıq cismən aramızda yoxdur. Lakin xidmətlərinə görə unudulmur, dönə-dönə xatırlanıb, yad olunur. Anım günündə onun haqqında eşitdiyimiz ürək sözləri də fikrimizi təsdiqləyir.

Azərbaycan Dövlət Film Fondunun direktoru, Əməkdar incəsənət xadimi Camil Quliyev:

- Teyyub Axundov 1920-ci ildə anadan olmuşdur. O, 15 yaşında kinostudiyada əmək fəaliyyətinə başlamış-dır. Moskvada Ümumittifaq Dövlət Kinematoqrafiya İnstitutunun operatorluq fakültəsini bitirmişdir. 50 ildən artıq kino sahəsində çalışmış, 20-yə qədər bədii filmi lentə almışdır. "Görüş", "Mahnı belə yaranır", "Qnu bağışlamaq olarmı?", "Romeo mənim qonşumdur", "Sehrli xalat", "Dağlarda döyüş", "Şərikli çörək", "Qatır Məmməd", "Tütək səsi", "Birisigün gecəyarısı", "Alman klinikasına şəxsi səfər" filmlərinin quruluşçu operatoru olmuşdur.

Teyyub Axundov İkinci dünya müharibəsi zamanı ağır döyüş yolu keçmişdir. O, yaxşı sənətkar olduğu kimi, qayğıkeş də insan idi. Gənc həmkarlarına məsləhətlər verər, onlardan köməyini əsirgəməzdi. Onun quruluşçu operator olduğu "Birisigün gecəyarısı" bədii filminin yaradıcı heyəti Dövlət mükafatına layiq görülmüşdür.

Hüseyn Mehdiyev, Əməkdar incəsənət xadimi, kinooperator:

- Teyyub Axundov "Azərbaycanfilm" kinostudiyasında məktəb yaratmışdı. Bu gün tanınan, ad-san qazanan əksər kinooperatorlar sənətin sehrini, sirrini ondan öyrəniblər. Müsbət insani keyfiyyətlərinə, yaradıcılığına görə ustad bildiyimiz sənətkar heç vaxt unudulmayacaq.

Azərbaycan.- 2008.- 5 aprel.- S. 4.