Bəşirqızı Z.

Burada bacarıqlı musiqiçilər yetişir

Gəncə Musiqi Texnikumunda respublikanın müxtəlif bölgələrindən olan tələbələr musiqinin və musiqi alətlərinin dilini və sirlərini böyük şövqlə öyrənirlər. Qonşu Tovuz, Şəmkir, Naftalan, Yevlax və digər rayonlarda fəaliyyət göstərən musiqi məktəblərində çalışanların əksəriyyəti Gəncə Musiqi Texnikumunun məzunlarıdır. Fitri istedad elmi əsaslarla təkmilləşəndə araya-ərsəyə gələn musiqi bəstəsi də, yetişdirilən tələbə də sabaha daha inamla vəsiqə alır. Gəncə Musiqi Texnikumunun məzunlarının musiqi məktəblərindəki fəaliyyəti də məhz bu baxımdan diqqət çəkir. Texnikumla yaxından tanış olmaq, onun işinə bələdçi gözü ilə nəzər salmaq məqsədi ilə bu musiqi ocağının direktoru Gülçin Mirzəyeva ilə görüşdüm. Gülçin xanım 1991-ci ildə Azərbaycan Dövlət Konservatoriyasını bitirib. İki ildən artıqdır ki, texnikuma rəhbərlik edir. Böyük bir kollektivdə ciddi nizam-intizam yaratmaq, təhsilin keyfiyyətinə nəzarət etmək o qədər də asan məsələ deyil.
Texnikumda maddi-texniki bazanı gücləndirmək, mütəxəssis hazırlığının keyfiyyətini yüksəltmək, tələbələrin dərsə davamiyyətini yaxşılaşdırmaq istiqamətində əsaslı işlər görülüb. Şəhər icra hakimiyyətinin köməyi ilə bəzi otaqlar təmir olunmuş, binanın giriş qapısı təzələnmişdir. Tədris planında nəzərdə tutulan kabinetlərdən əlavə normativ qaydalara uyğun ixtisas—fortepiano, musiqi təhsili, pedaqoji təcrübə, fortepiano incəsənət tarixi, ingilis dili kabinetləri təşkil olunmuşdur. Texnikuma 1381 manat dəyərində 1 ədəd royal, 5198 manatlıq inventar—kreslo, parta, pərdə, tozsoran, xalça, elektrik avadanlıqları və kitabxana fondunu zənginləşdirmək üçün latın qrafikalı bədii ədəbiyyat alınmışdır.
Direktor texnikumda təlim-tərbiyə və yaradıcı işin təşkilində çalışan yüksək ixtisaslı, çoxillik iş təcrübəsinə malik 216 müəllim və konsertmeysterin 17 fənn birləşmə komissiyasında çalışdığını bildirərək qeyd etdi ki, pedaqoji kadrlar tədris etdikləri ixtisasa uyğun seçilib, 59 müəllim və konsertmeyster isə əvəzçilik üzrə işləməyə cəlb olunub.
O, ötən il 42 müəllimin dərsində iştirak etdiyindən söz açdı. Fortepianodan dərs deyən Sədaqət Səfərova , Xatirə Usubova , Tamella Bağırova, skripkanı tələbələrə sevdirən Rauf Hüseynzadə, Ramil Bağırov, tar müəllimləri Mahir Məmmədov, Arif Hüseynov, qarmonu şövqlə dilləndirən Telman Ələkbərov, kamança müəllimləri Asəf Novruzov, Elman Mirzəyev, vokaldan dərs deyən Sevinc İbrahimova, dirijorluq müəllimi Zenfira Məmmədovanın iş təcrübəsinin gənc müəllimlər arasında geniş yayılmasından fəxrlə danışdı. Qeyd etdi ki, əyani şöbədə təhsil alan 514 nəfər tələbənin 53-ü, qiyabi təhsil üzrə isə 162 tələbənin 140-ı ödənişli əsaslarla oxuyur.
Ötən tədris ilində texnikumu bitirən 160 məzunun 12-si Dövlət Attestasiya Komissiyasının qərarına əsasən fərqlənmə diplomuna layiq görülüb. Əvvəlki illərlə müqayisədə dövlət imtahanlarından əla və yaxşı qiymət alan tələbələrin sayı 73 nəfər artıb. 2007-2008-ci tədris ilində texnikuma əsas təhsil bazasından daxil olan 131 tələbənin 116 nəfəri dövlət hesabına təhsil alır. Bu il texnikumu 190 nəfər məzunun bitirməsi nəzərdə tutulub.
Burada dərsə davamiyyət və tədrisin keyfiyyətinə ciddi nəzarət edilir. Tədris intizamını yoxlamaq məqsədi ilə dərs ilinin əvvəlində nəzarət planları tərtib olunur, onları həyata keçirmək üçün yoxlama sualları hazırlanır, komissiyalar təşkil edilir. Ötən il gündüz şöbələrinin və qiyabi şöbənin, Fənn Birləşmə Komissiyalarının və qrup rəhbərlərinin işi, bədən tərbiyəsi rəhbərinin və gənclərin çağırışaqədərki hazırlıq rəhbərinin fəaliyyəti, pedaqoji təcrübə, kabinetlərin fəaliyyəti və s. ciddi yoxlanılıb və nəticələr pedaqoji şurada, direktoryanı müşavirələrdə müzakirə edilib. Daxili qayda-qanunlarla tələbələr ilk gündən tanış olur, tədris intizamına ciddi riayət edirlər. Hər gün tələbələrin dərsə davamiyyəti barədə direktora məlumat verilir və bu məsələlər direktor yanında həftədə bir dəfə keçirilən yığıncaqlarda müzakirə olunur. Üzürsüz səbəblərə görə dərs buraxma hallarının qarşısı dərhal alınır.
Təqaüdlə təmin olunan 443 tələbənin 52-si əlaçı təqaüdü alır. Musiqiçi müəllim yaradıcı ixtisas sahibi olduğuna görə texnikumda musiqi kollektivləri də fəaliyyət göstərir. Bunlardan üçlük, skripka çalanlar ansamblı, qədim alətlər ansamblı, qızlar kvarteti, rəqs qrupu ötən il yaranmışdır.
Gəncə Musiqi Texnikumunda hər il müxtəlif tədbirlər həyata keçirilir. Milli Dirçəliş Günündə qruplar arası idman yarışında, ulu öndər Heydər Əliyevin anım günündə Heydər Əliyev guşəsində keçirilən toplantıda, 20 Yanvar və Xocalı faciələrinə həsr olunmuş musiqili ədəbi gecələrdə, 8 Mart Beynəlxalq Qadınlar Gününə, Novruz bayramına həsr olunmuş və uşaq evində keçirilən tədbirlərdə kollektivin bütün üzvləri iştirak etmişlər.
31 Mart azərbaycanlıların soyqırımına həsr olunmuş konfrans, bəstəkar S.Rüstəmovun 100 illik yubileyi, bəstəkar Q.Qarayevin vəfatının 25 illiyinə həsr olunmuş xatirə gecəsi, texnikumun bəstəkar müəllimlərindən Məmməd Cəfərov, Svetlana Hüseynova, Gülnur Cuvarlinskayanın yaradıcılıq gecələri, 28 May Respublika Gününə İ.Əfəndiyevin “Hökmdar və qızı” pyesinin texnikumun tələbələrinin iştirakı ilə tamaşaya qoyulması, fortepiano ixtisası üzrə III kurs tələbəsi Ramil Səfərovun solo konserti, Gəncənin 2501 illiyinə həsr olunmuş şəhər tədbirlərində kollektivin iştirakı yaddaqalan tədbirlərdəndir. Bundan başqa, ənənə olaraq hər il I kurs tələbələrinin Nizami məqbərəsinə, şəhər diyarşünaslıq muzeyinə, müəllim və tələbələrin Mir Cəlal Paşayevin muzeyinə ekskursiyası təşkil edilir.
Bir sözlə, Gəncə Musiqi Texnikumunda musiqi təhsilinin inkişafı və yeni istedadların üzə çıxması üçün bütün kollektiv yorulmadan çalışır.

Xalq qəzeti.- 2008.- 3 aprel.- S. 6.