Həmidə

"Gənc musiqiçilər təhlil və ifa edir"

Martın 30-da 6 saylı uşaq incəsənət məktəbində "Gənc musiqiçilər təhlil və ifa edir" adlı I Respublika elmi-ifaçılıq müsabiqəsinə start verildi. Müsabiqənin təşkilindən məqsəd respublika prezidentinin 30 avqust 2005-ci il tarixli sərəncamı ilə təsdiq edilmiş "Azərbaycan Gəncliyi Dövlət Proqramı 2005-2009-cu illər"in müvafiq bəndlərinin icrası, görkəmli bəstəkar Qara Qarayevin anadan olmasının 90 illik yubileyinin qeyd edilməsi, Azərbaycanda uşaq, yeniyetmə və gənclər arasında musiqi sənətinin inkişaf etdirilməsi və xüsusi istedada malik uşaqların və gənclərin vaxtında aşkara çıxarılmasıyla onlara dövlət qayğısının artırılmasına dəstək verməkdən ibarətdir.

Martın 30-dan aprelin 5-dək davam edəcək müsabiqənin təşkilat komitəsinə 136 iştirakçı sənəd vermişdir. İki mərhələdə keçirilən müsabiqədə hər bir iştirakçı ilk olaraq seçdiyi Azərbaycan, rus və Avropa bəstəkarlarından birinin əsərini təhlil və ifa etməlidir. Hər iştirakçıya təhlil və ifa üçün birlikdə 20 dəqiqə vaxt verilir. Çıxışlarda iştirakçılar ifa etdiyi əsər və onun müəllifi barədə qısa məlumat verməlidir. Burada münsiflər heyəti tərəfindən iştirakçının şəxsi qavrayış səviyyəsi, əsərin obraz-məzmun elementinə münasibət bacarığı nəzərə alınacaqdır. Eyni zamanda iştirakçılar tərəfindən əsərin forması, tempi, fakturası, ştrixlərində öz əksini tapan bədii ifa məsələləri, eləcə də texniki çətinliklər və onların aradan qaldırılması yolları araşdırılacaq, tədqiq olunan əsərlərin əsas müddəalarını əks etdirən qeydlər, məruzə də, istifadə olunan ədəbiyyatın siyahısı da münsiflər heyətinə təqdim olunacaq.

Müsabiqə barədə məlumat verən Mədəniyyət və Turizm Nazirliyinin Eim və təhsil şöbəsinin müdiri Yaşar Əliyev layihənin önəmindən danışdı: "Mədəniyyət və Turizm Nazirliyi ilə Bakı Musiqi Akademiyası nəzdindəki orta ixtisas məktəb studiyasının birgə layihəsi olan bu müsabiqə müstəsna əhəmiyyətə malikdir. Çünki bu, sadəcə müsabiqə yox, elmi ifaçılıq müsabiqəsidir ki, bu da vacib nüanslardan biridir. Müsabiqənin açılışında hiss etdik ki, intellektual xarakter daşıyan belə bir tədbirin təşkili çox düzgün addımdır və hesab edirəm ki, bunun uğurlu davamı olacaq.

Deyim ki, burada bizim sistemdə fəaliyyət göstərən uşaq musiqi və incəsənət məktəblərilə yanaşı, orta ixtisas məktəb studiyasının şagirdləri də iştirak edirlər. Bu isə onu göstərir ki, müsabiqəyə böyük maraq var".

Müsabiqədə I, II və III yerləri tutan iştirakçılara nazirlik tərəfindən müvafiq olaraq 200, 150 və 100 AZN pul mükafatları və diplomlar, fərqlənən iştirakçılara isə həvəsləndirici diplomlar təqdim olunacaq. Həmçinin diploma layiq görülən ifaçıların məruzələri elmi ifaçılıq müsabiqəsinin materiallarında dərc olunacaq.

Bundan başqa, bütün iştirakçılara Mədəniyyət və Turizm Nazirliyinin şəhadətnamələri təqdim olunacaq.

Mədəniyyət.- 2008.- 3 aprel.- S. 2.