Xatirə

Xan əminin lent yazıları qaytarılmalıdır!

Xan Şuşinskinin Gürcüstandakı lent yazılarının vətənə gətirilməsi məsələsi hələ də açıq qalır. Xanəndənin oğlu Aslan Cavanşirov bildirdi ki, hazırda lent yazılarının qaytarılması ilə Azərbaycanın Gürcüstandakı səfiri Namiq Əliyev məşğul olur. O, məsələ ilə bağlı hələlik heç bir nəticə əldə olunmadığını və atasının yeni lent yazılarının Bakıya gətirilməsi üçün bütün səylərini səfərbər etdiyini söylədi: "Sözügedən lent yazıları ötən əsrin 38-ci ilinə aiddir. O vaxt atam Gürcüstanda qastrol səfərində olub. Həmin lent yazıları gürcü kinematoqrafçılarının çəkdiyi filmdə də istifadə olunub. Xan Şuşinskinin ifası Gürcüstanın xalq çalğı alətləri orkestrinin müşayiəti ilə lentə alınmışdı. Lent yazılarının qaytarılması ilə bağlı uzun illərdir qonşu dövlətə müraciət edilsə də, onlar belə materialların mövcudluğunu qəti şəkildə inkar ediblər".

Axtarışları davam etdirən A.Cavanşirov dolayısıyla materialların arxivdə saxlandığı xəbərini alıb. Ona məlum olub ki, lent yazılarının qaytarılması üçün müəyyən şəxslər maddi maraq güdürlər. Hələ bir neçə il öncə böyük xanəndənin oğlundan materialları almaq üçün 3000 dollar tələb etmişdilər. Təbii ki, Aslan bəy buna razılıq verməyib. Müəyyən vaxtdan sonra iki tərəf arasında razılıq əldə olunsa da, onlardan daha xəbər çıxmayıb və əlaqə kəsilib: "O vaxt üçün 3000 dollar böyük məbləğ hesab olunurdu. Müəyyən müddətə onu toplayıb lent yazılarını geri alacağımı düşünürdüm. Amma sonradan başa düşdüm ki, indi həmin məbləğ bəs eləmir. Lent yazılarının bəzi hissələri kinoda səslənən fikirlərlə üst-üstə düşdüyündən onları bu variantda əldə etməyinsə əhəmiyyəti yoxdur - ifanı aydın eşitmək olmur. Arxivdə isə çıxış bütövdür. Texnikanın ifanı kinodakı səslərdən ayırmağa gücü yetmir. Yeganə çıxış yolu arxiv materiallarını geri qaytarmaqdır".

Qeyd edək ki, lent yazılarında Xan Şuşinskinin "Heyratı", "Zəminxarə" və "Zabul-segah" muğamlarından parçalar yer alıb.

Həftə içi.- 2008.- 10 aprel.- S. 8.