Mənəvi sərvətlərimiz göz bəbəyi kimi qorunmalıdır

Erməni iddialarına layiqli cavab olan layihə - "Sarı gəlin" diski təqdim edilmişdir

Aprelin 4-də AMEA-nın İnsan Hüquqları İnstitutunda ortaq türk mədəniyyətinin nadir musiqi nümunələrini dünyaya tanıtmaq məqsədi daşıyan "Bizim mahnı, bizim türkü" seriyasından ilk musiqi toplusunun - təkcə Azərbaycanda, Türkiyədə və İranda deyil, digər ölkələrdə də sevilən "Sarı gəlin" xalq mahnısının yazıldığı CD təqdim edilmişdir. Bu, o "Sari gəlin"dir ki, ermənilər hər vasitə ilə öz adlarına çıxarmağa çalışırlar.

İnstitutun direktoru, siyasi elmlər doktoru Rövşən Mustafayev məlumat vermişdir ki, layihənin müəllifi və rəhbəri institutun əməkdaşı Araz Qurbanovdur. O vurğulamışdır ki, bu gün siyasi cəhətdən dünyanı zəbt etməyə çalışan ermənilik Azərbaycana uduzmaq ərəfəsindədir. Bunun səbəbi Azərbaycanda milli sərvətlərə sahiblik hissinin güclənməsidir. Bu proses qanuni xarakter daşıyır, davamlıdır və heç nə onun qarşısını ala bilməz. Milli sərvətlərə sahiblik hissinin yüksəlişinin xrestomatik düsturu lider üstəgəl millət üstəgəl real şəraitdir. Bu gün həmin üçlük Azərbaycanda mövcuddur.
Politoloq qeyd etmişdir ki, tanınmış jurnalist-alim Araz Qurbanovun rəhbərliyi altında reallaşdırılmış bu layihə erməniliyin iddialarının qarşısına sipər çəkmək istiqamətində atılan mühüm addımlardan biridir.
Milli Məclisin deputatı Qənirə Paşayeva ermənilərin mədəniyyətimizə təcavüzünün qarşısının alınmasında beynəlxalq aləmdə təbliğat işini genişləndirməyin zəruriliyini vurğulamış, layihəni Azərbaycanın öz mədəniyyət və incəsənət nümunələrini heç kəsə güzəşt etməməkdə qətiyyətli olduğunun sübutu kimi qiymətləndirmişdir. Deputat diskin çoxaldılaraq yayılmasını arzulamış, "Sarı gəlin" adlı internet səhifəsi açmağı təklif etmişdir.
Salman Mümtaz adına Ədəbiyyat və İncəsənət Arxivinin direktoru Maarif Teymurov, Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının katibi Şahin Sailov, tarix elmləri doktoru Musa Qasımov, Avropa Azərbaycanlıları Konqresi Bakı ofisinin rəhbəri Elman Məmmədov və başqaları layihənin əhəmiyyətini qeyd etmişlər. Bildirilmişdir ki, türk xalqlarının musiqi duyumunu özündə əks etdirən "Sarı gəlin" mahnısının melodiyası Azərbaycan milli musiqi sənətinin incilərindən sayılan lirik "Şur" muğamının əsaslarına söykənir. Onun nəqarətinin həmin muğam dəstgahının "Sarənc" şöbəsindən qaynaqlanması, ritminin isə "Küçələrə su səpmişəm", "Yaxan düymələ" kimi xalq mahnılarının, "Vağzalı", "Mirzəyi" milli rəqslərinin ritmləri ilə eyniliyi "Sarı gəlin"in Azərbaycan mənşəli olduğunu bir daha təsdiqləyir. Natiqlər qloballaşma şəraitində mənəvi sərvətlərimizin, o cümlədən mədəniyyət və incəsənət nümunələrimizin göz bəbəyi kimi qorunmasının zəruriliyini vurğulamışlar.
Araz Qurbanov layihə üzərində iş prosesindən danışmış, musiqi toplusunun ərsəyə gəlməsində köməyə görə Xarici Ölkələrdə Yaşayan Azərbaycanlılarla İş üzrə Dövlət Komitəsinə, Bakı Teleradio Firmasına, "Azərbaycan Televiziya və Radio Verilişləri" Qapalı Səhmdar Cəmiyyətinə, Türkiyənin TRT kanalına, AMEA Memarlıq və İncəsənət, İnsan Hüquqları İnstitutlarına minnətdarlığını bildirmişdir. O, məlumat vermişdir ki, diskə "Sarı gəlin"in əldə olunmuş 67 variantından 17-si daxil edilmişdir.

Azərbaycan.- 2008.- 5 aprel.- S. 3.