Samirə

"Bəhramnamə"ni dünya da sevdi

Bəstəkar Eldar Mansurov "Bəhramnamə" kompozisiyasını disk şəklində yazdırıb

İfaçılıq sənətimizin ən görkəmli nümayəndələrindən olan Bəhram Mansurovun xatirəsinə həsr olunmuş bu toplu internet vasitəsilə yayılaraq dünya melomanlarının zövqünü oxşamaq yönündə inanılmaz dərəcədə böyük auditoriya toplayıb. Yüzlərcə sayt audio-versiyanı öz kitabxanalarına yerləşdirdiyindən Avropa və Amerikanın müxtəlif ölkələrindən təşəkkür və musiqimizə heyranlıq hissləri ilə dolu məktublar gəlməkdədir.

Hələ 1967-ci ildə Bəhram Mansurovun yaradıcılığı YUNESKO yanında Musiqişünaslıq İnstitutunun baş direktoru Alen Danielunun diqqətini cəlb etmişdi. Bu nüfuzlu beynəlxalq təşkilatla əməkdaşlığın nəticəsi olaraq 1971 və 1975-ci illərdə B.Mansurovun ifasında Azərbaycan muğamlarının yazılışı gerçəkləşdi. O zaman bu fakt böyük bir hadisə kimi qarşılanmışdı.

Bu gün muğam sənəti bir yaradıcılıq sahəsi olaraq və ona münasibət sarıdan yeni həyatını yaşamaqdadır. "Bəhramnamə" rok, muğam, simfonik janrın çox uğurlu sintezi kimi çox yerində və vaxtında gerçəkləşdirilmiş layihədir. Aranjemançı Nazim Əhmədovla birlikdə Eldar Mansurov ustad tarçalanın ifasında "Şur", "Segah", "Çahargah", "Mahur-hindi", "Bayatı-kürd", "Bayatı-Şiraz", "Şüştər" muğamlarının avanqard üslublu musiqi ilə virtual versiyasını çox böyük zövqlə yaratdıqlarından "Bəhramnamə" böyük dinləyici auditoriyası toplaya bilib. 2005-ci ilin dekabrında respublikanın ən böyük konsert sarayında atasının sənətini bilavasitə davam etdirən Elxan Mansurovun iştirakı ilə ifaçılar qrupu Şərq və Qərb musiqisinin vəhdətindən doğan təkrarsız gözəlliyi bir daha nümayişlədilər. E.Mansurov isə bu qrupu orkestrə çevirməyi və kollektivə əcnəbi musiqiçiləri də dəvət etməyi planlaşdırır.

Məlumat üçün deyək ki, muğam musiqisinin dərin biliciləri olan Mansurovlar XIX yüzilliyin ortalarından bəri Bakı musiqi məclislərinin əsasını qoymuşdular.

Həftə içi.- 2008.- 9 aprel.- S. 8.