Sultanzadə V.
Azərbaycan
incəsənət ustalarının və
"Muğam-2007" müsabiqəsi qaliblərinin
Türkmənistandakı uğuru
Aprelin 7-dən 12-dək
Aşqabad şəhərində "Türkmənistan musiqi
sənəti bəşəriyyətin mənəvi
xəzinəsi" adlı beynəlxalq festival
keçirilmişdir. Dünyanın 15 ölkəsindən
gəlmiş musiqi qruplarının iştirakı ilə
keçirilən tədbirdə ölkəmizi Azərbaycan
Dövlət Akademik Opera və Balet Teatrının solisti,
əməkdar artist Gülüstan Əliyeva, Azərbaycan
Dövlət Xalq Çalğı Alətləri Orkestrinin
konsertmeysteri tarzən Ələkbər Ələkbərov,
əməkdar artist, kamançaçı Elşən
Mansurov, Heydər Əliyev Fondunun dəstəyi ilə
keçirilmiş "Muğam-2007" televiziya
müsabiqəsinin qalibləri Rəvanə Ərəbova,
Elnur Həsənov, Dövlət Mahnı yə Rəqs
Ansamblının solistləri Rəna İbrahimova, Elnur Süleymanov
təmsil etmişlər.
Azərbaycan
incəsənət ustalarının, "Muğam-2007"
müsabiqəsi qaliblərinin festivalda milli musiqi
alətləri və geyimlərinin sərgisində,
Türkmənistanın Milli Mədəniyyət
Mərkəzində verdikləri ayrıca konsertlərdə,
həmin Mərkəzdə festivalın bağlanışı
ilə əlaqədar qala-konsertdəki ifa və
çıxışları böyük heyranlıqla
qarşılanmışdır.
Azərbaycanın
musiqiçi və rəqqaslarından ibarət qrup aprelin
13-də ölkəmizin Türkmənistandakı
səfirliyinin və bu ölkənin Mədəniyyət
və Teleradioyayım Nazirliyinin təşkilatçılığı
ilə Aşqabad şəhərindəki Məhtimqulu
adına Milli Musiqili Dram Teatrında möhtəşəm
konsertlə çıxış etmişdir.
Konserti teatrın
direktoru A.İşankuliyev açaraq bu tədbirin iki
qardaş xalq arasında humanitar sahədə
əməkdaşlığın
gücləndirilməsində mühüm addım olduğunu
qeyd etmişdir.
Azərbaycanın
Türkmənistandakı səfiri Elxan Hüseynov
xalqlarımızın münasibətlərinin qədim
tarixə malik olduğunu vurğulayaraq Azərbaycan Prezidenti
İlham Əliyevlə Türkmənistan Prezidenti
Q.Berdiməhəmmədov arasında yüksək
səviyyəli dialoqun qurulduğunu və bunun
nəticəsində iki dövlət arasında
əlaqələrin sürətlə inkişaf etdiyini bildirmiş,
ötən 1 il ərzində ölkəmizin Baş naziri Artur
Rasizadənin, birinci müavini, Azərbaycan ilə
Türkmənistan arasında İqtisadi
Əməkdaşlıq üzrə Hökumətlərarası
Komissiyanın həmsədri Yaqub Eyyubovun, Xarici İşlər
naziri Elmar Məmmədyarovun, Türkmənistan Nazirlər
Kabineti sədrinin müavini, Xarici İşlər naziri R.Meredovun,
Nazirlər Kabineti sədrinin müavini Azərbaycan ilə
Türkmənistan arasında iqtisadi əməkdaşlıq
üzrə hökumətlərarası komissiyanın
həmsədri X.Saparlıyevin, müdafiə naziri A.Mamedgeldiyevin
qarşılıqlı səfərlərinin, cari ilin
yanvarında Azərbaycan ilə Türkmənistan arasında
İqtisadi Əməkdaşlıq üzrə
Hökumətlərarası Komissiyanın Aşqabadda keçirilmiş
ilk iclasının və bu iclas zamanı ikitərəfli
əməkdaşlığın
genişləndirilməsinə dair mühüm
qərarların verilməsinin buna bariz misal olduğunu qeyd
etmişdir.
Konserti
tamaşaçılar, o cümlədən
Türkmənistanda akkreditə olunmuş xarici
ölkələrin səfirliklərinin və beynəlxalq
təşkilatların təmsilçiləri, xarici şirkətlərin
nümayəndələri, nazirlik və müəssisələrin
əməkdaşları, burada yaşayan
soydaşlarımız Azərbaycan incəsənət ustalarının
və "Muğam-2007" müsabiqəsi
ifaçılarının çıxışlarını
böyük heyranlıqla dinləmiş, milli
rəqslərimizi həvəslə seyr etmişlər.
Konsertin keçirildiyi
zal tamaşaçılarla dolu olmuş, cərgələr
arasında əlavə stullar yerlədirilmiş, buna baxmayaraq,
tamaşaçıların bir çoxu konserti ayaqüstə
seyr etmişlər.
Azərbaycan
incəsənət ustalarının və "Muğam-2007"
müsabiqəsi qaliblərinin ifa və
çıxışları Türkmənistanda böyük
rəğbətlə qarşılanmış, onlardan
müsahibələr alınmış, verdikəri konsert
və müsahibələr Türkmənistan KİV-lərində
geniş işıqlandırılmışdır.
Musiqiçi və rəqqaslarımız peyk antenası vasitəsilə
yayımlanan "Altın Asr", "Miras",
"Yaşlıq" və "TV-4" telekanallarına
dəvət olunmuş, onlar haqqında geniş verilişlər
hazırlanmışdır.
İfaçılarımızın qısa vaxt ərzində
öyrəndikləri və festival
çərçivəsində ifa etdikləri türkmən
xalq mahnıları yerli tamaşaçıların xüsusi
marağına səbəb olmuşdur.
Festivalın
bağlanışı münasibətilə keçirilən
qala-konsertdə isə Türkmənistanın
tanınmış müğənnisi Azərbaycan mahnısını
ifaçılarımızla birgə oxumuşdur. Musiqiçi
və rəqqaslarımız konsertlər zamanı təkrar
ifa üçün tamaşaçıların
alqışları ilə dəfələrlə səhnəyə
dəvət olunmuşlar.
Respublika.- 2008.- 15 aprel.- S. 7.