Dünən 19-cu əsr musiqi tariximizin nadir incilərindən olan Cabbar Qaryağdıoğlunun
doğum günüydü.
Ustad sənətkar 147 il öncə
Şuşada anadan olub. Atası məşədi İsmayıl
kişi öz boyaqçılıq
sənətini ona öyrətmək istəsə
də, Cabbarın anadangəlmə istedadı
onu başqa yerə yönəldir.
Onun "Şahnazı", "Qatarı", "Heyratı"
muğamları Azərbaycan
musiqi sənətinin ən qiymətli inciləridir. Sənətkarın adı dünya
vokal sənətinin görkəmli nümayəndələrinin
adları ilə yanaşı səslənir.
Cabbar
Qaryağdıoğlu "Segah"ı olduqca həzin və
yumşaq, eyni zamanda yanıqlı səsləndirməklə
adamda elə təsəvvür yaradırdı ki,
muğamı dramatik tenor yox, lirik tenor oxuyur. O, "Heyratı" muğamını
ilk dəfə qrammafon valına düz 102 il bundan əvvəl yazdırıb. Bir maraqlı faktı qeyd edək ki, onun ifasında
olan "Ovşarı"
muğamını bu günə qədər heç kəs oxumağa cürət etməyib.
Rus şairi
Yesenin Cabbar Qaryağdıoğlunu "Şərq
musiqisinin peyğəmbəri"
adlandırıb. Onu da qeyd edək
ki, opera səhnəmizin ilk aktyoru məhz Qaryağdıoğlu olub.
O, bir müğamı
2-3 saat, bəzən isə 4 saat oxuyub. Şagirdlərinin də qayğısına qalan ustad deyərmiş
ki, səs və gözəllik Allah vergisidir. Gərək onların qədrini biləsən.
"Xənəndə çox
yeməməlidir. Qarınqululuq
oxumağın düşmənidir".
Xan Şuşinski,
Seyid Şuşinski, Bülbül, Davud Səfiyarov, Zülfü Adıgözəlov, Yavər
Kələntərli və
başqa məşhur
sənətkarlar Cabbar
Qaryağdıoğlunun tələbələri
olub. Cabbar Qaryağdıoğlu Dövlət
Konservatoriyasının ilk
təşkilatçılarından olub. 1906-cı ildə Şuşada oynanılan "Leyli və Məcnun" tamaşasında Məcnun
rolunu Cabbar Qaryağdıoğlu oynayıb.
Dünən
xalq artisti, respublika və SSRİ Dövlət
mükafatları laureatı Şəfiqə
Məmmədovanın da doğum günü idi.
O,
1945-ci ilin mart ayının
30-da Dərbənd şəhərində
anadan olub. İncəsənət universitetinin aktyorluq
fakültəsini bitirib.
30 ilə yaxın
Dram Teatrında işləyib.
"Dəli yığıncağı",
"Nakam qız",
"Şəhərin yay
günləri" və
başqa tamaşalarda
unudulmaz obrazlar yaradıb. Lakin kino Şəfiqə
Məmmədovanın həyatında
silinməz iz salıb. Şəfiqə
xanımın kinoda ilk işi "Qaraca qız"dakı Pəricahan roludur. Şəfiqə xanım "Bizim Cəbiş müəllim"
"Çarvadarların izi
ilə", "Dədə
Qorqud", "Xoşbəxtlik
qayğıları", "İstintaq" və başqa filmlərdə də unudulmaz obrazlar yaradıb.
"Ad
günü" filmindəki roluna görə isə
Şəfiqə Məmmədova Dövlət mükafatına
layiq görülüb.
Ədalət.- 2008.- 1 aprel.- S. 8.