Cabbar
Qaryağdıoğlu əfsanəsinin
ömrü 1 il də artdı
Azərbaycanın milli musiqi mədəniyyəti
tarixində xüsusi yer tutan Cabbar
Qaryağdıoğlunun dünən
doğum günü idi. Təxminən əsryarım öncə
Şuşada anadan olmuş ustad xanəndənin ifasında
səslənən "Şahnaz",
"Qatar", "Heyratı"
və başqa muğamlar Azərbaycan musiqi sənətinin ən qiymətli incilərindən hesab edilir. Böyük sənətkarın adı
dünya vokal sənətinin ən tanınmış nümayəndələrilə
yanaşı səslənir.
Cabbar Qaryağdıoğlu
"Segah"ı olduqca həzin və yumşaq, eyni zamanda yanıqlı
səsləndirməklə ifaçılıq tarixinə
öz adını əbədi həkk edib. O, "Heyratı"
muğamını ilk
dəfə qrammafon valına 102 il bundan əvvəl yazdırıb. Ötən
əsrin 20-ci illərində
Bakıda xanəndə
ilə tanış olan rus şairi
Yesenin Cabbar Qaryağdıoğlunu "Şərq
musiqisinin peyğəmbəri"
adlandırıb. O, bir
muğam dəstgahını
2-3 saat, bəzən isə 4 saat davamlı olaraq oxuyub. Ustad sənətkarın
həmçinin pedaqoq
kimi uğurlu fəaliyyəti də danılmazdır. Xan Şuşinski, Seyid Şuşinski, Bülbül,
Davud Səfiyarov, Zülfü Adıgözəlov,
Yavər Kələntərli
və başqa məşhur sənətkarlar
Cabbar Qaryağdıoğludan
dərs alıblar. Cabbar Qaryağdıoğlu
Dövlət Konservatoriyasının
ilk təşkilatçılarından
olub. Uzun illər milli musiqimizin tədrisi ilə məşğul olaraq, bu sahənin
inkişafına dəyərli
töhfələr verib.
Ölməz sənətkar
1945-ci ildə dünyasını
dəyişib. Xatirəsi
hər zaman ehtiramla anılan C.Qaryağdıoğlunun həyat
və yaradıcılığından
bəhs edən film çəkilib.
525-ci qəzet.- 2008.- 3 aprel.- S. 7.